ភ្នំពេញៈ វិទ្យាស្ថានបណ្តុះបណ្តាលពាណិជ្ជកម្ម និងស្រាវជ្រាវ (TTRI) នៃក្រសួងពាណិជ្ជកម្ម និងក្រុមហ៊ុន Team Synergy ដែលមានមូលដ្ឋាននៅក្នុងប្រទេសម៉ាឡេស៊ីបានចុះអនុស្សរណៈនៃការយោគយល់គ្នា (MoU) ដើម្បីជួយលើកកម្ពស់សមត្ថភាពនៃការបណ្តុះបណ្តាលផ្នែកសេដ្ឋកិច្ច-ពាណិជ្ជកម្ម នៅកម្ពុជាឱ្យកាន់តែប្រសើរ។
ពិធីចុះអនុស្សរណៈនៃការយោគយល់គ្នានេះត្រូវបានធ្វើឡើងកាលពីព្រឹកថ្ងៃទី ២៩ ខែកញ្ញា ឆ្នាំ ២០២២ ក្រោមអធិបតីភាព លោកស្រី ចម និម្មល រដ្ឋលេខាធិការក្រសួងពាណិជ្ជកម្ម ព្រមទាំងមានការចូលរួមពីថ្នាក់ដឹកនាំ និងមន្ត្រីនៃក្រសួងពាណិជ្ជកម្ម វិទ្យាស្ថាន TTRI ព្រមទាំងប្រធាន និងសហការីក្រុមហ៊ុន Team Synergy ជាច្រើនរូប។
ថ្លែងក្នុងពិធីចុះ MoU នោះ លោកស្រី ចម និម្មល បានឱ្យដឹងថា អនុស្សរណៈនៃការយោគយល់គ្នានេះពិតជាមានសារៈសំខាន់សម្រាប់វិទ្យាស្ថាន ដើម្បីពង្រឹងតួនាទីស្នូលឱ្យកាន់តែមានឧត្តមភាពខ្ពស់ សំដៅបន្តលើកកម្ពស់ចំណេះដឹងផ្នែកសេដ្ឋកិច្ច-ពាណិជ្ជកម្ម និងនីតិវិធីផ្សេងៗទាក់ទងនឹងពាណិជ្ជកម្ម ដែលបម្រើដល់គោលនយោបាយជំរុញពាណិជ្ជកម្ម និងវិនិយោគ ដែលដាក់ចេញដោយរាជរដ្ឋាភិបាលកម្ពុជា។
លោកស្រីលើកឡើងទៀតថា បន្ទាប់ពីកិច្ចប្រជុំថ្នាក់រដ្ឋមន្ត្រីសេដ្ឋកិច្ចអាស៊ាន (AEM) និងកិច្ចប្រជុំពាក់ព័ន្ធកាលពីថ្ងៃទី ១១-១៨ ខែកញ្ញាថ្មីៗនេះ វិទ្យាស្ថានបានរៀបចំ និងដាក់ចេញបន្ថែមនូវកម្មវិធីថ្មីៗ ដើម្បីជំរុញការបណ្តុះបណ្តាល និងការផ្សព្វផ្សាយចំណេះដឹង និងវិធានបច្ចេកទេសពាក់ព័ន្ធវិស័យសេដ្ឋកិច្ច-ពាណិជ្ជកម្មជូនដល់សាធារណជន សិស្ស-និស្សិត និងបណ្តាវិស័យឯកជន ដែលជាតួអង្គគោលដៅក្នុងការលើកកម្ពស់កំណើនសេដ្ឋកិច្ច-ពាណិជ្ជកម្មកម្ពុជា និងជំរុញល្បឿននៃសមាហរណកម្មសេដ្ឋកិច្ចកម្ពុជាក្នុងតំបន់អាស៊ាន និងសកល។
លោកស្រីបានបញ្ជាក់ថា៖ «អនុស្សរណៈនៃការយោគយល់គ្នានេះនឹងឈរលើគោលការណ៍នៃកិច្ចសហប្រតិបត្តិការស៊ីជម្រៅ ដែលក្នុងនោះក្រុមហ៊ុននឹងផ្តល់ការគាំទ្រដល់ការបណ្តុះបណ្តាលទាំងរយៈពេលខ្លី មធ្យម និងវែង និងការបណ្តុះបណ្តាលថ្នាក់បរិញ្ញាបត្រជាន់ខ្ពស់ផ្នែកពាណិជ្ជកម្មជូនដល់បុគ្គលិកសហគ្រាសធុនតូច និងមធ្យមកម្ពុជា និងបុគ្គលសាធារណៈផ្សេងទៀត ដែលមានគុណវុឌ្ឍិគ្រប់គ្រាន់ក្នុងការទទួលបានអាហារូបករណ៍លើការបណ្តុះបណ្តាលទាំងនេះ»។
យោងតាមក្រសួងពាណិជ្ជកម្ម វិទ្យាស្ថាន TTRI និងក្រុមហ៊ុន Team Synergy Co., Ltd ក៏បានប្តេជ្ញាធ្វើការរួមគ្នាលើកិច្ចការសិក្សាស្រាវជ្រាវ ការរៀបចំសិក្ខាសាលា ការរៀបចំទស្សនកិច្ចសិក្សា ការផ្លាស់ប្តូរសំណៅឯកសារមេរៀន និងការបោះពុម្ពផ្សាយនានា និងការផ្តល់ការប្រឹក្សាយោបល់លើបញ្ហាផ្សេងៗ ក្រោមក្របខ័ណ្ឌនៃអនុស្សរណៈនេះ។
Team Synergy Co., Ltd គឺជាក្រុមហ៊ុនដែលបានទទួលសិទ្ធិក្នុងការបណ្តុះបណ្តាលកម្មវិធីសិក្សាពីសាកលវិទ្យាល័យម៉ាឡេស៊ី សម្រាប់កម្មវិធីរយៈពេលខ្លី មធ្យម និងវែង និងការបណ្តុះបណ្តាលថ្នាក់បរិញ្ញាបត្រជាន់ខ្ពស់ផ្នែកពាណិជ្ជកម្ម៕