សៀមរាបៈ កំណើននៃការប្រើប្រាស់យានយន្តអគ្គិសនីនៅកម្ពុជាត្រូវបានរំពឹងថា នឹងមានកំណើនកាន់តែច្រើននៅពេលខាងមុខ ខណៈរដ្ឋាភិបាលទើបបើកសម្ពោធស្ថានីយបញ្ចូលថាមពលយានយន្តអគ្គិសនី (EV Charging Station) ទី ៣ នៅក្នុងខេត្តសៀមរាប។
យោងតាមក្រសួងសាធារណការ និងដឹកជញ្ជូន ក្នុងរយៈពេល ៧ ខែ ឆ្នាំ ២០២២ មានរថយន្តអគ្គិសនីសរុប ៣០៥ គ្រឿងត្រូវបានចុះបញ្ជី ខណៈក្នុងរយៈពេល ៧ ខែឆ្នាំ ២០២១ មានចំនួនត្រឹមតែ ១៦ គ្រឿងប៉ុណ្ណោះ ដោយកើនឡើងប្រមាណ ១ ៨០៦ ភាគរយ។ កំណើននេះបានឆ្លុះបញ្ចាំងឱ្យឃើញនូវការយល់ដឹង និងការគាំទ្ររបស់ប្រជាពលរដ្ឋលើការប្រើប្រាស់រថយន្តអគ្គិសនីនៅកម្ពុជា។
ថ្លែងក្នុងពិធីសម្ពោធដាក់ឱ្យប្រើប្រាស់ស្ថានីយបញ្ចូលថាមពលយានយន្តអគ្គិសនី (EV Charging Station) ក្នុងក្រុងសៀមរាប ខេត្តសៀមរាប កាលពីថ្ងៃទី ១៤ ខែកញ្ញា លោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន បានឱ្យដឹងថា បច្ចុប្បន្នពិភពលោកបានដើរដល់ដំណាក់កាលថ្មីមួយ គឺការប្រើប្រាស់រថយន្តអគ្គិសនី ដែលជាប្រភេទរថយន្តមានគុណសម្បត្តិល្អច្រើនបើធៀបជាមួយរថយន្តប្រើប្រេងឥន្ធនៈ។
លោកថ្លែងថា៖ «ការប្រើប្រាស់រថយន្តអគ្គិសនី គឺចំណេញថាមពលច្រើនជាងរថយន្តប្រើប្រេងឥន្ធនៈដល់ទៅ ៣ ដង ចំណែកការជួសជុលថែទាំមានការចំណាយតិច ដោយសារគ្រឿងបន្លាស់រថយន្តអគ្គិសនីមានចំនួនតិច ជាពិសេសជាងនេះទៀត ការប្រើប្រាស់រថយន្តអគ្គិសនីមិនបំភាយឧស្ម័នពុលទៅក្នុងបរិយាកាស និងមានសំឡេងស្ងាត់ល្អផងដែរ»។ ប្រជាពលរដ្ឋខ្មែរនៅពេលនេះ មានការយល់ដឹងកាន់តែច្រើនពីសារៈសំខាន់នៃការប្រើប្រាស់រថយន្តអគ្គិសនី»។
ទោះយ៉ាងណា លោក ចាន់ថុល បានលើកឡើងថា ដើម្បីអាចជំរុញឱ្យសកម្មភាពនៃការប្រើប្រាស់រថយន្តអគ្គិសនីមានដំណើរការទៅមុខរលូនល្អ គឺត្រូវការជាចាំបាច់ការចូលបណ្តាក់ទុនរបស់ផ្នែកឯកជនទៅលើម៉ាស៊ីនបញ្ចូលអគ្គិសនីនៅតាមស្ថានីយចាក់ប្រេងឥន្ធនៈ។ លោកបញ្ជាក់ថា៖ «យើងសង្ឃឹមថា វិស័យឯកជនក៏ដូចជាដៃគូអភិវឌ្ឍន៍ផ្សេងទៀត នឹងផ្ដល់ស្ថានីយបញ្ចូលថាមពលអគ្គិសនីយានយន្តបន្ថែមទៀតដើម្បីឱ្យបងប្អូនប្រជាពលរដ្ឋអាចទិញរថយន្តអគ្គិសនីឱ្យបានច្រើន និងប្រើប្រាស់បានទូលំទូលាយ»។
