.jpg)
កម្មករ-កម្មការិនីធ្វើការក្នុងរោងចក្រ ១ កន្លែង ក្នុងរាជធានីភ្នំពេញ។ រូបថត ភ្នំពេញ ប៉ុស្តិ៍
ភ្នំពេញ៖ អ្នកជំនាញកិច្ចការអន្តរជាតិលើកឡើងថា ការដាក់អគ្គលេខាធិការដ្ឋានស្តីពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) នៅកម្ពុជានឹងជួយលើកមុខមាត់កម្ពុជាមិនត្រឹមតែក្នុងតំបន់អាស៊ានប៉ុណ្ណោះទេ ប៉ុន្តែទាំងលើឆាកអន្តរជាតិផងដែរដោយសារតែកិច្ចព្រមព្រៀងនេះមានវិសាលភាពដ៏ធំធេង ដែលមានសមាជិកគ្របដណ្តប់ ប្រជាជនប្រមាណ ២,២ ពាន់លាននាក់ ឬស្មើ ៣០% នៃចំនួនប្រជាជនពិភពលោក។
កាលពីថ្ងៃទី ៣ ខែសីហា ឆ្នាំ ២០២២ លោកនាយករដ្ឋមន្ត្រី ហ៊ុន សែន បានលើកឡើង ក្នុងពិធីបើកកិច្ចប្រជុំរដ្ឋមន្ត្រីការបរទេសអាស៊ានលើកទី៥៥ ពីការចង់បង្កើតលេខាធិការដ្ឋាន RCEP ដើម្បីសម្របសម្រួលការអនុវត្តប្រកបដោយប្រសិទ្ធភាពនូវកិច្ចព្រមព្រៀងនេះ នៅរាជធានីភ្នំពេញផ្ទាល់តែម្តង។
លោក សេង វណ្ណលី សាស្ត្រាចារ្យទំនាក់ទំនងអន្តរជាតិ និងជាអ្នកតាមដាននយោបាយពិភពលោក និងតំបន់លើកឡើងថា កិច្ចព្រមព្រៀង RCEP នេះ ពិតជាមានសារៈសំខាន់ ដោយសារទំហំពាណិជ្ជកម្មមានទំហំធំ ក្នុងចំណោមប្រទេសដៃគូជាសមាជិកក្នុងកិច្ចព្រមព្រៀងនេះ ដែលមានសមាជិកប្រទេសអាស៊ានទាំង ១០ ព្រមទាំងដៃគូពាណិជ្ជកម្មសេរីអាស៊ានចំនួន ៥ ទៀត ដូចជា អូស្ត្រាលី ជប៉ុន កូរ៉េខាងត្បូងចិន និងនូវែលសេឡង់។
ជុំវិញការស្នើដាក់អគ្គលេខាធិការដ្ឋាននៃ RCEP នៅរាជធានីភ្នំពេញ ប្រទេសកម្ពុជានោះ លោក សេង វណ្ណលី មើលឃើញពីអត្ថប្រយោជន៍ ៣ យ៉ាង៖ ទី១ វាអាចជួយសម្រួលដល់ការរួមបញ្ចូលកាន់តែធំឡើងនូវសហគ្រាសធុនតូច និងមធ្យម (SME) របស់កម្ពុជា; ទី២ វាផ្តល់ជូនកម្ពុជានូវឱកាសទទួលបានកិច្ចសហប្រតិបត្តិការផ្នែកសេដ្ឋកិច្ចប្រសើរជាងមុន ពីបណ្តាប្រទេសឧស្សាហកម្មជឿនលឿន; និងទី៣ ជួយលើកមុខមាត់កម្ពុជាលើវេទិកាអន្តរជាតិ ជាពិសេសពាក់ព័ន្ធនឹងការធ្វើសេរីភាវូបនីយកម្មពាណិជ្ជកម្មនិងការវិនិយោគ ព្រមទាំងកម្ពុជាក្នុងការពង្រឹងជំហរពាណិជ្ជកម្មអាស៊ាន។
កិច្ចព្រមព្រៀងនេះ គឺជាកិច្ចព្រមព្រៀងពាណិជ្ជកម្មសេរី ដ៏ធំបំផុតលើពិភពលោក ដែលមានសមាជិកចំនួន ១៥ ប្រទេស រួមមានប្រទេសជាសមាជិកអាស៊ានទាំង ១០ និងប្រទេសដៃគូពាណិជ្ជកម្មសេរីអាស៊ានចំនួន ៥ មានដូចជា អូស្ត្រាលី ជប៉ុន កូរ៉េខាងត្បូងចិន និងនូវែលសេឡង់ គ្របដណ្តប់ ប្រជាជនប្រមាណ ២,២ ពាន់លាននាក់ ឬស្មើ ៣០% នៃចំនួនប្រជាជនលើពិភពលោក, ផលិតផលក្នុងស្រុកសរុបប្រមាណ ២៦,២ ទ្រីលានដុល្លារ ឬ ៣០% នៃផលិតផលក្នុងស្រុកសរុបរបស់ពិភពលោក និងទំហំពាណិជ្ជកម្មចំនួនប្រមាណ ២៨% នៃទំហំពាណិជ្ជកម្មពិភពលោកទាំងមូល។
