.jpg)
នាវា MT Strovolos ដែលត្រូវគេប្រើសម្រាប់ដឹកប្រេងចេញពីកម្ពុជា។ រូបថត ហ្វេសប៊ុក
ភ្នំពេញៈ កម្ពុជារំពឹងនឹងបានទទួលចំណូលពីការលក់ប្រេង ៣០ ម៉ឺនបារ៉ែល ដែលនាវា MT Strovolos បានលួចយកទៅកន្លងមកនៅក្នុងរង្វង់ថ្ងៃទី ១១ ខែតុលា ប្រមាណពី ១០-២០ លានដុល្លារ បន្ទាប់ពីគ្រប់ភាគីទាំងអស់បានយល់ព្រមដោះស្រាយករណីនេះចប់សព្វគ្រប់តាំងពីថ្ងៃទី ១០ ខែកញ្ញា។ នេះបើតាមមន្ត្រីជាន់ខ្ពស់រាជរដ្ឋាភិបាល។
រដ្ឋមន្ត្រីក្រសួងរ៉ែ និងថាមពលលោក ស៊ុយ សែម ក្នុងកម្មវិធីមួយនៅសាលាខេត្តកែប កាលពីថ្ងៃទី ២៨ ខែកញ្ញា បានត្រូវទូរទស្សន៍ក្នុងស្រុក CNC ដកស្រង់សម្ដីថា ប្រេងឆៅចំនួនជិត ៣០ ម៉ឺនបារ៉ែល ឬស្មើជិត ៤៧ លានលីត្រដែលត្រូវគេលួចដឹកចេញពីកម្ពុជាតាមរយៈកប៉ាល់ MT Strovolos ដែលក្រុមហ៊ុន Kris Energy បានជួលសម្រាប់ស្តុកប្រេង កាលពីពាក់កណ្ដាលឆ្នាំមុន ពេលនេះត្រូវបានចរចាគ្នារួចរាល់ហើយ ដោយកម្ពុជាទទួលបាន ៧០ ភាគរយនៃតម្លៃប្រេងសរុប។
លោកបានថ្លែងថា៖ «ក្រោយពីយើងបានប្តឹងក្រុមហ៊ុនដែលបានដឹកប្រេងយើងចេញដោយបានរត់ចូលប្រទេសជាច្រើននៅក្នុងតំបន់អាស៊ី ប៉ុន្តែយើងបានព្យាយាមស្វះស្វែងរកការអន្តរាគមន៍នានាតាមរយៈផ្លូវច្បាប់ ទោះបីជាមានភាពស្មុគស្មាញក៏ដោយ ប៉ុន្តែប៉ុន្មានថ្ងៃមុននេះយើងបានសម្រេចបញ្ចប់រឿងនេះ ដោយធ្វើការចរចាគ្នាលក់ប្រេងចែកគ្នា»។
លោកបានបន្ថែមថា៖ «ឥឡូវព្រមព្រៀងគ្នាលក់ប្រេងចែកគ្នា។ យើងបាន ៧០ ភាគរយនៃថ្លៃលក់ប្រេងក្នុងកប៉ាល់ហ្នឹង បានប្រហែលពី ១០-២០ លាន (ដុល្លារ)»។ យើងយកមកជាចំណែកចូលថវិការដ្ឋ»។
លោក ជៀប សួរ អគ្គនាយកនៃអគ្គនាយកដ្ឋានប្រេងកាតនៃក្រសួងរ៉ែ និងថាមពល បានប្រាប់ ភ្នំពេញ ប៉ុស្តិ៍ នៅថ្ងៃទី ២៩ ខែកញ្ញាថា ប្រេងឆៅរបស់កម្ពុជា ដែលបាត់ជិត ៣០ ម៉ឺនបារ៉ែលនោះបានផ្ទេរចេញពីកប៉ាល់ MT Strovolos ទៅកប៉ាល់អ្នកទិញរួចរាល់ហើយ ប៉ុន្ដែការទូទាត់មានរយៈពេល ៣០ ថ្ងៃ ក្រោយពីការផ្ទេរនេះ។
លោកបញ្ជាក់ថា៖ «ភាគីទាំងអស់បានយល់ព្រមដោះស្រាយបញ្ហារួមគ្នារួចហើយ ដោយយើងបានលក់ប្រេងអស់ហើយ ដែរមានន័យថា ប្រេងនៅលើកប៉ាល់ MT Strovolos ទៅកប៉ាល់អ្នកទិញរួចអស់ហើយតាំងពីថ្ងៃទី ១០ ខែកញ្ញាមក។ សម្រាប់ការទូទាត់ប្រាក់នឹងធ្វើឡើង ៣០ ថ្ងៃ ក្រោយពីការទិញនេះ អ៊ីចឹងយើងរំពឹងថា នឹងទទួលបានប្រាក់នៅរង្វង់ថ្ងៃទី ១១ ខែតុលា»។
រដ្ឋលេខាធិការក្រសួងរ៉ែ និងថាមពល លោក ម៉េង ស័ក្តិធារ៉ា បានថ្លែងក្នុងសន្និសីទសារព័ត៌មានកាលពីថ្ងៃទី ៨ សីហាថា កម្ពុជារំពឹងទទួលបានចំណូលជាង ២៥ លានដុល្លារស្មើនឹង ៧០ ភាគរយនៃប្រេងឆៅសរុបជិត ៣០ ម៉ឺនបារ៉ែលនេះ បើក្នុងករណីប្រេងឆៅឡើងថ្លៃជាង ៩០ ដុល្លារក្នុង ១ បារ៉ែល។
ការបូមប្រេងរបស់ក្រុមហ៊ុន KrisEnergy ប្រមាណជិត ៣០ ម៉ឺនបារ៉ែលនេះ គឺស្មើនឹងជាងពាក់កណ្តាលនៃធនធានប្រេងដែលមាននៅក្នុងអណ្តូងទាំង ៥ ដោយនៅសល់ប្រហែលជិត ២០ ម៉ឺនបារ៉ែលទៀត ដែលមិនទាន់បានបូម។ សព្វថ្ងៃក្រុមការងារក្រសួង និងក្រុមហ៊ុន EnerCam Resources Co. Ltd. (EnerCam) កំពុងសិក្សាពីលទ្ធភាពក្នុងការវិនិយោគបូមប្រេងនៅប្លុក A ឡើងវិញ៕
