.jpg)
ភ្ញៀវទេសចរជាតិ-អន្តរជាតិចូលទស្សនាប្រាសាទអង្គរវត្ត នាពេលកន្លងទៅ។ ហុង មិនា
ភ្នំពេញៈ ក្រសួងទេសចរណ៍ប្រកាសដាក់ចេញនូវយុទ្ធសាស្ត្រសំខាន់ៗ ៨ ដើម្បីអនុវត្ត នៅក្នុងគោលបំណងទាក់ទាញចរន្តភ្ញៀវទេសចរអន្តរជាតិឱ្យធ្វើដំណើរមកកម្សាន្តនៅកម្ពុជាប្រមាណ ៧,៥ លាននាក់ត្រឹមឆ្នាំ ២០២៨ ខណៈវិបត្តិនៃការឆ្លងរាលដាលជំងឺកូវីដ ១៩ បានធ្វើឱ្យវិស័យនេះធ្លាក់ចុះស្ទើរដល់សូន្យនារយៈពេល ២ ឆ្នាំពីឆ្នាំ ២០២០-២០២១។ នេះបើយោងតាមក្រសួងទេសចរណ៍។
ឯកសាររបាយការណ៍វឌ្ឍនភាពការងារក្រសួងទេសចរណ៍រយៈពេល ៥ ឆ្នាំ (២០១៨-២០២២) ឱ្យដឹងថា វិស័យទេសចរណ៍កម្ពុជាមានកំណើនគួរជាទីមោទនៈ សម្រាប់រយៈពេលជាង ២០ ឆ្នាំចុងក្រោយ ដោយចំនួនភ្ញៀវទេសចរអន្តរជាតិដែលមានចំនួនប្រមាណ ២៩ ម៉ឺននាក់នៅឆ្នាំ ១៩៩៨ បានកើនដល់ ៦,៦ លាននាក់នៅឆ្នាំ ២០១៩ ក្នុងអត្រាកំណើនមធ្យមប្រចាំឆ្នាំប្រមាណ ២០ ភាគរយ និងទេសចរផ្ទៃក្នុងជាង ១ លាននាក់ នៅឆ្នាំ ១៩៩៨ កើនដល់ ១១,៣ លាននាក់ នៅឆ្នាំ ២០១៩ ក្នុងអត្រាកំណើន ៥ ភាគរយ។ ទោះយ៉ាងណាកំណើននេះត្រូវបានថយចុះយ៉ាងគំហុកចាប់ពីដើមឆ្នាំ ២០២០ ដោយសារតែវិបត្តិកូវីដ ១៩ ដែលមិនត្រឹមតែបង្កផលប៉ះពាល់ដល់វិស័យទេសចរណ៍ប៉ុណ្ណោះទេ ប៉ុន្តែថែមទាំងបាននិងកំពុងបន្តផលប៉ះពាល់អវិជ្ជមានដល់សកម្មភាពសេដ្ឋកិច្ច សង្គម និងវប្បធម៌។
ក្រសួងបានឱ្យដឹងថា៖ «រយៈពេល ៥ ឆ្នាំខាងមុខ (២០២៣-២០២៨) ក្រសួងទេសចរណ៍បានដាក់ចេញគោលនយោបាយ ផែនការ និងយុទ្ធសាស្ត្រធំៗក្នុងការគ្រប់គ្រង និងអភិវឌ្ឍវិស័យទេសចរណ៍ប្រកបដោយប្រសិទ្ធភាព គុណភាព និងនិរន្តរភាព។ កម្ពុជានឹងទាក់ទាញទេសចរអន្តរជាតិឱ្យបានប្រមាណ ៧,៥ លាននាក់ និងទេសចរផ្ទៃក្នុងប្រមាណ ១៦ លាននាក់នៅឆ្នាំ ២០២៨»។
យោងតាមក្រសួងទេសចរណ៍ យុទ្ធសាស្ត្រសំខាន់ៗទាំងនោះមានដូចជា ការអភិវឌ្ឍផលិតផល និងសេវាកម្មទេសចរណ៍ប្រកបដោយនវានុវត្តន៍ និងភាពច្នៃប្រឌិត, ការពង្រឹងគុណភាពសេវាកម្មទេសចរណ៍ឱ្យស្របតាមស្តង់ដា, ការជំរុញការបណ្តុះបណ្តាលជំនាញវិជ្ជាជីវៈទេសចរណ៍ និងជំនាញថ្មីៗបន្ថែម, និងសម្រួលការធ្វើដំណើរ និងដឹកជញ្ជូនទេសចរណ៍ឱ្យមានភាពងាយស្រួល និងសុវត្ថិភាព។ ចំណុចសំខាន់ផ្សេងៗទៀត រួមមាន ការពង្រឹងសមត្ថភាពសិក្សាទីផ្សារ និងផ្សព្វផ្សាយទេសចរណ៍កម្ពុជា, ការជំរុញការប្រើប្រាស់បច្ចេកវិទ្យាថ្មីៗក្នុងវិស័យទេសចរណ៍, ការដាក់ចេញគោលនយោបាយសំខាន់ៗបន្ថែមទៀតដើម្បីជំរុញការអភិវឌ្ឍវិស័យទេសចរណ៍, និងពង្រឹងយន្តការអភិបាលកិច្ចទេសចរណ៍ និងការអភិវឌ្ឍធនធានមនុស្ស។
