.jpg)
រូបភាព ការិយាល័យអភិវឌ្ឍន៍សេដ្ឋកិច្ច និងពាណិជ្ជកម្មហុងកុង ផេក
ហុងកុងគ្រោងជំរុញកិច្ចសហប្រតិបត្តិការលើវិស័យពាណិជ្ជកម្មកាន់តែខ្លាំងក្លាជាមួយកម្ពុជា ដោយសារការខិតខំប្រឹងប្រែងរបស់រដ្ឋាភិបាលចិនក្នុងការបង្កើនឱកាស ការវិនិយោគទុនដែលធ្វើឲ្យតំបន់ស្វយ័តហុងកុងនឹងក្លាយជាដៃគូពាណិជ្ជកម្មសំខាន់របស់កម្ពុជានាពេលខាងមុខ។
លោក Algernon Yau អគ្គលេខាធិការនៃការិយាល័យអភិវឌ្ឍន៍សេដ្ឋកិច្ច និងពាណិជ្ជកម្មហុងកុង បានលើកឡើងនៅថ្ងៃទី ១៨ ខែកញ្ញា ឆ្នាំ ២០២២ នាអំឡុងដំណើរទស្សនកិច្ចរបស់លោកនៅកម្ពុជាថា ហុងកុងបានត្រៀមខ្លួនរួចជាស្រេច ដើម្បីពង្រីក និងពង្រឹងកិច្ចសហប្រតិបត្តិការពាណិជ្ជកម្មជាមួយកម្ពុជា បន្ទាប់ពីតំបន់រដ្ឋបាលពិសេសមួយនេះត្រូវបានរដ្ឋាភិបាលចិនដាក់បញ្ចូលក្នុងយុទ្ធសាស្ត្រអភិវឌ្ឍន៍ទាំងក្របខ័ណ្ឌតំបន់ស្វយ័តពិសេស និងគំនិតផ្តួចផ្តើមខ្សែក្រវាត់ និងផ្លូវ។
អគ្គលេខាធិការនៃការិយាល័យអភិវឌ្ឍន៍សេដ្ឋកិច្ច និងពាណិជ្ជកម្មហុងកុងរូបនេះអះអាងថា ហុងកុងប្រាកដនឹងក្លាយទៅជាដៃគូពាណិជ្ជកម្មដ៏សំខាន់របស់កម្ពុជានៅថ្ងៃមុខជាក់ជាមិនខាន ក៏ព្រោះរដ្ឋបាលហុងកុងក៏ដូចជារដ្ឋបាលកណ្តាលទីក្រុងប៉េកាំងខិតខំបង្កើនឱកាសវិនិយោគនានាទាំងតំបន់ដីគោក និងដីកោះ។
លោក Algernon Yau បានគូសបញ្ជាក់ពីមូលហេតុនានាដែលជាកត្តាអំណោយផលដល់ភាពជាដៃគូសម្រាប់កម្ពុជា-ហុងកុង រួមមាន ទម្រង់សេដ្ឋកិច្ចទីផ្សារសេរី ប្រព័ន្ធពន្ធសាមញ្ញ និងមានតម្លៃ បណ្តាញហេដ្ឋារចនាសម្ព័ន្ធ បរិយាកាសធុរកិច្ចអន្តរជាតិ និងជាពិសេសកិច្ចព្រមព្រៀងពាណិជ្ជកម្មសេរីជាមួយបណ្តាប្រទេសតំបន់អាស៊ាន។
នារាជធានីភ្នំពេញនៅក្នុងពិធីអបអរសាទរខួប ២៥ ឆ្នាំដែលកោះហុងកុងបានវិលមកស្ថិតក្រោមការគ្រប់គ្រងរបស់ចិនក្រោយរបបអាណានិគមអង់គ្លេស ដែលមានអ្នកចូលរួមប្រមាណជាង ៤០០ នាក់ព្រមទាំងវត្តមានឯកអគ្គរដ្ឋទូតចិនប្រចាំកម្ពុជា លោក Wang Wentian ផងនោះ លោក Algernon Yau បានថ្លែងសុន្ទរកថាដូច្នេះថា៖ «ក្រោមការប្រឹងប្រែង ជ្រោមជ្រែងពីរដ្ឋបាលកណ្តាលជាមួយនឹងគោលនយោបាយប្រទេសមួយ ប្រព័ន្ធគ្រប់គ្រង ២ ហុងកុងបានកែប្រែខ្លួនទៅជាទីក្រុងលំដាប់ពិភពលោកនារយៈកាល ២៥ ឆ្នាំចុងក្រោយនេះ »។
លោកបានថ្លែងបន្ថែមថា៖ «យើងបានត្រៀមខ្លួនរួចជាស្រេច ដើម្បីធ្វើការជាមួយដៃគូក្នុងតំបន់របស់យើង រួមទាំងកម្ពុជាផង ដើម្បីចាប់យកឱកាសអាជីវកម្មដែលមិនធ្លាប់មានពីមុនមក »។
នាអំឡុងដំណើរទស្សនកិច្ច ៤ ថ្ងៃនៅកម្ពុជារបស់អគ្គលេខាធិការនៃការិយាល័យអភិវឌ្ឍន៍សេដ្ឋកិច្ច និងពាណិជ្ជកម្មហុងកុង លោក Algernon Yau បានជួបពិភាក្សាជាមួយសមាសភាគីអាស៊ាននានា ដើម្បីជំរុញវត្តមានរបស់ហុងកុងក្នុងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) ផងដែរ។
ទោះបីស្ថិតក្នុងវិបត្តិកូវីដ ១៩ក្តី កាលពីឆ្នាំ ២០២១ កន្លងទៅទំនាក់ទំនងពាណិជ្ជកម្មទ្វេភាគីកម្ពុជា-ហុងកុង បានកើនឡើងក្នុងរង្វង់ ៨% គិតជាទឹកប្រាក់ទំហំប្រមាណ ១,២ ពាន់លានដុល្លារ។ នេះបើតាមការបញ្ជាក់ពីការិយាល័យអភិវឌ្ឍន៍សេដ្ឋកិច្ច និងពាណិជ្ជកម្ម ហុងកុង។ តាមទិន្នន័យនេះ ហុងកុងឈរនៅលំដាប់ទី ១១ ជាប្រទេសដៃគូពាណិជ្ជកម្មសំខាន់របស់កម្ពុជា។ នេះបើយោងតាមស្ថិតិរបស់អគ្គនាយកដ្ឋានគយ និងរដ្ឋាករកម្ពុជា៕
