.jpg)
លោក អ៊ុក ប្រជា ចូលរួមនៅក្នុងវេទិកាធុរកិច្ចអាស៊ានស្តីពី “ភាពជាដៃគូសេដ្ឋកិច្ចគ្រប់ជ្រុងជ្រោយតំបន់” ដែលរៀបចំឡើងដោយសភាពាណិជ្ជកម្មកម្ពុជា និងក្រុមប្រឹក្សាពិគ្រោះយោបល់ធុរកិច្ចអាស៊ាន។ រូបថត ក្រសួងពាណិជ្ជកម្ម
មន្ត្រីជាន់ខ្ពស់នៃក្រសួងពាណិជ្ជកម្ពុជា និយាយថាការទាញប្រយោជន៍ពីកិច្ចព្រមព្រៀង RCEP នឹងជួយធ្វើកំណែទម្រង់ប្រទេសកម្ពុជា ដើម្បីធានាបាននូវប្រសិទ្ធភាពនៅពេលខាងមុខ ខណៈកម្ពុជានឹងអាចចាកចេញពីប្រទេសកម្រិតអភិវឌ្ឍន៍តិចតួចនៅឆ្នាំ ២០២៨ តាមរយៈការបង្កើតក្របខ័ណ្ឌគតិយុត្តទំនើបថ្មី។
នៅថ្ងៃទី២៩ ខែកញ្ញា ឆ្នាំ ២០២២ ក្នុងវេទិកាធុរកិច្ចអាស៊ានស្តីពី «ភាពជាដៃគូសេដ្ឋកិច្ចគ្រប់ជ្រុងជ្រោយតំបន់» តាមប្រព័ន្ធវីដេអូដែលសហការរៀបចំដោយសភាពាណិជ្ជកម្មកម្ពុជា និងក្រុមប្រឹក្សាពិគ្រោះយោបល់ធុរកិច្ចអាស៊ាន លោកអ៊ុក ប្រជា រដ្ឋលេខាធិការក្រសួងពាណិជ្ជកម្ម ដែលតំណាងឱ្យលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានថ្លែងសុន្ទរកថាបើកវេទិកា។
ក្នុងសុន្ទរកថានោះ លោកអ៊ុក ប្រជា អះអាងថា តាមរយៈការទាញប្រយោជន៍ជាអតិបរមានៃពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) នឹងជួយកម្ពុជាឱ្យចាកចេញពីប្រទេសដែលមានកម្រិតអភិវឌ្ឍន៍តិចតួចក្នុងឆ្នាំ ២០២៨ ប្រកបដោយប្រសិទ្ធខ្ពស់ ដោយសារបង្កើតជាក្របខណ្ឌគតិយុត្តទំនើបថ្មី។
ក្នុងន័យនេះ លោកគូសបញ្ជាក់ថា៖ «យើងនឹងអាចបង្កើតជាក្របខ័ណ្ឌគតិយុត្តទំនើបថ្មី ដែលជំរុញការធ្វើកំណែទម្រង់ទាំងផ្នែកហេដ្ឋារចនាសម្ព័ន្ធច្បាប់ គតិយុត្ត និងស្ថាប័ន ដើម្បីធានាស្តង់ដាខ្ពស់របស់កម្ពុជានាពេលខាងមុខ ស្របពេលដែលកម្ពុជា អាចនឹងចាកចេញពីឋានៈប្រទេសអភិវឌ្ឍន៍តិចតួច (LDC) នៅឆ្នាំ ២០២៨ និងគ្រោងប្រែក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ ២០៣០ និងចំណូលកម្រិតខ្ពស់នៅឆ្នាំ ២០៥០»។
គួរបញ្ជាក់ថា កិច្ចព្រមព្រៀង RCEP ជាកិច្ចព្រមព្រៀងពាណិជ្ជកម្មសេរីដ៏ធំបំផុតលើពិភពលោកដែលមានសមាជិកចំនួន ១៥ ប្រទេស រួមមានប្រទេសជាសមាជិកអាស៊ានទាំង ១០ និងប្រទេសដៃគូពាណិជ្ជកម្មសេរីអាស៊ានចំនួន ៥ មានដូចជា អូស្ត្រាលី ជប៉ុន កូរ៉េខាងត្បូង ចិន និងនូវែលសេឡង់ គ្របដណ្តប់ ប្រជាជនប្រមាណ ២,២ ពាន់លាននាក់ ឬស្មើ ៣០% នៃចំនួនប្រជាជនលើពិភពលោក និងមានផលិតផលក្នុងស្រុកសរុបប្រមាណ ២៦,២ ទ្រីលានដុល្លារ ឬ ៣០% នៃផលិតផលក្នុងស្រុកសរុបរបស់ពិភពលោក និងទំហំពាណិជ្ជកម្មចំនួនប្រមាណ ២៨% នៃទំហំពាណិជ្ជកម្មពិភពលោកទាំងមូល។
