ភ្នំពេញៈ សមាគមមីក្រូហិរញ្ញវត្ថុ (CMA) បានយល់ស្របតាមសំណើរបស់លោកនាយករដ្ឋមន្ត្រី ហ៊ុន សែន ចំពោះការផ្តល់ឥណទានជាមួយអត្រាការប្រាក់ក្រោមទីផ្សារដល់ប្រជាពលរដ្ឋក្នុងភូមិធម្មជាតិរុនតាឯក ដែលស្ម័គ្រចិត្តចាកចេញពីតំបន់រមណីយដ្ឋានអង្គរ។
លោក ហ៊ុន សែន កាលថ្ងៃទី ១៣ ខែកញ្ញា បានអំពាវនាវឱ្យគ្រឹះស្ថានមីក្រូហិរញ្ញវត្ថុផ្តល់ប្រាក់កម្ចីជាមួយអត្រាការប្រាក់ទាបជូនប្រជាពលរដ្ឋដែលបានមករស់នៅភូមិធម្មជាតិរុនតាឯក ក្រោយពីស្ម័គ្រចិត្តរើលំនៅឋាន និងសំណង់ផ្សេងៗ ចេញពីតំបន់រមណីយដ្ឋានអង្គរ។
លោកនាយករដ្ឋមន្ត្រីថ្លែងថា៖ «ខ្ញុំអំពាវនាវចំពោះម្ចាស់មីក្រូហិរញ្ញវត្ថុ ជួយផ្តល់ប្រាក់កម្ចីឱ្យប្រជាពលរដ្ឋដែលបានមករស់នៅក្នុងតំបន់រុនតាឯក ដោយអត្រាការប្រាក់ទាប និងដោយភាពអនុគ្រោះ»។
យោងតាមសេចក្តីប្រកាសព័ត៌មាននៅថ្ងៃទី ១៤ ខែកញ្ញា សមាគមមីក្រូហិរញ្ញវត្ថុកម្ពុជា សូមប្រកាសគាំទ្រប្រសាសន៍អំពាវនាវរបស់ លោកនាយករដ្ឋមន្ត្រី ហ៊ុន សែន ដែលបានស្នើដល់គ្រឹះស្ថានមីក្រូហិរញ្ញវត្ថុក្នុងការសម្របសម្រួលផ្តល់ឥណទានជាមួយ «អត្រាការប្រាក់ទាបនិងដោយភាពអនុគ្រោះ» ជូនប្រជាជនដែលបានមករស់នៅភូមិធម្មជាតិរុនតាឯក។
CMA បានលើកឡើងថា៖ «សមាគមសូមលើកទឹកចិត្តដល់សមាជិករបស់សមាគមទាំងអស់ដែលមានប្រតិបត្តិការក្នុងតំបន់ខាងលើ មេត្តាសម្របសម្រួលផ្តល់ឥណទានថ្មីៗ ប្រកបដោយភាពងាយស្រួល និងលក្ខខណ្ឌអនុគ្រោះសមស្រប ចំពោះប្រជាពលរដ្ឋដែលបានផ្លាស់ប្តូរលំនៅមកភូមិធម្មជាតិ រុនតាឯកតាមការអំពាវនាវរបស់រាជរដ្ឋាភិបាល។ កាយវិការនេះជាការចូលរួមរបស់វិស័យមីក្រូហិរញ្ញវត្ថុ ជាមួយរដ្ឋាភិបាលក្នុងការថែរក្សានិងអភិរក្សតំបន់អង្គរ ដែលជាបេតិកភណ្ឌពិភពលោក និងមនុស្សជាតិ»។
លោក សុខ វឿន ប្រធានក្រុមប្រឹក្សាភិបាលនៃសមាគមមីក្រូហិរញ្ញវត្ថុកម្ពុជា និងជាប្រធាននាយកប្រតិបត្តិគ្រឹះស្ថានមីក្រូហិរញ្ញវត្ថុ LOLC បានប្រាប់ថា បន្ទាប់ពីការស្នើសុំរបស់លោកនាយករដ្ឋមន្ត្រី កាលពីថ្ងៃទី ១៣ ខែកញ្ញា សមាគមបានបើកកិច្ចប្រជុំជាមួយសមាជិករបស់ខ្លួន បន្ទាប់មករាល់សមាជិកទាំងអស់បានយល់ព្រមតាមសំណើរបស់លោកនាយរដ្ឋមន្ត្រីក្នុងការបញ្ចុះអត្រាការប្រាក់ និងលក្ខខណ្ឌអនុគ្រោះដើម្បីផ្តល់ ឥណទានដល់អ្នកមានលទ្ធភាពគ្រប់គ្រាន់ក្នុងការយកទៅប្រើប្រាស់ ឬសាងសង់លំនៅឋាន។