ក្រសួងបញ្ជាក់ថា៖ «ការអភិវឌ្ឍវិស័យទេសចរណ៍ប្រកបដោយចីរភាព គឺជាគោលនយោបាយសំខាន់របស់រដ្ឋាភិបាល ដើម្បីអភិវឌ្ឍជាតិ និងបម្រើផលប្រយោជន៍ដ៏ឧត្តុង្គឧត្តមរបស់ប្រជាជន»។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជាបានប្រាប់ ភ្នំពេញ ប៉ុស្តិ៍ ក្នុងថ្ងៃទី ២ ខែតុលាថា ផែនការនេះនឹងក្លាយជាកម្លាំងមួយក្នុងការជំរុញឱ្យវិស័យទេសចរណ៍នៅកម្ពុជាត្រូវបានគេទទួលស្គាល់កាន់តែច្រើន។ លោកបញ្ជាក់ថា៖ «ប្រសិនបើការអនុវត្តទៅតាមផែនការខាងលើធ្វើឡើងដោយប្រសិទ្ធភាព គឺប្រាកដជាកម្ពុជាអាចបានទទួលភ្ញៀវទេសចរបរទេសដូចការរំពឹងទុក ឬយ៉ាងហោចណាស់ក៏បាន ៧០ ភាគរយដែរ»។
លោកបន្ថែមថា ទោះយ៉ាងណា ចរន្តនៃការដើរកម្សាន្តរបស់ភ្ញៀវក៏អាស្រ័យលើភូមិសាស្ត្រនយោបាយ និងសេដ្ឋកិច្ចពិភពលោកដែរ ព្រោះបើវិបត្តិ (ជម្លោះ និងការរាតត្បាតជំងឺ) នៅបន្តកើនមាន វានឹងអាចក្លាយជាឧបសគ្គដ៏ធំ ទោះជារដ្ឋាភិបាលខិតខំធ្វើសកម្មភាព និងការផ្សព្វផ្សាយបែបណាក៏ដោយ។
ប្រធានសមាគមទីភ្នាក់ងារទេសចរណ៍កម្ពុជាលោកស្រី ឆាយ ស៊ីវលីន បានប្រាប់ថា ជាមួយនឹងស្ថានភាពចរន្តភ្ញៀវអន្តរជាតិនាពេលបច្ចុប្បន្ន និងការខិតខំរបស់អាជ្ញាធរកម្ពុជា រួមនឹងផ្នែកឯកជន ការកំណត់របស់ក្រសួងនៅក្នុងការទាក់ទាញភ្ញៀវអន្តរជាតិឱ្យបាន ៧,៥ លាននាក់ត្រឹមឆ្នាំ ២០២៨ គឺនឹងអាចសម្រេចបាន។ ជាក់ស្តែង ទោះបីកម្ពុជាទើបបើកទូលាយនៅក្នុងការទទួលភ្ញៀវអន្តរជាតិ (ឆ្នាំ ២០២២) ហើយប្រទេសមួយចំនួន ពិសេសប្រទេសចិននៅមិនទាន់បើកទូលាយ ក៏កម្ពុជាទទួលបានភ្ញៀវអន្តរជាតិប្រមាណ ១ លាននាក់រួចហើយ។
លោកស្រីនិយាយថា៖ «នៅពេលនេះកម្ពុជាចាប់ផ្តើមទទួលកំណើនភ្ញៀវអន្តរជាតិឡើងវិញពីគ្រប់ទិសទី ជាពិសេសប្រទេសជិតខាង ខណៈភ្ញៀវមកពីចិន មុនពេលមានវិបត្តិជំងឺកូវីដ ១៩ គឺមានចំនួនច្រើនជាងគេ»។
ក្នុងរយៈពេល ៨ ខែឆ្នាំ ២០២២ កម្ពុជាទទួលបានភ្ញៀវអន្តរជាតិសរុប ៩៩៨ ២៧២ នាក់ កើនឡើង ៧២០ ភាគរយបើធៀបនឹងរយៈពេលដូចគ្នាឆ្នាំ ២០២១។ នេះបើតាមក្រសួងទេសចរណ៍៕