លោកបណ្ឌិត យង់ ពៅ អគ្គលេខាធិការនៃអគ្គលេខាធិការដ្ឋានរាជបណ្ឌិត្យសភាកម្ពុជា បង្ហាញសុទិដ្ឋិនិយមចំពោះសន្ធិសញ្ញា RCEP ដោយលោកសង្កត់ធ្ងន់ចំពោះសារៈសំខាន់នៃជញ្ជីងពាណិជ្ជកម្មដែលក្តោបប្រជាជនប្រមាណ ៣០% ក្នុងពិភពលោក សម្រាប់កម្ពុជា និងរដ្ឋជាសមាជិកកិច្ចព្រមព្រៀងនេះ ជាពិសេសតំបន់អាស៊ាន ដែលលោកអះអាងថា កិច្ចព្រមព្រៀង RCEP នេះមានទំហំធំជាងកិច្ចព្រមព្រៀងពាណិជ្ជកម្មផ្សេងៗទៀត។
លោក យង់ ពៅ បានគូសបញ្ជាក់ថា ការស្នើដាក់អគ្គលេខាធិការដ្ឋាននៃ RCEP នៅរាជធានីភ្នំពេញ គឺជាលទ្ធភាពមួយដែលបើកផ្លូវឱ្យកម្ពុជា អាចសម្រេចចាត់ចែងដោយផ្ទាល់លើកិច្ចប្រជុំ ធ្វើការសម្របសម្រួលនានា សម្រាប់កិច្ចការរបស់ RCEP ពីប្រទេសកម្ពុជា និងអាចបង្ហាញពីសមត្ថភាពនិងសក្តានុពលរបស់កម្ពុជា ក៏ដូចជាសម្រួលរំហូរពាណិជ្ជកម្មអន្តរជាតិស្របតាមចក្ខុវិស័យកម្ពុជាផង។
លោកបានមានប្រសាសន៍បន្ថែមយ៉ាងដូច្នេះថា៖ «ចំពោះទិដ្ឋភាពសេដ្ឋកិច្ច-ពាណិជ្ជកម្ម ខ្ញុំយល់ឃើញថា យើងក្លាយជាអ្នកចាត់ចែង សម្របសម្រួលនូវកិច្ចប្រជុំ របៀបវារៈទាំងឡាយ ប្រាកដណាស់ យើងជាម្ចាស់ផ្ទះ យើងអាចកំណត់របៀបវារៈដែលមានគុណប្រយោជន៍សម្រាប់ខ្លួន។ សម្រាប់ទិដ្ឋភាពនយោបាយវិញ កាលណាមានលេខាធិការដ្ឋានតាំងនៅភ្នំពេញ វាបង្ហាញថាកម្ពុជាមានសន្តិភាពពេញលេញដែលនរណាក៏អាចមកវិនិយោគបាន។
ចំណែកទិដ្ឋភាពការទូតវិញ វាបង្ហាញពីសមត្ថភាពរបស់កម្ពុជាយើង ដែលអាចមានលទ្ធភាពទទួលភ្ញៀវឥស្សរជនការទូតដែលជាសមាជិកកិច្ចព្រមព្រៀង RCEP ហ្នឹង ទាំងកិច្ចប្រជុំ និងដំណើរការងារផ្សេងៗទៀតជុំវិញលេខាធិការដ្ឋាន RCEP»។
កិច្ចព្រមព្រៀង RCEP បានផ្តើមការចរចាជាផ្លូវការ ក្នុងអំឡុងពេលកិច្ចប្រជុំកំពូលអាស៊ាន នៅឆ្នាំ ២០១២ ក្នុងពេលកម្ពុជាធ្វើជាម្ចាស់ផ្ទះប្តូរវេន។ កិច្ចព្រមព្រៀងនេះត្រូវបានចុះហត្ថលេខាជាផ្លូវការនៅថ្ងៃទី ១៥ ខែវិច្ឆិកា ឆ្នាំ ២០២០ ក្នុងកិច្ចប្រជុំកំពូលអាស៊ានតាមប្រព័ន្ធវីឌីអូ (Online Conference) ខណៈវៀតណាមធ្វើជាម្ចាស់ផ្ទះ។ មុខទំនិញសំខាន់ៗជាច្រើននៃទំនិញកសិកម្ម កសិកម្មកែច្នៃ និងទំនិញឧស្សាហកម្ម និងត្រូវអនុញ្ញាតឱ្យនាំចូលប្រទេសទាំងនេះដោយទទួលបានការលើកលែងពន្ធជាមធ្យមជាង ៩០% សម្រាប់កម្ពុជា៕
