.jpg)
ការនាំចេញអង្ករត្រូវបានកម្ពុជានាំចេញទៅកាន់ទីផ្សារអន្តរជាតិចំនួន ៥៤ ប្រទេសក្នុងរយៈពេល ៨ ខែក្នុងឆ្នាំ ២០២២ នេះ។ ហេង ជីវ័ន
ភ្នំពេញៈ បរិមាណអង្ករសរុបប្រមាណជិត ៣៩ ម៉ឺនតោនត្រូវបានកម្ពុជានាំចេញទៅកាន់ទីផ្សារអន្តរជាតិចំនួន ៥៤ ប្រទេសក្នុងរយៈពេល ៨ ខែក្នុងឆ្នាំ ២០២២ នេះ ក្នុងទំហំទឹកប្រាក់ជិត ២៤៣ លានដុល្លារ។ ទីផ្សារចិននៅតែឈរជាអ្នកទទួលការនាំចូលលំដាប់ទី ១ ដដែល។
យោងតាមរបាយការណ៍ដែលចេញផ្សាយដោយសហព័ន្ធស្រូវអង្ករកម្ពុជានាដើមខែកញ្ញានេះ ក្នុងរយៈពេល ៨ ខែនៃឆ្នាំ ២០២២ កម្ពុជាបាននាំចេញអង្ករទៅក្រៅប្រទេសសរុប ៣៨៩ ០០០ តោន [បើគិតជាទឹកប្រាក់មានចំនួន ២៤២,៨០ លានដុល្លារ] បានកើនក្នុងអាត្រា ១៣,២៦% ធៀបនឹងបរិមាណនៃការនាំចេញរយៈពេលដូចគ្នាក្នុងឆ្នាំ ២០២១។ ប្រទេសចិនឈរនៅលំដាប់ទី ១ ដែលស្មើនឹងអត្រា ៤៦% បារាំងនៅលំដាប់ទី ២ ក្នុងអត្រា ១៥% ហើយម៉ាឡេស៊ីឈរនៅលំដាប់ទី ៣ ក្នុងអត្រា ៦% ព្រមទាំងបណ្តាប្រទេស ៥១ ផ្សេងទៀតក្នុងទ្វីបអាស៊ី អឺរ៉ុប និងអាហ្វ្រិក។
ការនាំចេញអង្ករដែលកម្ពុជាសម្រេចបានចំនួន ៣៨៩ ពាន់តោន ក្នុងរយៈពេល ៨ ខែនេះ បានកើនក្នុងអត្រា ១៣,២៦% ធៀបនឹងរយៈពេលដូចគ្នាក្នុងឆ្នាំ ២០២១។
របាយការណ៍ដដែលបង្ហាញថា សម្រាប់ទ្វីបអឺរុប កម្ពុជាបាននាំចេញអង្ករទៅបណ្តាប្រទេសចំនួន ២៦ ក្នុងរង្វង់ ១៤១ ៤៨៣ តោន គិតជាទឹកប្រាក់សរុប ៩៨,៧៤ លានដុល្លារ។ ចំណែកក្នុងទ្វីបអាហ្វ្រិកសរុបចំនួន ៩ ប្រទេស មានចំនួន ១៣ ៤៩២ តោន គិតជាទឹកប្រាក់ចំនួនជាង ១២,១២ លានដុល្លារ។ តំបន់មជ្ឈិមបូព៌ាមាន ៤ ប្រទេស បានចំនួន ៦ ២០៨ តោន គិតជាទឹកប្រាក់ចំនួន ៥,៤៥ លានដុល្លារ។ ក្នុងតំបន់អាស៊ានវិញ សរុបចំនួន ៤ ប្រទេស នាំចេញក្នុងបរិមាណ ៣៤ ៦៣៣ តោន គិតជាទឹកប្រាក់ចំនួន ២៣,៥៧ លានដុល្លារ។
លោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា (CCFC) បែរជាយល់ឃើញថា ចំពោះស្ថានភាពផលិតស្រូវអង្ករនៅក្នុងស្រុកគឺស្ថិតក្នុងស្ថានភាពដុនដាប ដោយសារតែកត្តាប្រែប្រួលអាកាសធាតុ ដែលយាយីរំខានដល់កសិករដែលតំបន់ខ្លះ។ លោកបានគូសបញ្ជាក់ទៀតថា បញ្ហាទឹកជំនន់ តំបន់ខ្លះជួបបញ្ហាគ្រោះរាំងស្ងួត ដោយហេតុភាគច្រើនប្រជាកសិករនៅប្រកបការងារស្រែស្រូវនេះតាមបែបប្រពៃណី។
បើយោងតាមលោក ថេង សាវឿន នាពេលកន្លងមក ប្រជាកសិករបានត្អូញត្អែរចំពោះបញ្ហាស្រួវអង្ករគឺទីផ្សារនៅពេលប្រមូលផល អត្រាទិញស្រូវមានតម្លៃទាប ធ្វើឱ្យពួកគាត់ទូទាត់ទៅមិនអាចរួចថ្លៃទុនដើម ដោយសារពួកគាត់លក់ទៅបានតម្លៃទាប តែចំណាយច្រើនលើការផលិត តួយ៉ាងតម្លៃប្រេងឥន្ធនៈ ជី ឈ្នួល សម្ភារកសិកម្ម មានតម្លៃថ្លៃ។
លោក ថេង សាវឿន បានបន្ថែមថា៖ « ដើម្បីឱ្យវិស័យកសិកម្មកម្ពុជាកាន់តែមានការរីកចម្រើន ចាំបាច់ត្រូវរៀបចំឱ្យមានទុន ឬប្រាក់កម្ចីដែលមានអត្រាការប្រាក់ទាបសម្រាប់គាំទ្រវិស័យកសិកម្ម ជាពិសេសប្រជាកសិករខ្នាតតូច ការរៀបចំប្រព័ន្ធធារាសាស្ត្រ បច្ចេកទេសកសិកម្ម និងជាពិសេសការធ្វើពាណិជ្ជកម្ម-ទីផ្សារកសិកម្ម ដែលត្រូវជួយសម្របសម្រួលដល់កសិករបន្ថែមទៀត ព្រមទាំងផ្សព្វផ្សាយព័ត៌មានឱ្យបានទូលំទូលាយដល់ប្រជាកសិករទាក់ទងលក្ខខណ្ឌទីផ្សារនាំចេញ-នាំចូល ផលិតផលកសិកម្ម»។
បើយោងតាមរបាយការណ៍របស់សហព័ន្ធស្រូវអង្ករកម្ពុជា ប្រភេទអង្ករដែលកម្ពុជាបានធ្វើការនាំចេញមានដូចជា អង្ករក្រអូបគ្រប់ប្រភេទនាំចេញបានចំនួន ៦៥,៨% អង្ករសចំនួន ២៩,៩១% អង្ករសរីរាង្គចំនួនជិត ២% អង្ករចំហុយ ចំនួនជាង ២% និងអង្ករដំណើបចំនួន ០,០១% ។ កាលពីឆ្នាំ ២០២១ ការនាំចេញអង្ករបានធ្លាក់ចុះប្រមាណ ១០,៦៨% បើធៀបនឹងរយៈពេលដូចគ្នាក្នុងឆ្នាំ ២០២០៕
