ភ្នំពេញៈ អ្នកតំណាងនៅក្នុងវិស័យទេសចរណ៍រំពឹងថា កម្ពុជានឹងទទួលបានភ្ញៀវទេសចរអន្តរជាតិ និងភ្ញៀវជាតិកាន់តែច្រើនថែមទៀតក្នុងឆ្នាំនេះ បន្ទាប់ពីរាជរដ្ឋាភិបាលបានប្រកាសកែសម្រួលនូវវិធានការសុខាភិបាលចំពោះអ្នកដំណើរមកពីបរទេសទាំងអស់ចូលមកប្រទេសកម្ពុជាដោយមិនមានតម្រូវឱ្យបង្ហាញសេចក្តីប្រកាសសុខភាពរបស់អ្នកដំណើរ និងបណ្ណ ឬវិញ្ញាបនបត្រចាក់វ៉ាក់សាំងកូវីដ ១៩ ទៀតឡើយ។
កាលពីថ្ងៃទី៣ ខែតុលា ឆ្នាំ ២០២២ ក្រសួងសុខាភិបាល បានចេញសេចក្តីប្រកាសព័ត៌មានដោយយោងចំណារឯកភាពពីលោកនាយករដ្ឋមន្ត្រី ហ៊ុន សែន ឱ្យធ្វើការកែសម្រួលនូវវិធានការសុខាភិបាលចំពោះអ្នកដំណើរមកពីបរទេស ដោយដកចេញនូវវិធានការដែលតម្រូវឱ្យអ្នកដំណើរមកពីបរទេសទាំងអស់ ទាំងច្រកផ្លូវគោក ផ្លូវទឹក និងផ្លូវអាកាស បង្ហាញសេចក្តីប្រកាសសុខភាពរបស់អ្នកដំណើរ និងបណ្ណ ឬវិញ្ញាបនបត្រចាក់វ៉ាក់សាំងកូវីដ ១៩ ពេញលេញនៅពេលមកដល់កម្ពុជា។
ប្រធានសមាគមទីភ្នាក់ងារទេសចរណ៍អាស៊ីប៉ាស៊ីហ្វិក (PATA) លោក ធួន ស៊ីណាន បានប្រាប់ ភ្នំពេញ ប៉ុស្តិ៍ ក្នុងថ្ងៃទី ៤ ខែកញ្ញាថា ការបន្តបន្ធូរបន្ថយវិធានការសុខាភិបាលនេះគឺជាកត្តាមួយដ៏សំខាន់ក្នុងការជួយសម្រួលក៏ដូចជាទាក់ទាញភ្ញៀវបរទេសមកកម្ពុជា ខណៈវិស័យនេះកំពុងងើបឡើងវិញជាសន្សឹមៗ។
លោកប្រាប់ថា៖ «ជាការពិតណាស់ រដ្ឋាភិបាលតែងខំជួយសម្រួលដល់អ្នកដំណើរអន្តរជាតិកាន់តែងាយស្រួលពី ១ ថ្ងៃទៅ ១ ថ្ងៃ ដែលឆ្លុះបញ្ចាំងពីការជួយជ្រោមជ្រែងរបស់រដ្ឋាភិបាលដល់វិស័យឯកជន។ ការដករបាំងធ្វើដំណើរបន្ថែមនេះនឹងជួយថែមទៀតសម្រាប់ភ្ញៀវបរទេសចូលមកកម្ពុជា»។
នាយកគ្រប់គ្រងអាជីវកម្មនៃក្រុមហ៊ុនទេសចរណ៍ ភីធីអឹម លោក ស សារិន បានប្រាប់ថា ការជួយសម្រួលដល់ភ្ញៀវចូលមកក្នុងស្រុក គឺជាកត្តាសំខាន់ក្នុងការទាក់ទាញភ្ញៀវទេសចរមកកម្ពុជា។ លោកស្វាគមន៍ចំណាត់ការរដ្ឋាភិបាលតាមរយៈក្រសួងសុខាភិបាលដែលបានកែសម្រួលលក្ខខណ្ឌសម្រាប់ភ្ញៀវមកពីបរទេសថែមទៀត។
លោកបញ្ជាក់ថា៖ «ខ្ញុំយល់ថា វាជារឿងមួយដ៏ល្អដែលជាការបើកផ្លូវបន្ថែមទៀតសម្រាប់ភ្ញៀវទេសចរបរទេសចូលមកស្រុកខ្មែរកាន់តែច្រើន។ ខ្ញុំគិតថា ពេលនេះអត្រានៃការចាក់វ៉ាក់សាំងរបស់ប្រជាជនខ្មែរគឺមានកម្រិតខ្ពស់ ដែលផ្តល់ទំនុកចិត្តថែមទៀតដល់ភ្ញៀវទេសចរបរទេសមកទស្សនាកម្ពុជា»។
លោកមានសុទិដ្ឋិនិយមថា៖ «យើងសង្ឃឹមថា វិស័យទេសចរណ៍នឹងមានកំណើនកាន់តែប្រសើរ ដោយសារបណ្តាក្រុមហ៊ុន/ភ្នាក់ងារទេសចរណ៍នៅប្រទេសផ្សេងៗនឹងរៀបចំកញ្ចប់ទេសចរណ៍មកប្រទេសយើង»។
ទោះបីជាមានការកែសម្រួលវិធានការសុខាភិបាលយ៉ាងនេះក្តី លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានឱ្យដឹងកាលពីថ្ងៃទី ៣ ខែតុលាថា រាល់ភ្ញៀវទេសចរចូលក្នុងប្រទេស គឺនៅតែតម្រូវឱ្យបន្តរក្សាទុកនូវម៉ាស៊ីនវាស់កម្តៅពីចម្ងាយនៅតាមច្រកទ្វារចេញចូលប្រទេស ព្រមទាំងរក្សាទុកនូវមន្ត្រីទទួលបន្ទុកការងារចត្តាឡីស័កមួយចំនួននៅតាមច្រកទ្វារព្រំដែនដើម្បីពិនិត្យផ្តល់យោបល់ចំពោះអ្នកដំណើរមានរោគសញ្ញា ឬមានតម្រូវការជាយថាហេតុ។
ថ្មីៗនេះក្រសួងទេសចរណ៍បានប្រកាសដាក់ចេញនូវយុទ្ធសាស្ត្រសំខាន់ៗចំនួន ៨ ដើម្បីអនុវត្តក្នុងគោលបំណងទាក់ទាញភ្ញៀវទេសចរអន្តរជាតិឱ្យធ្វើដំណើរមកប្រទេសកម្ពុជាឱ្យបាន ៧,៥ លាននាក់នៅត្រឹមឆ្នាំ ២០២៨ ខណៈវិបត្តិការឆ្លងរាលដាលជំងឺកូវីដ ១៩ បានធ្វើឱ្យវិស័យនេះធ្លាក់ចុះស្ទើរដល់សូន្យ (ឆ្នាំ ២០២០-២០២១)។
រយៈពេល ៨ ខែ ឆ្នាំ ២០២២ កម្ពុជាទទួលបានភ្ញៀវទេសចរអន្តរជាតិ ៩៩៨ ២៧២ នាក់ កើន ៧២០ ភាគរយធៀបរយៈពេលដូចគ្នាឆ្នាំមុន។ នេះបើតាមក្រសួងទេសចរណ៍៕