ភ្នំពេញ៖ ប្រធាន​សមាគម​អ្នក​ចិញ្ចឹម​សត្វ​កម្ពុជា បង្ហាញ​ការសាទរ ដែល​ក្រសួង​កសិកម្ម រុក្ខាប្រមាញ់ និង​នេសាទ​មាន​ផែនការ​នាំចេញ​សត្វ​ចិញ្ចឹម ដូចជា គោ មាន់ ជ្រូក និង​ផលិតផល​សត្វ​មួយចំនួន​ទៀត​ទៅ​ប្រទេស​ចិន ដើម្បី​កុំឱ្យ​មាន​ការកកស្ទះ​នៅក្នុង​ស្រុក​។

អគ្គនាយកដ្ឋាន​សុខភាព​សត្វ និង​ផលិតកម្ម​សត្វ​នៃ​ក្រសួង​កសិកម្ម រុក្ខាប្រមាញ់ និង​នេសាទ​កាលពី​ថ្ងៃទី​ ២៣ កញ្ញា បាន​ចេញ​លិខិត​អំពាវនាវ​ដល់​អ្នក​វិនិយោគ​ក្នុង​វិស័យ​ចិញ្ចឹមសត្វ និង​ផលិតផល​សត្វ ដែល​មាន​បំណង​នាំចេញ​សត្វ និង​ផលិតផល​សត្វ​ដូចជា ជ្រូក​រស់ គោរស់ សាច់ជ្រូក សាច់គោ សាច់មាន់ ស្បែក​គោ ស្បែក​ជ្រូក និង​ផលិតផល​ផ្សេងទៀត អាច​ដាក់​ពាក្យ​ស្នើសុំ​មក​អគ្គនាយកដ្ឋាន​សុខភាព​សត្វ និង​ផលិតកម្ម​សត្វ ដោយ​បញ្ជាក់​ពី​ប្រភេទ​សត្វ និង​ផលិតផល​សត្វ​ឱ្យ​បាន​ច្បាស់លាស់​ទៅតាម​ប្រភេទ​នីមួយៗ​ចាប់ពី​ថ្ងៃ​ជូនដំណឹង​នេះ​តទៅ ដើម្បី​ជំរុញ​ការនាំចេញ​នៅ​ពេល​អនាគត​។

សេចក្តី​ជូនដំណឹង​នេះ​បាន​បញ្ជាក់​ថា ការដាក់​ពាក្យ​ស្នើសុំ​នេះ ដើម្បី​ឱ្យ​អគ្គនាយកដ្ឋាន​មាន​លទ្ធភាព​រៀបចំ​បែបបទ​ពាក់ព័ន្ធ​ផ្សេងៗ​សុំ​ការអនុញ្ញាត​ពី​ភាគី​ចិន ដើម្បី​ចុះមក​ត្រួតពិនិត្យ និង​វាយតម្លៃ​ហានិភ័យ និង​ឈាន​ទៅរក​ការរៀបចំ​ពិធីសារ​អនាម័យ និង​កិច្ចព្រមព្រៀង​ក្នុង​ការនាំចេញ​។

លោក ស្រ៊ុន ពៅ ប្រធាន​សមាគម​អ្នក​ចិញ្ចឹមសត្វ​កម្ពុជា​បាន​មាន​ប្រសាសន៍​នៅ​ថ្ងៃទី​ ២៩ កញ្ញា​នេះ​ថា សមាគម​មាន​ការត្រេកអរ​យ៉ាង​ក្រៃលែង ដែល​ក្រសួង​កសិកម្ម​បាន​ខិតខំ​ជួយ​រក​ទីផ្សារ​ សម្រាប់​នាំចេញ​ទៅ​ក្រៅ​ប្រទេស ស្រប​ពេល​ការផ្គត់ផ្គង់​សាច់​នៅ​កម្ពុជា​មាន​លក្ខណៈ​គ្រប់គ្រាន់ ទាំង​សាច់មាន់ និង​សាច់ជ្រូក​។

លោក​ថ្លែង​ដូច្នេះ​ថា​៖ «​ការកកស្ទះ​សត្វ​ចិញ្ចឹម​នៅ​កម្ពុជា​មាន​សម្ទុះ​កើនឡើង ដូច្នេះ​ក្រសួង​កសិកម្ម​បាន​យកចិត្ត​ទុកដាក់​ខ្ពស់ ដើម្បី​រក​ទីផ្សារ​ជូន​កសិករ​។ ក្នុង​អំឡុងពេល​បុណ្យ​ភ្ជុំ​ការផ្គត់ផ្គង់​សត្វ មិន​មាន​ការខ្វះខាត​នោះទេ​រហូត​ដល់​លើសសល់​មកដល់​សព្វថ្ងៃនេះ​។ ដូច្នេះ​បាន​ក្រសួង​រក​ទីផ្សារ​នាំ​ចេញ​ទៅ​ក្រៅ នោះ​នឹង​ជួយ​ផ្តល់​ការងារ​ដល់​កសិករ​យើង​»​។