លោកថ្លែងថា៖ «សមាជិករបស់យើងបានឯកភាពតាមសំណើរបស់លោកនាយករដ្ឋមន្ត្រីក្នុងការផ្តល់កម្ចីជាមួយអត្រាក្រោមទីផ្សារ និងលក្ខខណ្ឌសមស្របសម្រាប់ប្រជាជនក្នុងភូមិឋាន ធម្មជាតិរុនតាឯក។ ប៉ុន្តែយើងនឹងធ្វើការវាយតម្លៃក្នុងការផ្តល់ទំហំឥណទានទៅតាមលទ្ធភាពសងជាក់ស្តែងរបស់បងប្អូនប្រជាពលរដ្ឋដែលបានប្តូរលំនៅឋានពិតប្រាកដនៅទីនោះ ជាមួយនឹងលំហូរប្រាក់ចំណូលរបស់ពួកគាត់ផងដែរ»។
លោកបន្ថែមថា៖ «យើងនឹងមិនផ្តល់នូវឥណទានណាដែលមិនបានជួយដល់ប្រជាពលរដ្ឋ បែរជាផ្តល់ជាបន្ទុកបន្ថែមនោះទេ ដូច្នេះយើងមានមន្ត្រីរបស់យើងនឹងធ្វើការវាយតម្លៃ»។
លោកប្រាប់ទៀតថា លោកក៏បានប្រជុំជាមួយប្រធានសាខាស្ថាប័នរបស់លោកនៅខេត្តសៀមរាប ក្នុងការផ្តល់ជាគោលការណ៍អនុវត្តន៍ទៅតាមសេចក្តីណែនាំរបស់សមាគមផងដែរ។
របាយការណ៍ក្រសួងរៀបចំដែនដី នគរូបនីយកម្ម និងសំណង់បង្ហាញថា ប្រតិបត្តិការក្នុងការរក្សាតំបន់រមណីយដ្ឋានអង្គរជាសម្បត្តិបេតិកភណ្ឌពិភពលោក គិតចាប់ពីថ្ងៃទី ១៨ សីហា ដល់ថ្ងៃទី ១០ ខែកញ្ញា បានបញ្ចប់ការវាស់វែងក្បាលដី និងស្រង់ព័ត៌មាន អ្នកកាន់កាប់ដីនៅភូមិគោលដៅទាំង ១១៤ ភូមិ ក្នុងឃុំចំនួន ១៧ សង្កាត់ចំនួន ៧ ក្រុងចំនួន ១ និងស្រុកចំនួន ៤ ដោយវាស់វែងក្បាលដី បានសរុប ៩៣ ៣៥១ ក្បាលដី ទំហំ ១០ ៩៤៥ហិកតា។ ក្នុងនោះក្បាលដីមានសំណង់ចំនួន ៣៩ ០៤០ ក្បាលដី, ក្បាលដីគ្មានសំណង់ចំនួន ៤៧ ៣៤០ ក្បាលដី និងក្បាលដីជាំដីស្រែចម្ការ ៦ ៩៩១ ក្បាលដី។
សម្រាប់ប្រជាពលរដ្ឋស្ថិតនៅភូមិទក្សិណត្បូង និងភូមិត្រពាំងសេស ដែលគ្រប់លក្ខខណ្ឌ និងស្ម័គ្រចិត្តរុះរើសំណង់ខុសច្បាប់ទៅចាប់ឆ្នោតជ្រើសរើសដីឡូត៍នៅភូមិធម្មជាតិរុនតាឯករួច ចំនួន ១ ១១៧ ដោយក្នុង ១ គ្រួសារ ទទួលបានដីចំនួន ១ ឡូត៍ ទំហំ ២០ ម៉ែត្រគុណ ៣០ ម៉ែត្រ៕