The Phnom Penh Post Search

Search form




Logo of Phnom Penh Post newspaper Phnom Penh Post - ចំណូល​ពន្ធ​ផ្ទៃក្នុង​សម្រេច​បាន​ជាង ៩៥% ​នៃ​ផែនការ​ច្បាប់​ថវិកា

ចំណូល​ពន្ធ​ផ្ទៃក្នុង​សម្រេច​បាន​ជាង ៩៥% ​នៃ​ផែនការ​ច្បាប់​ថវិកា

Content image - Phnom Penh Post
លោក គង់ វិបុល ឡើង​ថ្លែង​ក្នុង​វេទិកា​ស្តីពី​ពន្ធដារ​សភា​ពាណិជ្ជកម្ម​អាមេរិក​។ សហការី

ចំណូល​ពន្ធ​ផ្ទៃក្នុង​សម្រេច​បាន​ជាង ៩៥% ​នៃ​ផែនការ​ច្បាប់​ថវិកា

ភ្នំពេញៈ ការប្រមូល​ចំណូល​ពន្ធ​របស់​អគ្គនាយកដ្ឋាន​ពន្ធដារ​នា​រយៈពេល​ជិត ៣ ​ត្រីមាស​នៃ​ឆ្នាំ​ ២០២២ សម្រេច​បាន​ប្រមាណ​ជាង ២,៦៨​ ពាន់​លាន​ដុល្លារ ដែល​ស្មើនឹង​ជាង ៩៥ ​ភាគរយ​នៃ​ផែនការ​ច្បាប់​ថវិកាជាតិ​ សម្រាប់​ការគ្រប់គ្រង​ឆ្នាំ​ ២០២២ ដែល​កំណត់ឱ្យ​អគ្គនាយកដ្ឋាន​ពន្ធដារ​ប្រមូល​ចំណូល​ឱ្យបាន​ប្រមាណ ២,៨ ​ពាន់​លាន​ដុល្លារ​។

អគ្គនាយក​នៃ​អគ្គនាយកដ្ឋាន​ពន្ធដារ​លោក គង់ វិបុល បាន​ថ្លែង​ក្នុង​ជំនួប​ជាមួយ​វិស័យ​ឯកជន ធុរជន ពាណិជ្ជករ នៃ​វេទិកា​ស្តីពី​ពន្ធដារ​សភាពាណិជ្ជកម្ម​អាមេរិក​ (Amcham Tax Forum) ​ដែល​រៀបចំ​នៅ​សណ្ឋាគារ Raffles Le Royal កាលពី​ថ្ងៃទី​ ២៨ ខែកញ្ញា​ថា គិតពី​ដើមឆ្នាំ​ ២០២២ រហូតមក​ដល់​ពេល​នេះ​ចំណូល​ពន្ធ​ផ្ទៃក្នុង​សម្រេច​បាន​ជាង ២ ៦៨០ ​លាន​ដុល្លារ​ស្មើនឹង ៩៥,០៧ ​ភាគរយ​នៃ​ផែនការ​ច្បាប់​ស្តីពី​ហិរញ្ញវត្ថុ​ សម្រាប់​ការគ្រប់គ្រង​ឆ្នាំ​ ២០២២ ខណៈ​នៅសល់ ៣ ​ខែ​ទៀត​ សម្រាប់​ការងារ​គ្រប់គ្រង​ចំណូល​ផ្ទៃក្នុង​បន្តទៀត​។

