ភ្នំពេញៈ លោកនាយករដ្ឋមន្ត្រី ហ៊ុន សែន បានអះអាងថា ក្នុងបរិការណ៍ដែលការគ្រប់គ្រងជំងឺកូវីដ ១៩ នៅប្រទេសកម្ពុជាត្រូវបានពិភពលោកទទួលស្គាល់ថាមានប្រសិទ្ធភាពល្អនោះ រាជរដ្ឋាភិបាលកម្ពុជាបាននិងកំពុងព្យាយាមប្រែក្លាយវិបត្តិនេះឱ្យក្លាយជាកាលានុវត្តភាពដើម្បីជំរុញកំណើនសេដ្ឋកិច្ចរបស់ខ្លួនតាមរយៈការពន្លឿនការកែទម្រង់ស៊ីជម្រៅ ការលើកកម្ពស់បរិយាកាសធុរកិច្ច និងការពង្រឹងភាពប្រកួតប្រជែង។
នេះជាការលើកឡើងនៅក្នុងពិធីបើកសន្និសីទស្តីពី «ចក្ខុវិស័យប្រទេសកម្ពុជាឆ្នាំ ២០២២» ដែលរៀបចំនៅសណ្ឋាគារសុខា ភ្នំពេញ កាលពីថ្ងៃទី ៦ ខែតុលា ក្រោមមូលបទ «ការស្តារកម្ពុជាឡើងវិញ៖ ការអភិវឌ្ឍប្រកបដោយនិរន្តរភាពបន្ទាប់ពីវិបត្តិជំងឺកូវីដ ១៩» ដែលជាវេទិកាដ៏មានសារៈសំខាន់ប្រមូលផ្តុំអ្នកជំនាញពាក់ព័ន្ធបញ្ហាសេដ្ឋកិច្ច និងសង្គម ដើម្បីធ្វើជាធាតុចូលសម្រាប់ដោះស្រាយបញ្ហាប្រឈម និងស្វែងរកកាលានុវត្តភាពសម្រាប់ជំរុញការអភិវឌ្ឍនៅប្រទេសកម្ពុជា។
លោកបានថ្លែងថា រយៈពេលជាង ២ ទសវត្សរ៍មុនពេលមានការឆ្លងរាលដាលជំងឺកូវីដ ១៩ កម្ពុជាសម្រេចបានអត្រាកំណើនជាង ៧ ភាគរយក្នុង ១ ឆ្នាំ ដែលការណ៍នេះធ្វើឱ្យកម្ពុជាផ្លាស់ប្តូរពីប្រទេសមានការអភិវឌ្ឍតិចតួចទៅជាប្រទេសមានចំណូលមធ្យមកម្រិតទាបកាលពីក្នុងឆ្នាំ ២០១៥។ ជាមួយសមិទ្ធផលដ៏ត្រចះត្រចង់នេះ រដ្ឋាភិបាលបានកំណត់ចក្ខុវិស័យក្នុងការប្រែក្លាយជាប្រទេសដែលមានចំណូលមធ្យមកម្រិតខ្ពស់នៅឆ្នាំ ២០៣០ និងជាប្រទេសមានប្រាក់ចំណូលកម្រិតខ្ពស់ក្នុងឆ្នាំ ២០៥០។ ទោះយ៉ាងណា ការផ្ទុះឡើងជំងឺកូវីដ ១៩ បានធ្វើឱ្យដំណើរឆ្ពោះទៅរកការសម្រេចចក្ខុវិស័យទាំងនេះអាចជួបនឹងការរាំងស្ទះ។
លោកបានបន្ថែមថា ក្រៅពីវិបត្តិនេះ ពិភពលោកពេលបច្ចុប្បន្នក៏កំពុងជួបបញ្ហាប្រឈមជាច្រើនផងដែរដូចជា បញ្ហាសង្គ្រាមនៅប្រទេសអ៊ុយក្រែន ការកើនឡើងតម្លៃប្រេងឥន្ធនៈបញ្ហាអតិផរណា និងការប្រែប្រួលអាកាសធាតុដែលកំពុងដាក់សម្ពាធទៅលើជីវភាពរបស់ប្រជាជន ពិសេសប្រជាជនក្រីក្រ និងងាយរងគ្រោះ។
លោកបញ្ជាក់ថា៖ «កម្ពុជាត្រូវបានចាត់ទុកជាប្រទេសឈានមុខមួយដែលគ្រប់គ្រង និងងើបចេញពីវិបត្តិកូវីដ ១៩ បានយ៉ាងល្អប្រសើរ។ ក្នុងបរិការណ៍នេះ រាជរដ្ឋាភិបាល បាននិងកំពុងព្យាយាមប្រែក្លាយវិបត្តិឱ្យទៅជាកាលានុវត្តភាពតាមរយៈការពន្លឿនការកែទម្រង់ស៊ីជម្រៅ ដើម្បីលើកកម្ពស់បរិយាកាសធុរកិច្ច និងពង្រឹងភាពប្រកួតប្រជែងរបស់កម្ពុជា»។
រដ្ឋាភិបាលកម្ពុជា កាលពីខែតុលា ឆ្នាំ ២០២១ បានប្រកាសដាក់ចេញច្បាប់ស្តីពីវិនិយោគនៃព្រះរាជាណាចក្រកម្ពុជាដែលច្បាប់ថ្មីនេះបានផ្តល់ការលើកទឹកចិត្ត ការការពារ និងមានភាពទាក់ទាញខ្លាំងសម្រាប់អ្នកបណ្តាក់ទុននៅកម្ពុជា។ បន្ថែមលើនេះរដ្ឋាភិបាលក៏បានដាក់ចេញ និងកំពុងជំរុញការអនុវត្តឯកសារគោលនយោបាយយុទ្ធសាស្ត្រ និងអភិវឌ្ឍវិស័យសំខាន់ៗដូចជា វិស័យកាត់ដេរ យានយន្ត អេឡិចត្រូនិក កសិកម្ម ទេសចរណ៍ ប្រៃសណីយ៍ និងប្រសិទ្ធភាពថាមពលផងដែរ។
