ភ្នំពេញៈ ខណៈរាជរដ្ឋាភិបាលកម្ពុជាកំណត់យកឆ្នាំ ២០២២ ជាឆ្នាំដំបូងនៃការងើបឡើងវិញវិស័យទេសចរណ៍ពីវិបត្តិដែលបណ្តាលមកពីការរីករាលដាលជំងឺកូវីដ ១៩ លោកនាយករដ្ឋមន្ត្រី ហ៊ុន សែន បានលើកឡើងអនុសាសន៍សំខាន់ៗចំនួន ៥ ដែលនឹងរួមចំណែកនៅក្នុងការលើកកម្ពស់វិស័យទេសចរណ៍នៅកម្ពុជាឱ្យឆាប់មានភាពល្អប្រសើរឡើងវិញ។
ថ្លែងក្នុងសារលិខិតដែលចុះហត្ថលេខាកាលពីថ្ងៃទី ១៩ ខែកញ្ញា ដើម្បីចូលរួមអបអរសាទរទិវាទេសចរណ៍ពិភពលោកឆ្នាំ ២០២២ ដែលនឹងធ្វើឡើងក្រោមប្រធានបទ «ការគិតគូរឡើងវិញពីទេសចរណ៍» (Rethinking Tourism) នៅថ្ងៃទី ២៧ កញ្ញា ខាងមុខ លោក ហ៊ុន សែន បានលើកឡើងថា ក្នុងនាមរាជរដ្ឋាភិបាលលោកមានក្តីសោមនស្សរីករាយក្រៃលែងក្នុងការចូលរួមជាមួយបងប្អូនជនរួមជាតិ ក៏ដូចជាប្រជាជាតិទាំងអស់នៅលើពិភពលោក ដើម្បីអបអរសាទរទិវាទេសចរណ៍ពិភពលោក ឆ្នាំ ២០២២ ក្រោមប្រធានបទ «ការគិតគូរឡើងវិញពីទេសចរណ៍» ដែលប្រព្រឹត្តទៅនៅថ្ងៃទី ២៧ ខែកញ្ញា ជារៀងរាល់ឆ្នាំ។
លោកបន្តថា ប្រធានបទឆ្នាំនេះពិតជាឆ្លើយតបនឹងសភាពការណ៍ទេសចរណ៍សកលលោក តំបន់ និងកម្ពុជាដែលបាននិងកំពុងប្រឈមនឹងឧបសគ្គស្មុគស្មាញប្រទាក់ក្រឡាគ្នាជាច្រើនដូចជា ការបន្តអូសបន្លាយនៃជំងឺកូវីដ ១៩, បញ្ហាសង្គ្រាមនៅអ៊ុយក្រែន, ការកើនឡើងការបែងចែកប្លុក និងប្រព័ន្ធពហុប៉ូល សង្គ្រាមពាណិជ្ជកម្ម និងបច្ចេកវិទ្យា និងការប្រែប្រួលអាកាសធាតុ ជាដើម។ កត្តាទាំងនេះបានធ្វើឱ្យអត្រាអតិផរណាកើនឡើងយ៉ាងគំហុក, បន្ទច់បង្អាក់ខ្សែចង្វាក់តម្លៃ និងផលិតភាពសកល, និងជាពិសេសធ្វើឱ្យសម្ទុះការងើបឡើងវិញនៃសេដ្ឋកិច្ចសកលលោក និងតំបន់មានការថមថយគួរឱ្យកត់សម្គាល់ ដែលជាបច្ច័យអវិជ្ជមានទៅដល់សម្ទុះកំណើនភ្ញៀវទេសចរអន្តរជាតិផងដែរ។
លោកបន្តថា បច្ចុប្បន្នវិស័យទេសចរណ៍បានក្លាយជាវិស័យអាទិភាពមួយដែលចូលរួមក្នុងការជំរុញកំណើនសេដ្ឋកិច្ចជាតិឱ្យកាន់តែរីកចម្រើន។ ដើម្បីឱ្យការអភិវឌ្ឍវិស័យនេះមានភាពរឹងមាំ គឺទាមទារឱ្យមានការគិតគូរឱ្យបានគ្រប់ជ្រុងជ្រោយទៅលើបញ្ហាមួយចំនួនដូចជា ការជំរុញការធ្វើពិពិធកម្ម គំនិតច្នៃប្រឌិត នវានុវត្តន៍ ដើម្បីធានាភាពប្រកួតប្រជែងនៃវិស័យទេសចរណ៍ក្នុងកម្រិតតំបន់ និងសកលលោក។
លោកបានបញ្ជាក់ថា៖ «តាមរយៈបញ្ហាប្រឈមទាំងអស់នេះ កម្ពុជាក៏អាចដកស្រង់នូវមេរៀន និងបទពិសោធ ដើម្បីជាកាលានុវត្តភាពក្នុងការស្តារ និងលើកស្ទួយវិស័យទេសចរណ៍ ប្រកបដោយភាពធន់នឹងវិបត្តិកាន់តែប្រសើរជាងមុន និងជាធាតុចូលដ៏សំខាន់ក្នុងការគិតគូរធ្វើការអភិវឌ្ឍ និងកែទម្រង់ស៊ីជម្រៅ ចំពោះអនាគតរបស់វិស័យទេសចរណ៍សម្រាប់ទាំងអស់គ្នា»។