លោក​បន្តថា ចំណូល​ផ្ទៃក្នុង​នៅ​កម្ពុជា​កំពុង​កើនឡើង​ជា​បន្តបន្ទាប់ តាមរយៈ​ការធ្វើ​កំណែទម្រង់​ពន្ធដារ​ជា​ដំណើរការ​ឥត​ឈប់ឈរ ដោយ​អគ្គនាយកដ្ឋាន​កំពុង​បន្ត​កែលម្អ​នូវ​គោលនយោបាយ​ចាំបាច់​នានា និង​ធ្វើ​ទំនើបកម្ម​រដ្ឋបាល​សារពើពន្ធ​ក្នុង​ន័យ​បង្ក​ភាពងាយស្រួល សមធម៌ មាន​ភាពត្រឹមត្រូវ​ក្នុង​ការបង់ពន្ធ បង្កើន​ការប្រើប្រាស់​ប្រព័ន្ធ​បច្ចេកវិទ្យា​ព័ត៌មាន ពិសេស​តាមរយៈ​ការដាក់​ឱ្យ​ប្រើប្រាស់​ប្រព័ន្ធ E-Filing, TOI E-Payment និង​ប្រព័ន្ធ​អនឡាញ​ផ្សេងទៀត​ ដោយ​មាន​ការគាំទ្រ E-Tax Service សម្រាប់​ដោះស្រាយ​បញ្ហា​ប្រឈម​នានា​នៅពេល​ប្រើប្រាស់​ សម្រាប់​មន្ត្រី និង​អ្នក​ជាប់ពន្ធ​ទាំងឡាយ​។

លោក​ពន្យល់​ថា ការធ្វើ​បច្ចុប្បន្នភាព​ក្រុមហ៊ុន​កំពុង​មាន​ប្រតិបត្តិការ​អាជីវកម្ម គឺមាន​ភាពចាំបាច់ ព្រោះ​ក្រុមហ៊ុន​ខ្លះ​ពី​មុន​ជា​ក្រុមហ៊ុន​ដែលមាន​សកម្មភាព​អាជីវកម្ម​តិចតួច និង​មាន​ចំណូល​ទាប ប៉ុន្តែ​ពេលនេះ​ក្លាយ​ជា​ក្រុមហ៊ុន​ធំ និង​មាន​ប្រាក់ចំណូល​អាជីវកម្ម​ច្រើន​។ នេះ​ជា​ភារកិច្ច​មួយ​ដែល​អគ្គនាយកដ្ឋាន​ពន្ធដារ​បាននិង​កំពុង​ធ្វើជា​ប្រចាំ​។

លោក​ប្រាប់ទៀត​ថា ក្នុង​អំឡុងពេល​ការរីករាលដាល​កូវីដ ​១៩ អគ្គនាយកដ្ឋាន​ពន្ធដារ​មិន​បាន​បង្កើន​តម្លៃ​ពន្ធ ឬ​បង្កើត​ពន្ធ​ថ្មី​ទេ គឺ​មាន​តែ​ផ្ដល់​ការលើក​ទឹកចិត្ដ​បន្ថែម​។

លោក​ថ្លែងថា​៖ «​កំណើន​ប្រាក់​ចំណូល​ពន្ធ​ដែល​យើង​ទទួល​បាន​នៅពេល​នេះ គឺ​មិនមែន​យើង​ដំឡើង​ពន្ធ​ទេ ប៉ុន្តែ​យើង​បាន​ពង្រីក​វិសាលភាព ក៏ដូចជា​ពង្រីក​តម្លាភាព​នៃ​ការប្រមូល​ពន្ធ​របស់​យើង​ឱ្យ​បាន​ល្អប្រសើរ​ជាង​មុន​»​។

បើ​យោង​តាម​លោក គង់ វិបុល ក្នុង​ឆ្នាំ ​២០២២ ​នេះ អគ្គនាយកដ្ឋាន​ពន្ធដារ​រំពឹងថា ប្រមូល​ចំណូល​ពន្ធ​បាន​លើស​ពី​ផែនការ​ប្រមាណ ១០-១៥ ​ភាគរយ​។

