តម្លៃហាងឆេងមាសនៅតែបន្តធ្លាក់ចុះជាបន្តបន្ទាប់ ដោយសារតែឥទ្ធិពលប្រាក់ដុល្លារ។ ការដំឡើងអត្រាការប្រាក់ជាប់ៗគ្នានៅក្នុងឆ្នាំ ២០២២ នេះធ្វើឱ្យតម្លៃរូបិយប័ណ្ណដុល្លារសហរដ្ឋអាមេរិកនៅតែឈរនៅលេខ ១ ក្នុងការជួញដូរឧបករណ៍និស្សន្ទ។ តម្លៃមាស និងទង់ដែងបានធ្លាក់ចុះបន្ថែមទៀត កាលពីថ្ងៃចន្ទ ខណៈដែលប្រាក់ដុល្លារបានឡើងដល់កម្រិតខ្ពស់ថ្មីរយៈពេល ២០ ឆ្នាំ ស្របពេលមានការភ័យខ្លាចនៃការដំឡើងអត្រាការប្រាក់ និងការធ្លាក់ចុះសេដ្ឋកិច្ច។
ទីផ្សារលោហធាតុបានធ្លាក់ចុះកាលពីសប្តាហ៍មុន បន្ទាប់ពីធនាគារកណ្តាលសហរដ្ឋអាមេរិកបានដំឡើងអត្រាការប្រាក់ និងបានបង្ហាញពីការលំបាកដែលអាចកើតមាន ក្នុងការប្រយុទ្ធប្រឆាំងនឹងអតិផរណា ដែលកំពុងតែកើតឡើងខ្ពស់។ សូចនាករសេដ្ឋកិច្ចមកពីតំបន់ចាយប្រាក់អឺរ៉ូ និងចក្រភពអង់គ្លេសក៏បានបង្ហាញពីការធ្លាក់ចុះយ៉ាងច្បាស់លាស់នៅក្នុងសកម្មភាពអាជីវកម្ម ដោយសារការភ័យខ្លាចនៃការធ្លាក់ចុះសេដ្ឋកិច្ច ដែលធ្វើឱ្យប៉ះពាល់ដល់តម្រូវការទីផ្សារលោហៈ។ តម្លៃមាសសម្រាប់កិច្ចសន្យាអនាគតបានធ្លាក់ចុះ ១៩,៥១ ដុល្លារ ឬ ១,២% ដែលធ្វើឱ្យតម្លៃមាសធ្លាក់មកនៅត្រឹម ១ ៦២៤,០៦ ដុល្លារក្នុង ១ អោនស៍។
សម្រាប់ការវិភាគជួញដូរក្នុងសប្តាហ៍នេះ លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៃក្រុមហ៊ុន ភីភី លីង ស៊ីឃ្យួរឹធី បានណែនាំដល់វិនិយោគិនឱ្យធ្វើការជួញដូរតាមទំនោរទីផ្សារ។ ទោះជាយ៉ាងណាក៏ដោយ លោកក៏បានបញ្ជាក់ថា អ្នកជួញដូរក៏អាចរង់ចាំទិញមាស នៅពេលដែលមានតម្លៃចន្លោះពី ១ ៦១០ ទៅ ១ ៦២០ ដុល្លារ ដោយកំណត់មុខងារទាញយកចំណេញនៅតម្លៃ ១ ៦៤៥ ដុល្លារ និងមុខងារបញ្ឈប់ហានិភ័យនៅតម្លៃ ១ ៥៩៧ ដុល្លារ៕