បើតាមលោក ចាន់ថុល អត្រាពន្ធនាំចូលរថយន្តធម្មតា(ប្រើប្រាស់ប្រេងឥន្ធនៈ) ជាមធ្យមគឺប្រហែល ១២២ ភាគរយ ប៉ុន្តែចំពោះរថយន្តប្រើប្រាស់ថាមពលអគ្គិសនី គឺអាចស្ថិតនៅប្រហែល ៥០ ភាគរយ។ នៅកម្ពុជាបច្ចុប្បន្នមានរថយន្តប្រមាណ ១លានគ្រឿង និងម៉ូតូ ប្រហែល ៥,៧ លានគ្រឿង។
លោក Butchaiah Gadde តំណាងកម្មវិធីអភិវឌ្ឍន៍សហប្រជាជាតិ (UNDP) ប្រចាំកម្ពុជា បានលើកឡើងថា UNDP ពិតជារីករាយដែលបានសហការជាមួយនឹងរដ្ឋាភិបាលក្នុងការជំរុញឱ្យមានការប្រើប្រាស់យានយន្តអគ្គិសនីនៅកម្ពុជា ដែលការប្រើប្រាស់រថយន្តអគ្គិសនីនឹងផ្តល់អត្ថប្រយោជន៍យ៉ាងច្រើនសម្រាប់សេដ្ឋកិច្ច ក៏ដូចជាការការពារបរិស្ថាន។
ម្ចាស់ហាងលក់រថយន្ត ១ កន្លែងក្នុងរាជធានីភ្នំពេញ ដែលសុំមិនឱ្យបញ្ចេញឈ្មោះបានប្រាប់ថា ទោះជាពេលនេះលោកឃើញមានរថយន្តអគ្គិសនីមួយចំនួនកំពុងចរាចរនៅតាមដងផ្លូវក៏ដោយ ក៏កន្លែងរបស់លោកនៅមិនទាន់បានយករថយន្តប្រទេសនេះមកដាក់លក់ទេ ព្រោះមិនដែលមានអតិថិជនសួររក។ ម៉្យាងស្ថានភាពពេលនេះ ក៏ពិបាករកកន្លែងបញ្ចូលភ្លើងដែរ ហើយទៅតាមខេត្តកាន់តែពិបាក។
លោកបានប្រាប់ថា៖ «ខ្ញុំមិនទាន់នាំយករថយន្តប្រើអគ្គិសនីមកលក់ទេ ចាំមើលគេសិន ពិសេសកន្លែងបញ្ចូលភ្លើង»។
ក្រុមហ៊ុន ឈេហ្វរ៉ុន (ខេមបូឌា) លីមីធីត កាលពីថ្ងៃទី ២៦ ខែមេសា កន្លងមក បានដាក់ឱ្យដំណើរការនូវស្ថានីយបញ្ចូលថាមពលយានយន្តអគ្គិសនីលើកដំបូងរបស់ខ្លួនដែលស្ថិតនៅផ្លូវព្រៃស ក្នុងសង្កាត់ព្រៃស ខណ្ឌដង្កោ រាជធានីភ្នំពេញ។
ប្រធានក្រុមហ៊ុន ឈេហ្វរ៉ុន (ខេមបូឌា) លីមីធីត លោក Pongtorn Tangmanuswong បាននិយាយថា ការដាក់ឱ្យដំណើរការស្ថានីយបញ្ចូលថាមពលយានយន្តអគ្គិសនីទី ១ នេះគឺស្ថិតនៅក្នុងដំណាក់កាលរីកចម្រើនថ្មីមួយទៀតក្នុងការផ្តល់សេវារបស់ខ្លួននៅកម្ពុជា ជាពិសេសជាការចូលរួមចំណែកជាមួយរដ្ឋាភិបាលកម្ពុជាដើម្បីអភិវឌ្ឍសេដ្ឋកិច្ចកម្ពុជាឱ្យមានការរីកចម្រើននៅក្នុងពេលបច្ចុប្បន្នក៏ដូចជានាពេលអនាគត។
គិតត្រឹមថ្ងៃទី ១៤ ខែកញ្ញា ឆ្នាំ ២០២២ ក្រសួងបានដាក់ឱ្យដំណើរការនូវស្ថានីយបញ្ចូលថាមពលយានយន្តអគ្គិសនីបានចំនួន ៣ ទីតាំង រួចមកហើយ គឺទី ១ ស្ថិតនៅទីស្ដីការក្រសួងសាធារណការ និងដឹកជញ្ជូន ទីតាំងទី ២ នៅក្នុងខេត្តព្រះសីហនុ និងទីតាំងទី ៣ នៅក្នុងក្រុងសៀមរាប។ តាមផែនការក្រសួងគ្រោងនឹងដំឡើងស្ថានីយបញ្ចូលថាមពលយានយន្តអគ្គិសនីទី ៤ នៅខេត្តបាត់ដំបង ដែលជាជំនួយរបស់អង្គការ UNDP៕