ភ្នំពេញៈ មន្ត្រីរដ្ឋាភិបាល អ្នកជំនួញ និងអ្នកសេដ្ឋកិច្ច សុទ្ធតែអះអាងថា ការនាំចេញទំនិញពីកម្ពុជាទៅទីផ្សារប្រទេសកូរ៉េខាងត្បូង នឹងហក់ឡើង នៅពេលកិច្ចព្រមព្រៀងពាណិជ្ជកម្មសេរីទ្វេភាគីកម្ពុជា-កូរ៉េ (CKFTA) ចូលជាធរមាន បន្ទាប់ពីរដ្ឋសភាប្រទេសកូរ៉េ បានផ្តល់សច្ចាប័នលើកិច្ចព្រមព្រៀងនេះរួចរាល់។
រដ្ឋសភានៃប្រទេសកូរ៉េ កាលពីថ្ងៃទី ២៧ ខែកញ្ញា ឆ្នាំ ២០២២ បានផ្តល់សច្ចាប័នលើកិច្ចព្រមព្រៀងពាណិជ្ជកម្មសេរីកម្ពុជា-កូរ៉េហើយ ដែលធ្វើឱ្យកិច្ចព្រមព្រៀងនេះនឹងអាចចូលជាធរមាននៅ ៦០ ថ្ងៃ បន្ទាប់ពីរដ្ឋាភិបាលកូរ៉េជូនដំណឹងផ្លូវការមករដ្ឋាភិបាលកម្ពុជា។
កិច្ចព្រមព្រៀងពាណិជ្ជកម្មសេរីកម្ពុជាកូរ៉េ (CKFTA) គឺជាកិច្ចព្រមព្រៀងពាណិជ្ជកម្មទ្វេភាគីទី២ របស់កម្ពុជា បន្ទាប់ពីកិច្ចព្រមព្រៀងពាណិជ្ជកម្មសេរីកម្ពុជា-ចិន (CCFTA) ដែលចូលជាធរមានកាលពីខែមករា ឆ្នាំ ២០២២ ដំណាលគ្នាជាមួយកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP)។ RCEP ជាកិច្ចព្រមព្រៀងពាណិជ្ជកម្មមួយដែលមានការចូលរួមពីប្រទេសចំនួន ១៥ ក្នុងនោះរួមមានប្រទេសទាំង ១០ ជាសមាជិកអាស៊ាន និងដៃគូពាណិជ្ជកម្មចំនួន ៥ ទៀតរួមមាន អូស្ត្រាលី ចិន ជប៉ុន កូរ៉េខាងត្បូង និងនូវែលសេឡង់។
អ្នកនាំពាក្យក្រសួងពាណិជ្ជកម្ម លោក ប៉ែន សុវិជាតិ បានប្រាប់ ភ្នំពេញ ប៉ុស្តិ៍ នាថ្ងៃទី ២៨ ខែកញ្ញាថា បន្ទាប់ពីរដ្ឋសភាកូរ៉េផ្តល់សច្ចាប័នលើកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ រួចរាល់ រដ្ឋាភិបាលកូរ៉េនឹងជូនដំណឹងដល់កម្ពុជា។ រយៈពេល ៦០ ថ្ងៃបន្ទាប់ពីការជូនដំណឹងនេះ កិច្ចព្រមព្រៀងនេះនឹងត្រូវចូលជាធរមាន។
លោកបន្តថា តាមរយៈកិច្ចព្រមព្រៀងនេះទំនិញកម្ពុជាជាច្រើនមុខនឹងអាចនៅចេញទៅប្រទេសកូរ៉េក្រោមលក្ខខណ្ឌពិសេស (ពន្ធគយ) ដែលផលិតផលទាំងនោះមានដូចជា ទំនិញកសិផល, កសិផលកែច្នៃ, សម្លៀកបំពាក់, វាយនភណ្ឌ, ស្បែកជើង, សម្ភារធ្វើដំណើរ, គ្រឿងបង្គុំ, គ្រឿងបន្លាស់, និងទំនិញឧស្សាហកម្មមួយចំនួនទៀត។ លោកបន្តថា កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ នឹងមានលក្ខណពិសេសលើសពីកិច្ចព្រមព្រៀង RCEP ដែលកម្ពុជា និងកូរ៉េ ជាសមាជិក។
លោកថ្លែងថា៖ «ជាការពិតណាស់ កូរ៉េក៏ជាហត្ថលេខីរបស់កិច្ចព្រមព្រៀង RCEP ដែរ ប៉ុន្តែបន្ទាត់ពន្ធ, អត្រាពន្ធ, និងលក្ខខណ្ឌមួយចំនួនរបស់កូរ៉េផ្តល់ឱ្យកម្ពុជាក្រោមកិច្ចព្រមព្រៀង RCEP នៅមានកម្រិត មិនទាន់ទូលាយដូចការផ្តល់ឱ្យនៅក្រោមកិច្ចព្រមព្រៀង CKFTA ទេ។ ដូច្នេះ CKFTA នឹងបំពេញបន្ថែមនូវអ្វីដែលយើងមិនទាន់ទទួលបានក្រោម RCEP ហើយនាំឱ្យទីផ្សារកូរ៉េដែលយើងទទួលបានកាន់តែធំទូលាយថែមទៀត»។