រដ្ឋលេខាធិការក្រសួងពាណិជ្ជកម្ម បានបន្ថែមថា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) នេះមានសារៈសំខាន់ណាស់ ក្នុងការជំរុញកំណើនសេដ្ឋកិច្ចកម្ពុជា និងការផ្លាស់ប្តូររចនាសម្ព័ន្ធសេដ្ឋកិច្ចកម្ពុជាក្នុងការកសាង និងអភិវឌ្ឍសេដ្ឋកិច្ចតំបន់ ព្រមទាំងក្នុងសកលលោក ហើយវាជាសញ្ញាណនៃការបង្ហាញការគាំទ្រលើប្រព័ន្ធពាណិជ្ជកម្មសេរីពហុភាគី ដែលផ្អែកលើគោលការណ៍ច្បាប់ និងប្រឆាំងនឹងការកើនឡើងនៃនិន្នាការគាំពារនិយម របស់ប្រទេសមហាអំណាចមួយចំនួន ដែលបង្កផលប៉ះពាល់ដល់សេដ្ឋកិច្ចពិភពលោក។
សម្រាប់លោកសេង វណ្ណលី សាស្ត្រាចារ្យទំនាក់ទំនងអន្តរជាតិនិងជាអ្នកតាមដាននយោបាយក្នុងតំបន់ យល់ឃើញថា RCEP នឹងជួយពង្រឹងលំហូរនៃទំនិញ និងសេវាកម្ម ដែលជួយឱ្យប្រទេសជាសមាជិកអាចតភ្ជាប់ទំនាក់ទំនងសេដ្ឋកិច្ចកាន់តែខ្លាំងក្លាឡើងស្របពេល កិច្ចព្រមព្រៀងនេះបានកាត់បន្ថយអត្រាពន្ធរហូត ៩០%។
ស្រដៀងនឹងការលើកឡើងរបស់រដ្ឋលេខាធិការក្រសួងពាណិជ្ជកម្មកម្ពុជាផងដែរ លោកសេង វណ្ណលី ថា RCEP នឹងទប់ស្កាត់នយោបាយគាំពារនិយមរបស់ប្រទេសនានាជាពិសេសសហរដ្ឋអាមេរិក។
សម្រាប់លោក គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជាវិញ គូសបញ្ជាក់ថា RCEP នឹងជួយការនាំចេញកាន់តែទូលាយ ដោយហេតុវាជាកិច្ចព្រមព្រៀងពាណិជ្ជកម្មសេរីដ៏ធំ ដែលអាចជំរុញការវិនិយោគក្នុងស្រុកកាន់តែកើនឡើង ក៏ដូចជាការវិនិយោគពីក្រៅស្រុកផង។ ក្នុងន័យនេះ RCEP អាចចូលរួមចំណែកបង្កើតការងារ បង្កើនប្រាក់ចំណូលក្នុងស្រុកច្រើនជាងមុន ជាកត្តាជំរុញកំណើនសេដ្ឋកិច្ចកម្ពុជា ជួយធានាបាននូវប្រសិទ្ធភាពក្នុងការចាកចេញពីឋានៈប្រទេសអភិវឌ្ឍន៍តិចតួច នៅឆ្នាំ ២០២៨ ខាងមុខនោះ។
អ្នកជំនាញសេដ្ឋកិច្ចរបស់កម្ពុជារូបនេះ សង្កត់ធ្ងន់ផងដែរថា កិច្ចព្រមព្រៀង RCEP នឹងឈានទៅរំលាយនយោបាយគាំពារនិយមរបស់មហាអំណាច ជាពិសេសសហរដ្ឋអាមេរិកដែលបានរៀបយុទ្ធសាស្ត្រ បិទផ្លូវពាណិជ្ជកម្មប្រទេសដៃគូប្រកួតប្រជែងតាំងពីជំនាន់រដ្ឋបាលលោកដូណាល់ ត្រាំ។ «RCEP បានកាត់ផ្តាច់រនាំងគាំពារនិយមនេះ ព្រោះប្រទេសជាសមាជិកដ៏ច្រើនអាចធ្វើពាណិជ្ជកម្មនឹងគ្នាបានដោយសេរី ដែលអាចជំរុញកំណើនទីផ្សារផលិតផលរបស់ប្រទេសជាសមាជិករួមនឹងកម្ពុជាផង»។
គួររំឭកថា កិច្ចព្រមព្រៀងភាពជាដៃគូរគ្រប់ជ្រុងជ្រោយនិងតំបន់ (RCEP) ត្រូវបានបង្កើតឡើងនៅក្នុងកិច្ចប្រជុំកំពូលអាស៊ានកាលពីឆ្នាំ ២០១១ នៅទីក្រុងបាលី ប្រទេសឥណ្ឌូនេស៊ី ដែលបានផ្តើមការចរចាជាផ្លូវការក្នុងអំឡុងពេលកិច្ចប្រជុំកំពូលអាស៊ានក្នុងឆ្នាំ ២០១២ ក្នុងពេលកម្ពុជាធ្វើជាម្ចាស់ផ្ទះប្តូរវេន។ កិច្ចព្រមព្រៀងនេះត្រូវបានចុះហត្ថលេខាជាផ្លូវការនៅថ្ងៃទី ១៥ ខែវិច្ឆិកា ឆ្នាំ ២០២០ ក្នុងកិច្ចប្រជុំកំពូលអាស៊ានតាមប្រព័ន្ធវីដេអូ (Online Conference) ខណៈវៀតណាមធ្វើជាម្ចាស់ផ្ទះ។ មុខទំនិញសំខាន់ៗជាច្រើននៃទំនិញកសិកម្ម កសិកម្មកែច្នៃ និងទំនិញឧស្សាហកម្មនិងត្រូវអនុញ្ញាតឱ្យនាំចូលប្រទេសទាំងនេះដោយត្រូវបានលើកលែងពន្ធជាមធ្យមជាង ៩០% សម្រាប់កម្ពុជា៕
