ភ្នំពេញៈ កម្ពុជាបានស្នើឱ្យអាស៊ាន និងបណ្តាប្រទេសនៅលើពិភពលោកទាំងមូល ចាំបាច់ត្រូវយកចិត្តទុកដាក់ លើអន្តរកាលថាមពល ដែលជាកិច្ចការគន្លឹះមួយ ក្នុងការជំរុញការស្តារ និងអភិវឌ្ឍន៍សង្គម-សេដ្ឋកិច្ចឡើងវិញ ប្រកបដោយចីរភាព និងភាពរឹងមាំ។
លោកនាយករដ្ឋមន្ត្រី ហ៊ុន សែន បានថ្លែងបើកនៅក្នុងកិច្ចប្រជុំរដ្ឋមន្ត្រីថាមពលអាស៊ានលើកទី៤០ កិច្ចប្រជុំពាក់ព័ន្ធ និងវេទិកាធុរកិច្ចថាមពលអាស៊ានឆ្នាំ ២០២២ ក្រោមមូលបទ «បង្កើនល្បឿនអន្តរកាលថាមពល៖ ការស្តារសេដ្ឋកិច្ចឡើងវិញ និងកំណើនប្រកបដោយចីរភាព» នៅថ្ងៃទី ១៥ ខែកញ្ញា ឆ្នាំ ២០២២ នេះថា ក្នុងនាមជាប្រធាននៅក្នុងឆ្នាំ ២០២២ នេះ កម្ពុជានឹងបន្តចូលរួមចំណែកបង្កើតគំនិតផ្តួចផ្តើមថ្មីៗ និងជំរុញការចូលរួមបន្ថែមលើរាល់សកម្មភាព និងគម្រោងអន្តរកាលថាមពលក្នុងតំបន់ប្រកបដោយប្រសិទ្ធភាពខ្ពស់បំផុត។
បើយោងតាមលោកនាយករដ្ឋមន្ត្រី គំនិតផ្តួចផ្តើមចំនួន ៤ រួមមាន ការជំរុញការអនុវត្តការតភ្ជាប់ខ្សែបញ្ជូនថាមពលអាស៊ាន និងបំពង់ឧស្ម័នកាត់តាមបណ្តាប្រទេសអាស៊ាន; ការជំរុញការអនុវត្តគោលនយោបាយ ច្បាប់ និងបទប្បញ្ញត្តិថាមពលស្អាត កិច្ចការបរិស្ថាន និងការគ្រប់គ្រងធនធានធម្មជាតិ ឱ្យបានជាអតិបរមា ពង្រឹង និងពង្រីកកិច្ចសហប្រតិបត្តិការអន្តរជាតិ និងការចូលរួមយ៉ាងសកម្ម ដើម្បីសម្រេចឱ្យបាននូវផែនការសកម្មភាពនៃកិច្ចសហប្រតិបត្តិការថាមពលអាស៊ានឆ្នាំ ២០២១-២០២៥ ដូចដែលបានកំណត់។
លោកបានថ្លែងថា៖ «កម្ពុជាបាននិងកំពុងខិតខំប្រឹងប្រែងយ៉ាងសកម្ម ក្នុងការបញ្ចូលប្រភពថាមពលកកើតឡើងវិញ ទៅក្នុងល្បាយនៃប្រភពថាមពលរបស់ខ្លួន។ ជាក់ស្តែង ក្នុងឆ្នាំ ២០២១ កន្លងមកនេះថាមពល ដែលបានមកពីប្រភពថាមពល កកើតឡើងវិញ រួមមានវារីអគ្គិសនី ថាមពលដើរដោយពន្លឺព្រះអាទិត្យ និងថាមពលជីវម៉ាស់ បានកើនឡើងទៅដល់ ៤០ ភាគរយនៃថាមពលសរុបរបស់កម្ពុជា»។
យោងតាមលោកនាយករដ្ឋមន្ត្រី ហ៊ុន សែន បើពិនិត្យមើលតាមទំហំអានុភាពនៃប្រភពថាមពលរបស់កម្ពុជា ចំណែកអានុភាពនៃប្រភពថាមពលកកើតឡើងវិញ គឺមានរហូតដល់ ៥៥ ភាគរយនៃអានុភាពដំឡើងសរុប។
