.jpg)
បុរស ២ នាក់ជិះម៉ូតូកាត់ពីមុខទីស្នាក់ការ CSX។ ហេង ជីវ័ន
ភ្នំពេញៈ ក្រុមហ៊ុន ហ្គោលដេន ទ្រី (Golden Tree) នឹងក្លាយជាក្រុមហ៊ុនដំបូងគេបង្អស់ក្នុងការបើកទំព័រប្រវត្តិសាស្ត្រថ្មីក្នុងទីផ្សារមូលបត្រកម្ពុជា (CSX) លើការបោះផ្សាយសញ្ញាបណ្ណបៃតងនៅកម្ពុជា ដោយគ្រោងធ្វើការកៀរគរមូលនិធិប្រមាណ ៣ លានដុល្លារពីការបោះផ្សាយនេះ ដើម្បីពង្រីកអាជីវកម្មរបស់ខ្លួន។ មន្ត្រីអះអាងថា ការបោះផ្សាយសញ្ញាបណ្ណបៃតងនេះគឺជាការរួមចំណែករបស់វិស័យឯកជនជាមួយរដ្ឋាភិបាលដែលប្តេជ្ញាលើការកាត់បន្ថយឧស្ម័នកាបូនជាសកល។
បើយោងតាមសេចក្តីប្រកាសព័ត៌មានរបស់ CSX កាលពីថ្ងៃទី ៥ ខែតុលា CSX បានឯកភាពជាគោលការណ៍លើពាក្យស្នើសុំពិនិត្យលទ្ធភាពអាចចុះបញ្ជីលក់មូលបត្របំណុល (សញ្ញាបណ្ណបៃតង) របស់ក្រុមហ៊ុន ដើម្បីអាចចុះបញ្ជី និងជួញដូរជាផ្លូវការនៅផ្សារមូលបត្រកម្ពុជា នៅពេលដែលក្រុមហ៊ុនទទួលការអនុញ្ញាតឱ្យបោះផ្សាយលក់មូលបត្របំណុលពីនិយតករមូលបត្រកម្ពុជា និងត្រូវបំពេញលក្ខខណ្ឌមួយចំនួនទៀតពាក់ព័ន្ធនឹងការចុះបញ្ជីនៅ CSX។
អគ្គនាយក CSX លោក ហុង សុហួរ បានប្រាប់ភ្នំពេញប៉ុស្តិ៍នាថ្ងៃទី ៦ ខែតុលាថា ការបោះផ្សាយសញ្ញាបណ្ណបៃតងនឹងធ្វើឡើងដូចការបោះផ្សាយសញ្ញាបណ្ណធម្មតាដែរ ប៉ុន្តែក្រុមហ៊ុនដែលបោះផ្សាយគឺទាមទារអនុលោមគោរពលើការវិនិយោគ ដែលមិនប៉ះពាល់បរិស្ថាន និងការប៉ះពាល់អាកាសធាតុ។
លោកថ្លែងថា៖ «យើងសង្កេតឃើញថា ក្រុមហ៊ុនចាប់ផ្តើមលើការវិនិយោគទាំងឡាយណាមិនប៉ះពាល់បរិស្ថាន និងការប្រែប្រួលអាកាសធាតុ ដូច្នេះហើយបានជាក្រុមហ៊ុនហ្គោលដេនទ្រី និងក្រុមហ៊ុនមួយចំនួនទៀតបានស្វះស្វែងរកការបញ្ជាក់ពីអ្នកជំនាញមកពីភាគីឯករាជ្យដូចជាមកពីស្ថាប័នអន្តរជាតិ ឬធនាគារពិភពលោកជាដើម»។
លោកបញ្ជាក់ថា៖ «ក្រុមហ៊ុនគ្រោងកៀរគរប្រាក់ប្រមាណ ៣ លានដុល្លារ សម្រាប់រយៈពេល ៥ ឆ្នាំជាមួយអត្រាការប្រាក់ ៧ ភាគរយ។ ខ្ញុំយល់ថា មូលបត្រនេះអាចពិសេសជាងមូលបត្រមុនៗត្រង់ថាគាត់នឹងបើកទទួលការវិនិយោគរបស់វិនិយោគិនជាបុគ្គលដែរ នេះគឺជាលក្ខណពិសេសរបស់ក្រុមហ៊ុន ដូច្នេះវិនិយោគិនបុគ្គលដែលចង់វិនិយោគ គឺអាចចូលរួមបាន»។
អគ្គនាយកនៃនិយតករមូលបត្រកម្ពុជា លោក ស៊ូ សុជាតិ បាននិយាយថា ការជូនដំណឹងនេះជាការបង្ហាញជូនសាធារណជនថា ទីផ្សារមូលបត្រយើងបានពិនិត្យលទ្ធភាពថា ក្រុមហ៊ុនហ្គោលដេន ទ្រី មានលទ្ធភាពចុះបញ្ជី។
លើសពីនេះ វាក៏ជាការបញ្ជាក់ថា សញ្ញាបណ្ណពេលនេះគឺជាសញ្ញាបណ្ណបៃតងដែលមានការបញ្ជាក់ពីអ្នកវាយតម្លៃជំនាញដែលជាជំនួយរបស់ ADB ដែលគាត់ផ្តល់ជំនួយដើម្បីឱ្យអ្នកជំនាញមកវាយតម្លៃថា វាពិតជាសញ្ញាបណ្ណដែលមានលក្ខណៈបៃតងស្របតាមបទដ្ឋានអាស៊ាន ដូច្នេះហើយវាជាប្រភេទសញ្ញាបណ្ណបៃតងទី ១ ដែលស្ថិតនៅក្រោមបទដ្ឋានអាស៊ាន។
លោកថ្លែងថា៖ «នៅពេលនេះក្រុមហ៊ុន គឺស្ថិតក្នុងនីតិវិធីបន្តទៀតសិន។ ក្រុមហ៊ុនត្រូវការអនុម័តពីនិយតករមូលបត្រកម្ពុជាតាមរយៈកិច្ចប្រជុំក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ (អ.ស.ហ)»។
បើយោងតាមលោក សុហួរ សម្រាប់ពេលនេះក្រុមហ៊ុនត្រូវបំពេញលក្ខខណ្ឌជាមួយនិយតករមូលបត្រកម្ពុជា ដូច្នេះអាស្រ័យលើនិយតករមូលបត្រកម្ពុជា បើគាត់បានដំណើរការនីតិវិធីលឿន ដូច្នេះការចុះបញ្ជីក៏អាចនឹងកើតឡើងឆាប់ៗក្នុងខែវិច្ឆិកាខាងមុខនេះ៕