លោក​ប្រាប់​ទៀត​ថា ការកើនឡើង​នៃ​ការប្រមូល​ចំណូល​ពន្ធដារ គឺ​ដោយសារ​តែ​ការកែទម្រង់​ប្រព័ន្ធ​ពន្ធដារ​លើ​គ្រប់​វិស័យ ដោយ​រាប់​ចាប់​តាំងពី​ការផ្តល់​សេវា​ដល់​អ្នកជាប់​ពន្ធ​, ការផ្តល់​សេវា​ចុះបញ្ជី​, ការធ្វើ​សវនកម្ម​, ការគ្រប់គ្រង​បំណុល​, ការដោះស្រាយ​បញ្ហា​នានា​ដែល​ធ្វើ​ឱ្យ​អ្នក​ជាប់ពន្ធ​មាន​ភាព​ងាយស្រួល​ក្នុង​ការបង់ពន្ធ ជាដើម​។

អ្នកជំនាញ​សេដ្ឋកិច្ច​នៃ​រាជបណ្ឌិត្យ​សភា​កម្ពុជា លោក ហុង វណ្ណៈ បាន​ប្រាប់​ ភ្នំពេញ ​ប៉ុស្តិ៍​ នៅ​ថ្ងៃទី ​២៩ ខែកញ្ញា​ថា ចំណូល​សារពើពន្ធ​បាន​ដើរតួនាទី​យ៉ាង​សំខាន់​សម្រាប់​រដ្ឋាភិបាល​គ្រប់​ប្រទេស​លើ​ពិភពលោក ព្រោះ​ចំណូល​នេះ គឺ​សម្រាប់​រ៉ាប់រង​មួយផ្នែក​នៃ​ការចំណាយ​របស់​រដ្ឋ និង​ការវិនិយោគ​សាធារណៈ​ជាដើម​។ សម្រាប់​ប្រទេស​កម្ពុជា​ដែល​កំពុង​ទទួល​បាន​កំណើន​ការ​ចូលមក​បណ្តាក់ទុន​ជា​បន្តបន្ទាប់ គឺ​ប្រាកដ​ណាស់​ចំណូល​ពន្ធដារ​នឹង​បន្ត​កើនឡើង​ថែមទៀត​។ លោក​បន្ថែមថា ម្យ៉ាងទៀត​ការខិតខំ​ពង្រឹង​អភិបាលកិច្ច និង​ប្រព័ន្ធ​បច្ចេកវិទ្យា​ក្នុង​ការបង់ពន្ធ ក៏​រួមចំណែក​ធ្វើ​ឱ្យ​ប្រជាពលរដ្ឋ​ទៅ​បំពេញ​កាតព្វកិច្ច​បង់ពន្ធ​កាន់តែ​ច្រើន​ផងដែរ​។

លោក​អះអាង​ថា​៖ «​តាមរយៈ​អ្វីដែល​កម្ពុជា​កំពុង​មាន​នៅពេល​នេះ ខ្ញុំ​ជឿថា ការប្រមូល​ចំណូល​របស់​អគ្គនាយកដ្ឋាន​ពន្ធដារ​នឹង​មាន​ចំនួន​កាន់តែ​ច្រើន ជាពិសេស​ពី​ចំណូល​ពន្ធ​មួយចំនួន​ដែល​រដ្ឋាភិបាល​កំពុង​លើកលែង​នៅពេល​នេះ​ (​ទេសចរណ៍​) អាច​នឹង​ត្រូវ​ប្រមូលយក​វិញ​នៅពេល​រដ្ឋ​ពិនិត្យ​ឃើញ​ថា វិស័យនេះ​មាន​ដំណើរការ​ឡើង​វិញ​»​។

យោងតាម​អគ្គនាយកដ្ឋាន​ពន្ធដារ​រយៈពេល ៣ ​ត្រីមាស ឆ្នាំ​ ២០២១ ការប្រមូល​ចំណូល​សម្រេច​បាន​ប្រមាណ ២ ១១១,០៩ ​លាន​ដុល្លារ ស្មើ ៩៤,១២ ​ភាគរយ​នៃ​ច្បាប់​ផែនការ​ច្បាប់​ហិរញ្ញវត្ថុ​ សម្រាប់​ការគ្រប់គ្រង​ឆ្នាំ​ ២០២១៕

អត្ថបទគួរចាប់អារម្មណ៍