ទោះ​ជា​យ៉ាងណា​ក៏ដោយ លោក​បន្តថា ការនាំចេញ​ផលិតផល​កសិកម្ម​ទៅ​ក្រៅ​ប្រទេស មិនមាន​ភាពងាយស្រួល​នោះ​ទេ ព្រោះ​អ្នក​ចិញ្ចឹម​ត្រូវ​អនុវត្ត​ការចិញ្ចឹម​សត្វ​តាម​ស្តង់ដា​នាំចេញ ហើយ​ការអនុវត្ត​តាម​ស្តង់ដា​នាំចេញ​នេះ​មាន​តែ​កសិដ្ឋាន​ចិញ្ចឹម​ខ្នាត​ធំៗ និង​ក្រុមហ៊ុន​ប៉ុណ្ណោះ ដែល​អាច​ធ្វើការ​នាំចេញ​បាន​។

លោក​ថ្លែង​ដូច្នេះ​ថា​៖ «​មានតែ​ក្រុមហ៊ុន និង​កសិដ្ឋាន​ខ្នាត​ធំៗ​ទេ ដែល​គាត់​អាច​នាំចេញ​បាន ហើយ​នៅពេល​ដែល​គាត់​អាច​នាំចេញ​បាន​មួយ​ចំនួន​ទៅ វា​ក៏​ល្អ​ដល់​កសិករ​ខ្នាតតូច​ដែរ​។ បើ​កសិដ្ឋាន​ខ្នាត​ធំ​នាំចេញ​ទៅ​បាន កសិករ​ខ្នាតតូច ក៏​អាច​រក​ទីផ្សារ​នៅក្នុង​ស្រុក​ងាយស្រួល​ផងដែរ យើង​រំពឹង​ថា វា​នឹងមាន​ទីផ្សារ​ល្អ បើសិន​ជា​អាច​នាំចេញ​បាន​»​។

លោក ហេង យ័ន ម្ចាស់​កសិដ្ឋាន​ចិញ្ចឹម​មាន់​នៅ​ខេត្ត​តាកែវ​បាន​លើក​ឡើង​ដែរ​ថា នីតិវិធី​ការនាំចេញ​សត្វ​ទៅ​ក្រៅ​ប្រទេស​មាន​បែបបទ​ត្រូវ​អនុវត្ត​ច្រើន ដែល​កសិករ​ខ្នាតតូច មិន​អាច​នាំចេញ​បាន​នោះទេ ព្រោះ​ពួកគាត់​គ្មាន​ចំណេះដឹង​ទាក់ទង​នឹង​ស្តង់ដា​អនាម័យ និង​ច្បាប់​នាំចេញ​ផ្សេងៗ​។

លោក​ថ្លែង​ដូច្នេះ​ថា​៖ «​មុន​នាំចេញ​ត្រូវ​ពិនិត្យ​សុខភាព​សត្វ​មុន​ដល់​ពេល​អ៊ីចឹង​ទៅ​វែងឆ្ងាយ​ណាស់ ហើយ​កសិករ​គ្មាន​ក្រុម​បច្ចេកទេស​ក្នុង​ដៃ​ខ្លួនឯង​នោះទេ​។ បើ​ក្រុមហ៊ុន​គេ​មាន​ផ្នែក​គេ​គ្រប់សព្វ គេ​មាន​ពេទ្យ គេ​មាន​អ្នក​ទីផ្សារ​»​។

លោក​បន្តថា បច្ចុប្បន្ន​មាន់​ចិញ្ចឹម​ក្នុង​ស្រុក​មាន​តម្លៃ​ជិត​ ៥ ​ពាន់​រៀល ក្នុង​ ១ ​គីឡូក្រាម ដែល​តម្លៃ​នេះ​មិន​អាច​ធ្វើឱ្យ​កសិករ​ខ្នាតតូច​ចំណេញ​នោះទេ ប៉ុន្តែ​បើ​សម្រាប់​កសិដ្ឋាន​ធំៗ​គេ​ទទួល​បាន​ចំណេញ ដោយសារ​កសិដ្ឋាន​អាច​ផលិត​ចំណី និង​បង្កាត់​ពូជ​ដោយ​ខ្លួនឯង​។

គួរបញ្ជាក់​ថា វិស័យ​ចិញ្ចឹមសត្វ​នៅ​កម្ពុជា​មាន​ការរីកចម្រើន​គួរឱ្យ​កត់សម្គាល់ ការចិញ្ចឹម​សត្វ​ជា​លក្ខណៈ​ពាណិជ្ជកម្ម​បាន​កើនឡើង ៣៩% នៅ​ឆ្នាំ​ ២០២១ ដោយ​មាន​ការវិនិយោគ​ក្នុង​ទ្រង់ទ្រាយ​ពី​មធ្យម​ទៅ​ធំ ជាពិសេស​ការចិញ្ចឹម​ជ្រូក​ដែល​អាច​ផ្គត់ផ្គង់​តម្រូវការ​ក្នុងស្រុក និង​អាច​នាំ​ចេញ​ទៅ​ក្រៅ​ប្រទេស​បាន​។

បើតាម លោក វេង សាខុន រដ្ឋមន្ត្រី​ក្រសួង​កសិកម្ម រុក្ខាប្រមាញ់ និង​នេសាទ គិត​ត្រឹម​ខែ​មិថុនា ឆ្នាំ ​២០២២ កម្ពុជា​មាន​សមត្ថភាព​ផ្គត់ផ្គង់​ត្រីសាច់​បាន​កើន​ឡើងដល់ ៩២ ​ភាគរយ ខណៈ​ការផ្គត់ផ្គង់​សាច់ជ្រូក​អាច​ដំណើរការ​បាន​ ១០០ ​ភាគរយ​បាន​ជាង​ ៩ ខែ កន្លង​មក​ហើយ ៕