អនុសាសន៍ ៥ ដែលលោកនាយករដ្ឋមន្ត្រី ហ៊ុន សែន លើកឡើងដើម្បីស្តារវិស័យទេសចរណ៍មានដូចជា ការជំរុញពិពិធកម្មការអភិវឌ្ឍផលិតផល និងគោលដៅទេសចរណ៍ប្រកបទៅដោយគុណភាព សុវត្ថិភាពភាពទាក់ទាញ គំនិតច្នៃប្រឌិត និងនវានុវត្តន៍ ព្រមទាំងជំរុញពិពិធកម្មការផ្សព្វផ្សាយ តាមគ្រប់រូបភាព, ជំរុញការកសាងផែនការរួមគ្នា ការប្រើប្រាស់រួមគ្នា និងអភិបាលកិច្ចស៊ីចង្វាក់រួមគ្នាដោយឈរនៅលើអភិក្រម «ពីក្រោមឡើងលើ» តាមគោលដៅទេសចរណ៍អាទិភាព, និងការផ្តល់អាទិភាពដល់ការជំរុញឌីជីថលូបនីយកម្មក្នុងដំណើរការអភិវឌ្ឍវិស័យទេសចរណ៍កម្ពុជា ដើម្បីពង្រឹងភាពធន់ ចីរភាព គុណភាព និងឧត្តមភាពប្រកួតប្រជែង។
ចំណែកអនុសាសន៍ ២ ទៀត គឺការពង្រឹងជំនាញដែលមានស្រាប់ និងការបណ្តុះបណ្តាលជំនាញបន្ថែម ដើម្បីផ្តល់លទ្ធភាពឱ្យកម្លាំងពលកម្មនៅក្នុងវិស័យទេសចរណ៍មានសមត្ថភាព និងលទ្ធភាពគ្រប់គ្រាន់ក្នុងការបត់បែនតាមនិន្នាការទេសចរណ៍, និងការបន្តពង្រឹងកិច្ចសហប្រតិបត្តិការទេសចរណ៍ក្នុងក្របខ័ណ្ឌទ្វេភាគី និងពហុភាគី រួមមាន កិច្ចសហប្រតិបត្តិការទេសចរណ៍ក្នុងក្របខ័ណ្ឌអាស៊ាន (ASEAN), អេកម៉ិក (ACMECS), CLMV (កម្ពុជា ឡាវ មីយ៉ាន់ម៉ា វៀតណាម), ក្នុងក្របខ័ណ្ឌកិច្ចសហប្រតិបត្តិការមេគង្គ ក៏ដូចជាកិច្ចសហប្រតិបត្តិការជាមួយអង្គការទេសចរណ៍ពិភពលោក (UNWTO) និងសហគមន៍ទេសចរណ៍អន្តរជាតិនានា។
ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា លោក ធួន ស៊ីណាន បានប្រាប់ភ្នំពេញ-ប៉ុស្តិ៍ក្នុងថ្ងៃទី ២២ ខែកញ្ញាថា វិស័យទេសចរណ៍កម្ពុជាកំពុងស្ថិតក្នុងដំណាក់កាលចាប់ផ្តើមងើបឡើងវិញពីវិបត្តិជាង ២ ឆ្នាំដោយវត្តមាននៃជំងឺកូវីដ ១៩។ បច្ចុប្បន្នទោះបីមានភ្ញៀវបរទេសមួយចំនួនបានចូលមកកម្ពុជាវិញជាបណ្តើរៗ ប៉ុន្តែភ្ញៀវទាំងនោះ គឺភាគច្រើនមកពីប្រទេសជិតខាងតែប៉ុណ្ណោះ។ លោកបន្តថា វិស័យទេសចរណ៍ គឺមានទំនាក់ទំនងនឹងវិស័យជាច្រើន ពិសេសបញ្ហាភូមិសាស្ត្រនយោបាយសកល ដែលកំពុងកើតមានវិបត្តិជាបន្តបន្ទាប់។
លោកបានអះអាងថា៖ «ការកំណត់អនុសាសន៍ថ្មីៗរបស់ថ្នាក់ដឹកនាំរាជរដ្ឋាភិបាលកម្ពុជានឹងក្លាយជាចំណែកមួយក្នុងការជួយទ្រទ្រង់វិស័យទេសចរណ៍នៅប្រទេសកម្ពុជាឱ្យឆាប់មានភាពល្អប្រសើរឡើងវិញ ១ កម្រិត»៕