.jpg)
កសិករម្នាក់ កំពុងមើលថែដំណាំត្រសក់របស់ខ្លួន។ រូបថត សហការី
សៀមរាប/ក្រចេះ: ខុសពីអ្វីដែលគេតែងតែបានឮអំពីទីផ្សារតូចចង្អៀតសម្រាប់ផលិតផលកសិកម្មក្នុងស្រុក កសិករ ២ រូបបានអះអាងថា ការដាំដុះរបស់ខ្លួនសព្វថ្ងៃ អាចផ្គត់ផ្គង់ទីផ្សារបានតិចតួចណាស់។ បានតិចតួចដោយហេតុថា ផលិតផលកសិកម្មដែលខ្លួនប្រមូលបាន តែងតែត្រូវបានឈ្មួញទិញយកអស់ៗមិនដែលសល់ ហើយជារឿយៗ ឈ្មួញបានសុំឱ្យពួកគាត់បង្កើនការដាំដុះបន្ថែមទៀតដើម្បីបំពេញតម្រូវការទីផ្សារ។
ស្ថិតក្រោមគម្រោងរបស់ Aspire កសិករទាំង ២ រូបដែល ១ រូបរស់នៅក្នុងខេត្តក្រចេះ និង១រូបទៀតនៅខេត្តសៀមរាប បានបង្ហាញនូវការរីករាយក្នុងការបន្តការដាំដុះរបស់ខ្លួនយ៉ាងសកម្ម ដោយសារមានទីផ្សារលក់ចេញស្រាប់ៗ។ លើសពីនោះ តម្រូវការទីផ្សារ និងអ្វីដែលកសិករទាំង ២ រូបផលិតបាន គឺនៅមានគម្លាតឆ្ងាយ។
រស់នៅក្នុងស្រុកសូទ្រនិគម ខេត្តសៀមរាប និងជាម្នាក់ក្នុងចំណោមកសិករទាំង ២ ខាងលើ លោក ឈាវ ហុង បានចាប់ផ្ដើមការដាំដុះរបស់ខ្លួន តាំងតែពីឆ្នាំ ២០០០ មកម្ល៉េះ ប៉ុន្តែកាលណោះលោកមិនទាន់មានចំណេះដឹងច្រើន លើវិធីដាំដុះ ក៏ដូចជាការថែទាំដំណាំនៅឡើយ។ ហេតុដូច្នេះហើយបានជាកាលណោះ លោកពិបាកក្នុងការស្វែងរកទីផ្សារលក់ដំណាំដែលប្រមូលបាន។ រហូតមកដល់ឆ្នាំ ២០១៧ ទើបលោកចាប់ផ្ដើមកែប្រែការដាំដុះទៅជាដំណាំសុវត្ថិភាព ក្រោមការណែនាំរបស់គម្រោង Aspire។ នៅលើដីទំហំ ៦ ហិកតា កសិកររូបនេះមិនត្រឹមតែដាំដុះដំណាំច្រើនមុខ ក៏ប៉ុន្តែលោកព្យាយាមបង្កើតតុល្យភាព និងការផ្គត់ផ្គង់គ្រប់ផ្នែកផងដែរ។ ជារួមលោកមានទាំងស្រះចិញ្ចឹមត្រី មានចិញ្ចឹមមាន់ និង ១ ផ្នែកធំនៃដីផ្សេងទៀតសម្រាប់ដាំបន្លែសុវត្ថិភាពក្នុងផ្ទះសំណាញ់។
តាមរយៈសកម្មភាពវិលជុំនេះ លោកអាចរកចំណូលបានខ្ទង់រាប់រយលានរៀលក្នុង ១ ឆ្នាំ ហើយលោកមានបំណងចង់ពង្រីកដីដាំដុះបន្ថែមទៀត។
លោក ឈាវ ហុង និយាយថា៖ «កាលពីឆ្នាំ ២០១៩ ចំណូលរាងធ្លាក់បន្តិច ដោយបាន ៤០០ លានរៀលក្នុង ១ ឆ្នាំ តែបានកើនឡើងបន្តិចក្នុងឆ្នាំ ២០២០-២០២១ ដោយបាន ៤៦០ លានរៀល...តែសម្រាប់ឆ្នាំនេះកើនឡើងរហូតដល់ ៦៦០ លានរៀល»។