អនុប្រធានសភាពាណិជ្ជកម្មកម្ពុជា លោក លឹម ហេង បានសាទរចំពោះការផ្តល់សច្ចាប័នរបស់រដ្ឋសភាកូរ៉េនៅលើកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ ដោយលោកបានចាត់ទុកជាវឌ្ឍនភាពថ្មីមួយទៀតដែលនឹងផ្តល់ផលប្រយោជន៍យ៉ាងច្រើន សម្រាប់កំណើនសេដ្ឋកិច្ចប្រទេសទាំង ២។
លោកបន្តថា កិច្ចព្រមព្រៀងលក្ខណៈទ្វេភាគីនេះនឹងផ្តល់ភាពអនុគ្រោះច្រើនលើសពីអ្វីដែលមានក្នុងកិច្ចព្រមព្រៀង RCEP ដែលប្រទេសទាំង ២ ជាសមាជិក។ រាល់កិច្ចព្រមព្រៀងពាណិជ្ជកម្ម គឺសុទ្ធតែមានផ្តល់ផលចំណេញទៅឱ្យប្រទេសហត្ថលេខី ពិសេសកិច្ចព្រមព្រៀងដែលមានលក្ខណៈទ្វេភាគី។
លោកបញ្ជាក់ថា៖ «នៅពេលកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ ចូលជាធរមាន វានឹងផ្តល់ផលវិជ្ជមានជាច្រើនសម្រាប់កម្ពុជា ពិសេសការលើកលែងពន្ធនាំចេញផលិតផលកសិកម្មពីកម្ពុជាស្ទើរ ១០០ ភាគរយទៅទីផ្សារកូរ៉េ។ ការរួចពន្ធដ៏ច្រើននេះនឹងក្លាយជាកាលានុវត្តន៍ភាព សម្រាប់កម្ពុជាក្នុងការទាក់ទាញវិនិយោគិនក្រៅប្រទេស ពិសេសកូរ៉េឱ្យមកបណ្តាក់ទុននៅកម្ពុជា ដើម្បីផលិត និងកែច្នៃវត្ថុធាតុដើម មុននឹងនាំទៅទីផ្សារកូរ៉េវិញ»។
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោក គី សេរីវឌ្ឍន៍ បាននិយាយថា ទោះបីកម្ពុជា និងកូរ៉េ សុទ្ធតែជាប្រទេសសមាជិកកិច្ចព្រមព្រៀង RCEP ប៉ុន្តែកិច្ចព្រមព្រៀងពាណិជ្ជកម្មលក្ខណៈទ្វេភាគីនឹងមានលក្ខណពិសេស ហើយក៏នឹងបង្កើនភាពទាក់ទាញអ្នកវិនិយោគកូរ៉េឱ្យចូលមកបណ្តាក់ទុននៅកម្ពុជាកាន់តែច្រើន។
លោកបន្ថែមថា៖ «CKFTA គឺជាការធ្វើពិពិធកម្មទីផ្សារថ្មី សម្រាប់កម្ពុជាក្នុងការបើកទីផ្សារអន្តរជាតិរបស់ខ្លួនឱ្យមានទំហំកាន់តែធំជាងមុន»។
CKFTA ត្រូវបានចុះហត្ថលេខារវាងលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជាជាមួយលោក YEO Han-Koo រដ្ឋមន្ត្រីក្រសួងពាណិជ្ជកម្មប្រទេសកូរ៉េកាលពីថ្ងៃទី ២៦ ខែតុលា ឆ្នាំ ២០២១ តាមរយៈអនឡាញ។
លោក សុវិជាតិ ធ្លាប់បានប្រាប់ថា កិច្ចព្រមព្រៀង CKFTA នឹងផ្តល់ការរួចពន្ធដល់ទំនិញកម្ពុជាជាង ១ ម៉ឺនមុខ ទៅកាន់ប្រទេសកូរ៉េខាងត្បូង។
ទិន្នន័យពីអគ្គនាយកដ្ឋានគយ និងរដ្ឋាករកម្ពុជាបង្ហាញថា ចាប់ពីខែមករាដល់ខែសីហា ឆ្នាំ ២០២២ ពាណិជ្ជកម្មទ្វេភាគីកម្ពុជា និងកូរ៉េមានតម្លៃសរុប ៥៤៩,៩៣ លានដុល្លារ កើនឡើង ៦,៤ ភាគរយបើធៀបរយៈពេលដូចគ្នាឆ្នាំ ២០២១។ ក្នុងនោះកម្ពុជានាំទំនិញទៅកូរ៉េ ១៥៦,៦២ លានដុល្លារ កើន ២១ ភាគរយ និងការនាំចូលទំនិញពីកូរ៉េមានចំនួន ៣៩៣,៣១ លានដុល្លារ កើន ១,៥ ភាគរយ៕