លោកបានគូសបញ្ជាក់ថា៖ «សម្រាប់ទិសដៅទៅមុខកម្ពុជានឹងបន្តជំរុញការយកចិត្តទុកដាក់លើការអភិវឌ្ឍប្រសិទ្ធភាពថាមពល និងថាមពលកកើតឡើងវិញឱ្យបានអតិបរមា និងជាបន្តបន្ទាប់ ទៅតាមលទ្ធភាពទទួលបានរបស់ប្រព័ន្ធផ្គត់ផ្គង់ថាមពលកម្ពុជា ជាមួយនឹងការកាត់បន្ថយការអភិវឌ្ឍគម្រោងប្រភពថាមពលដែលប្រើប្រាស់ឥន្ធនៈហ្វូស៊ីល ដែលមានធ្យូងថ្ម និងប្រេងជាដើម»។
លោកបានគូសបញ្ជាក់ទៀតថា ដើម្បីសម្រេចទិសដៅនេះ កម្ពុជាបាន និងកំពុងសហការជាមួយដៃគូអភិវឌ្ឍន៍នានា ដើម្បីធ្វើការសិក្សា និងរៀបចំផែនការមេអភិវឌ្ឍន៍វិស័យថាមពលរបស់កម្ពុជារហូតដល់ឆ្នាំ ២០៤០ គោលនយោបាយជាតិស្តីពីប្រសិទ្ធភាពថាមពល អំពីផែនទីបង្ហាញផ្លូវស្តីពីការអភិវឌ្ឍអន្តរកាលថាមពលស្អាត ឆ្ពោះទៅអព្យាក្រឹតភាពកាបូន និងគោលនយោបាយអភិវឌ្ឍន៍ថាមពលពន្លឺព្រះអាទិត្យលើដំបូលនៅកម្ពុជា។
លោក ស៊ុយ សែម រដ្ឋមន្ត្រីក្រសួងរ៉ែ និងថាមពល បានមានប្រសាសន៍កាលពីពេលថ្មីៗនេះថា កម្ពុជាបានកំណត់នូវគោលដៅក្នុងការពង្រឹងសន្តិសុខថាមពលនិងការចូលរួមចំណែកសម្រេចឱ្យបានអព្យាក្រឹតភាពកាបូន ជាមួយថ្នាក់ដឹកនាំក្នុងតំបន់ ដោយកម្ពុជាបានសិក្សា និងរៀបចំផែនការមេអភិវឌ្ឍន៍ថាមពលអគ្គិសនីឆ្នាំ ២០២២-២០៤០ ដែលជាផែនការពេញលេញ គ្រប់ជ្រុងជ្រោយ និងមានរយៈពេលវែង ដោយរួមបញ្ចូល ទាំងការព្យាករអំពីកំណើននៃសេចក្ដីត្រូវការអគ្គិសនី ផែនការពង្រីកប្រភពផ្គត់ផ្គង់អគ្គិសនីបន្ថែម និងផែនការសាងសង់ប្រព័ន្ធបញ្ជូន និងចែកចាយអគ្គិសនី។
លោកបានថ្លែងបញ្ជាក់យ៉ាងដូច្នេះថា៖«ចក្ខុវិស័យថាមពលរបស់ប្រទេសកម្ពុជា គឺការផ្គត់ផ្គង់អគ្គិសនីឱ្យបានគ្រប់គ្រាន់ មានតម្លៃសមរម្យ និងអាចទុកចិត្តបាន ដល់អ្នកប្រើប្រាស់គ្រប់ប្រភេទនៅគ្រប់ទីកន្លែងក្នុងប្រទេស»។
កាលពីថ្ងៃទី ២ ខែកញ្ញា សភាពាណិជ្ជកម្មអឺរ៉ុបប្រចាំនៅក្នុងប្រទេសកម្ពុជា បានចេញផ្សាយឯកសារគោលជំហររបស់ខ្លួនស្តីអំពីថាមពលកកើតឡើងវិញនៅប្រទេសកម្ពុជាថា កម្ពុជាគួរជ្រើសរើសយកការប្រើប្រាស់ថាមពលកកើតឡើងវិញដើម្បីប្រើប្រាស់ក្នុងវិស័យឧស្សាហកម្ម ថាមពលពន្លឺព្រះអាទិត្យ និងថាមពលកកើតឡើងវិញដែលមានតម្លៃសមរម្យ ប៉ុន្តែពួកគេបានទាមទារឱ្យរដ្ឋាភិបាលដកថ្លៃអានុភាព (Capacity Charge) សំដៅដើម្បីលើកទឹកចិត្តដល់បណ្តាវិនិយោគិនក្នុងវិស័យឧស្សាហកម្មងាកទៅរកការប្រើប្រាស់ថាមពលស្អាត៕