.jpg)
លោក សុខ ចិន្តាសោភោ អគ្គលេខាធិកាក្រុមប្រឹក្សាអភិវឌ្ឍន៍កម្ពុជា ថ្លែងនាពេលកន្លងមក។ រូបថត CDC
ភ្នំពេញៈ រដ្ឋមន្ត្រីក្រុមប្រឹក្សាតំបន់វិនិយោគអាស៊ានតំណាងកម្ពុជា លោក សុខ ចិន្តាសោភោ បានលើកឡើងថា ស្របពេលដែលបណ្តាប្រទេសទាំងឡាយនៅលើពិភពលោក និងក្នុងតំបន់កំពុងប្រឈមនឹងបញ្ហានៃការបន្តរីករាលដាលនៃជំងឺកូវីដ ១៩ បញ្ហាឡើងថ្លៃប្រេងសាំង និងម្ហូបអាហារ និងការឡើងកម្តៅនៃភូមិសាស្ត្រនយោបាយ បណ្តាប្រជាជាតិអាស៊ានគួរតែរួមដៃគ្នាដោះស្រាយបញ្ហាទាំងអស់សំដៅធ្វើយ៉ាងណាឱ្យតំបន់មួយក្លាយជាទិសដៅវិនិយោគប្រកបដោយសក្តានុពល និងបរិយាប័ន្ន។
ការថ្លែងរបស់លោក សុខ ចិន្តាសោភោ ដែលជាអគ្គលេខាធិកាក្រុមប្រឹក្សាអភិវឌ្ឍន៍កម្ពុជាត្រូវបានធ្វើឡើងកាលពីថ្ងៃទី ១៤ ខែកញ្ញា ខណៈដែលលោកបានដឹកនាំកិច្ចប្រជុំក្រុមប្រឹក្សាតំបន់វិនិយោគអាស៊ានលើកទី ២៥ ដែលជាកិច្ចប្រជុំដំណាលគ្នានឹងកិច្ចប្រជុំរដ្ឋមន្ត្រីសេដ្ឋកិច្ច-អាស៊ានលើកទី ៥៤ ដែលបាននិងកំពុងប្រព្រឹត្តទៅនៅខេត្តសៀមរាប។ ក្នុងនោះបណ្តារដ្ឋមន្ត្រីក្រុមប្រឹក្សាវិនិយោគអាស៊ានបានកត់សម្គាល់ពីវឌ្ឍនភាពនៃការពិភាក្សាស្តីពីការធ្វើឱ្យប្រសើរឡើងនូវបរិយាកាសវិនិយោគនៅក្នុងតំបន់អាស៊ាន ដើម្បីធ្វើឱ្យតំបន់នេះបន្តក្លាយជាគោលដៅវិនិយោគ និងមូលដ្ឋានផលិតកម្មក្នុងតំបន់។
លោកបានថ្លែងថា៖ «អាស៊ានទទួលស្គាល់ថាសេដ្ឋកិច្ចពិភពលោក ក៏ដូចជាតំបន់អាស៊ានកំពុងជួបប្រទះបញ្ហាប្រឈមជាច្រើន ដែលបណ្តាលមកពីការរាតត្បាតនៃជំងឺកូវីដ ១៩, សង្គ្រាមនៅអ៊ុយក្រែន, ភាពតានតឹងភូមិសាស្ត្រនយោបាយ និងការប៉ុនប៉ងញែកពិភពលោកទៅជាប្លុកសេដ្ឋកិច្ចដាច់ដោយឡែក និងការប្រែប្រួលអាកាសធាតុ។ ក្នុងកាលៈទេសៈនេះ អាស៊ានត្រូវរួបរួមគ្នាជាងពេល ណាៗទាំងអស់ ហើយត្រូវបន្តសហការគ្នាដើម្បីដោះស្រាយរាល់បញ្ហាប្រឈមនានា និងបន្តជំរុញ និងទាក់ទាញការវិនិយោគប្រកបដោយនិរន្តរភាព និងបរិយាប័ន្នមកក្នុងតំបន់អាស៊ាន។
លោកនាយករដ្ឋមន្ត្រី ហ៊ុន សែន កាលពីថ្ងៃទី ១២ ខែកញ្ញា ក្នុងពិធីបើកវេទិកាភាពជាអ្នកដឹកនាំ និងភាពជាដៃគូអាស៊ានឆ្នាំ ២០២២ បានគាំទ្រចំពោះការបង្កើតតំបន់សេដ្ឋកិច្ច ឬវិនិយោគបៃតងក្នុងតំបន់អាស៊ាន ក្នុងគោលបំណងផ្លាស់ប្តូរតំបន់នេះឱ្យទៅជាមជ្ឈមណ្ឌលពាណិជ្ជកម្ម និងវិនិយោគប្រកបដោយភាពទាក់ទាញ ជាពិសេសការប្រើប្រាស់ថាមពលស្អាត និងបៃតង។
លោក ថោង ម៉េងដាវីដ អ្នកស្រាវជ្រាវនៅមជ្ឈមណ្ឌលមេគង្គសម្រាប់ការសិក្សាយុទ្ធសាស្ត្រនៃវិទ្យាស្ថានចក្ខុវិស័យអាស៊ីបានស្វាគមន៍ជាមួយនឹងផែនការបង្កើតតំបន់សេដ្ឋកិច្ច ឬវិនិយោគបៃតង នឹងក្លាយជាគំនិតផ្តួចផ្តើមដ៏សំខាន់មួយសម្រាប់ប្រទេសកម្ពុជា និងតំបន់។
លោកបានបញ្ជាក់ថា៖ «ការបង្កើតច្បាប់វិនិយោគថ្មីរបស់កម្ពុជានាពេលថ្មីៗនេះនឹងពង្រឹងភាពជឿជាក់របស់កម្ពុជាបន្ថែមទៀត ដើម្បីក្លាយជាមជ្ឈមណ្ឌលវិនិយោគក្នុងតំបន់ថ្មីមួយ ដែលអាចផ្តល់ជូនវិនិយោគិនក្នុងតំបន់ និងពិភពលោកនូវបរិយាកាសធុរកិច្ចប្រកបដោយតម្លាភាព មិត្តភាព និងគួរឱ្យទុកចិត្ត»។
បើយោងតាមរបាយការណ៍ស្តីពីការអង្កេតការវិនិយោគអាស៊ានឆ្នាំ ២០២២ ដែលត្រូវ បានចងក្រងដោយសន្និសីទអង្គការសហប្រជាជាតិ សម្រាប់ពាណិជ្ជកម្ម និងការអភិវឌ្ឍហៅកាត់ថា «UNCTAD» ដែលបានដាក់បង្ហាញនៅក្នុងកិច្ចប្រជុំក្រុមប្រឹក្សាតំបន់វិនិយោគអាស៊ានលើកទី ២៥ បានបង្ហាញឱ្យឃើញពីការកើនឡើងវិញគួរឱ្យកត់សម្គាល់នូវរំហូរទុនវិនិយោគមកក្នុងតំបន់អាស៊ាននៅឆ្នាំ ២០២១ មានចំនួនប្រមាណ ១៧៤ ពាន់លានដុល្លារសហរដ្ឋអាមេរិក ដែលស្មើនឹងរំហូរទុនវិនិយោគនៅឆ្នាំ ២០១៩ មុនពេលតំបន់ទាំងមូលទទួលរងនូវឥទ្ធិពលពីការរីករាលដាលនៃជំងឺកូវីដ ១៩៕