លោកអះអាងថា៖ «សម្រាប់ទិសដៅទៅមុខ ក្នុងបរិការណ៍ដែលពោរពេញដោយភាពស្មុគស្មាញ និងភាពមិនប្រាកដប្រជាខ្ពស់រដ្ឋាភិបាលនឹងផ្តល់អាទិភាពដល់ការកសាងភាពធន់នៃសេដ្ឋកិច្ចជាតិ ដូចបានកំណត់ក្នុងក្របខ័ណ្ឌយុទ្ធសាស្ត្រ និងកម្មវិធីស្តារ និងជំរុញកំណើនសេដ្ឋកិច្ចកម្ពុជាក្នុងការរស់នៅជាមួយនឹងជំងឺកូវីដ ១៩ តាមគន្លងប្រក្រតីភាពថ្មី សម្រាប់ឆ្នាំ ២០២១-២០២៣»។
ប្រធានក្រុមប្រឹក្សាភិបាលនៃវិទ្យាស្ថានបណ្តុះបណ្តាល និងស្រាវជ្រាវ ដើម្បីអភិវឌ្ឍន៍កម្ពុជា (CDRI) លោក ម៉ី កល្យាណ បានឱ្យដឹងថា ការចូលរួមផ្តល់អនុសាសន៍គន្លឹះរបស់លោកនាយករដ្ឋមន្ត្រី ហ៊ុន សែន គឺពិតជាមានសារៈសំខាន់ណាស់សម្រាប់វិទ្យាស្ថាន CDRI ក្នុងការរៀបចំគោលការណ៍សិក្សាស្រាវជ្រាវ និងវិភាគ ដើម្បីរួមចំណែកកសាងគោលនយោបាយ និងយុទ្ធសាស្ត្រអភិវឌ្ឍន៍ប្រកបដោយចិរភាពរបស់វិទ្យាស្ថាន ក៏ដូចជាប្រទេសដែរ។ បច្ចុប្បន្ន CDRI ក៏កំពុងធ្វើការជិតស្និទ្ធជាមួយក្រសួង-ស្ថាប័ន ស្ថានទូតបរទេស ដៃគូអភិវឌ្ឍន៍ និងផ្នែកឯកជន ជាដើម។
លោកថ្លែងថា៖ «យើងរំពឹងថាសន្និសីទ «ចក្ខុវិស័យប្រទេសកម្ពុជាឆ្នាំ ២០២២» នឹងទទួលបានធាតុចូល និងអនុសាសន៍នយោបាយសំខាន់ៗតាមរយៈការសម្របសម្រួលបំផុសគំនិត និងការធ្វើបទបង្ហាញពីវាគ្មិនជាតិ-អន្តរជាតិ ក៏ដូចជាលទ្ធផលពីការពិភាក្សាពេញអង្គនៃវគ្គនីមួយៗដើម្បីចូលរួមដល់ការកសាងគោលនយោបាយ/ក្របខ័ណ្ឌយុទ្ធសាស្ត្រសម្រាប់ការស្តារ និងជំរុញសេដ្ឋកិច្ច។ សន្និសីទ «ចក្ខុវិស័យប្រទេសកម្ពុជាឆ្នាំ ២០២២» នឹងក្លាយជាឱកាសក្នុងការចែករំលែកធាតុចូល បទពិសោធ និងភាពជោគជ័យរបស់កម្ពុជាក្នុងការគ្រប់គ្រងកូវីដ ១៩ ផងដែរ»។
លោក លឹម ហេង អនុប្រធានសភាពាណិជ្ជកម្មកម្ពុជា បានប្រាប់ភ្នំពេញប៉ុស្តិ៍ថា សន្និសីទស្តីពី «ចក្ខុវិស័យប្រទេសកម្ពុជាឆ្នាំ ២០២២» គឺជាវេទិកាដែលនឹងផ្តល់នូវគំនិតថ្មីៗបន្ថែមទៅដល់រដ្ឋាភិបាលក្នុងការដាក់ចេញគោលនយោបាយអភិវឌ្ឍន៍សេដ្ឋកិច្ចឱ្យរីកចម្រើនកាន់តែឆាប់ ខណៈផ្នែកឯកជនក៏មានវេទិការបស់ខ្លួនក្នុងការជួបជាមួយតំណាងរដ្ឋាភិបាលដើម្បីរួមគ្នាបង្កើតគោលដៅ និងយុទ្ធសាស្ត្រថ្មីៗផងដែរ។ លោកបន្តថា ជាមួយនឹងអ្វីដែលកម្ពុជាបាននិងកំពុងធ្វើនៅពេលនេះ លោកគិតថា សម្ទុះនៃការអភិវឌ្ឍចាប់ពីឆ្នាំ ២០២៣ នឹងមានភាពកាន់តែប្រសើរ។
លោកនិយាយថា៖ «បើសិនរាជរដ្ឋាភិបាលមាននយោបាយ និងយុទ្ធសាស្ត្រកាន់តែប្រសើរនោះ ក្តីបំណងក្នុងការនាំប្រទេសឱ្យក្លាយទៅជាប្រទេសរីកចម្រើននឹងឆាប់លេចចេញជារូបរាងមិនខាន»៕