កសិកររូបនេះបន្ថែមថា៖ «ទីផ្សារផ្គត់ផ្គង់រាល់ថ្ងៃនេះ បានត្រឹមតែប្រមាណជា ៤០ ភាគរយប៉ុណ្ណោះ ឈ្មួញចេះតែសួររករហូត ដោយសារយើងផ្គត់ផ្គង់គេមិនគ្រប់! ដូច្នេះខ្ញុំមានគម្រោងនឹងពង្រីកដីឱ្យធំជាង ៦ ហិកតាធំជាងរាល់ថ្ងៃនេះទៀត»។
មិនខុសគ្នាប៉ុន្មានពីកសិករខាងលើ កសិករ ប៉ុក វេង រស់នៅក្នុងខេត្តក្រចេះឯណោះវិញ ចាប់ផ្ដើមដោយការដាំដុះជាលក្ខណៈគ្រួសារ ក្រោយមកទើបពង្រីកដើម្បីលក់ទៅទីផ្សារ។ កសិករវ័យ ៥៦ ឆ្នាំរូបនេះ ចាប់ផ្ដើមពង្រីកដីដាំដុះពី ៥ អាទៅ ១០ អានៅក្នុងឆ្នាំ ២០១៩ ក្រោមការណែនាំរបស់គម្រោង Aspire។ ក្រោយទទួលបានការជោគជ័យលើការដាំដុះ លោក ប៉ុក វេង បានផ្លាស់ប្ដូរ និងបន្ថែមដំណាំរបស់ខ្លួន ដែលមកទល់បច្ចុប្បន្ននេះលោកពង្រីកដល់ ២០ អា។
ការដាំដុះរបស់លោក មានការពិនិត្យស្តង់ដាត្រឹមត្រូវ ជាហេតុនាំឱ្យបន្លែរបស់លោកលក់អស់គ្មានសល់។ លោកបន្ថែមថា៖ «ពេលប្រមូលបាន ខ្ញុំលក់បន្លែទៅទីរួមខេត្តដោយមានឈ្មួញជាដៃគូទិញស្រាប់ ពេលខ្លះគេយកទៅផ្គត់ផ្គង់ដល់ខេត្តមណ្ឌលគិរីទៀតផង»។
លោកបន្ថែមថា៖ «ខ្ញុំចង់ពង្រីកដីដាំដំណាំទៀត ព្រោះរាល់ថ្ងៃដីតូចពេក លក់ទៅមិនដែលគ្រប់តម្រូវការទីផ្សារ! គេចេះតែសួររកបន្ថែមរហូត»។ តាមរយៈដីដាំដុះ ២០ អានេះលោកទទួលបានចំណូលក្នុង ១ ខែ ៨ លានរៀល រាប់ទាំងបន្លែនៅក្នុងផ្ទះសំណាញ់ និងក្រៅផ្ទះសំណាញ់។
ជារួមកសិករទាំង ២ រូបនេះ ជាគំរូល្អមួយសម្រាប់កសិករដទៃទៀត ឱ្យងាកមកដាំដំណាំដែលមានគុណភាព និងត្រូវតាមស្តង់ដារបស់ឈ្មួញក្នុងស្រុកបែបនេះទើបផលិតផលបានមកមានទីផ្សារលក់ទូលាយ។
គួររំឭកថា កាលពីថ្ងៃទី ១ តុលា នៅក្នុងពិធីជួបសំណេះសំណាលជាមួយពលរដ្ឋ ដែលស្ម័គ្រចិត្តរើចេញពីតំបន់អង្គរទៅតំបន់រុនតាឯក លោកនាយករដ្ឋមន្ត្រី ហ៊ុន សែន បានមានប្រសាសន៍ថា កសិករនៅតំបន់ថ្មី អាចដាំដុះ និងចិញ្ចឹមសត្វបានដោយអាចលក់នៅក្នុងស្រុកផ្ទាល់ពុំចាំបាច់នាំចេញឡើយ។
លោកបានជំរុញឱ្យមានការដាំដុះ និងការចិញ្ចឹមសត្វដើម្បីបម្រើឱ្យវិស័យទេសចរណ៍ក្រោមទស្សនទានថា «នាំចេញនៅនឹងកន្លែង» ដោយមិនចាំបាច់នាំចេញទៅក្រៅប្រទេសឡើយ។ នេះក៏ជាឱកាសល្អផងដែរសម្រាប់កសិករនៅក្នុងស្រុកដោយមានទីផ្សារលក់ស្រាប់៕
កែវ បុស្បា
