ភ្នំពេញ៖ កម្ពុជាបានស្នើភាគីអារ៉ាប៊ី សាអ៊ូឌីត ពិនិត្យលទ្ធភាពក្នុងការបង្កើតយន្តការកិច្ចសហប្រតិបត្តិការក្នុងទម្រង់ជាអនុស្សរណៈ ឬកិច្ចព្រមព្រៀងស្តីពីកិច្ចសហប្រតិបត្តិការពាណិជ្ជកម្ម ដើម្បីអាចសម្រាប់ជំរុញការធ្វើពាណិជ្ជកម្មរវាងប្រទេសទាំង ២ ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា លើកសំណើទៅកាន់ព្រះអង្គម្ចាស់ Abdulaziz bin Turki Al Saud រដ្ឋមន្ត្រីក្រសួងកីឡានៃព្រះរាជាណាចក្រអារ៉ាប៊ីសាអ៊ូឌីត ក្នុងឱកាសដែលព្រះអង្គយាងចូលរួម ”មហាសន្និបាតក្រុមប្រឹក្សាអូឡាំពិកអាស៊ី លើកទី៤១” កាលពីថ្ងៃទី ៤ ខែតុលា ឆ្នាំ ២០២២ នៅរាជធានីភ្នំពេញ។
លោកបានសាទរដែលរាជរដ្ឋាភិបាលព្រះរាជាណាចក្រ អារ៉ាប៊ី សាអ៊ូឌីត នឹងបើក ស្ថានទូតប្រចាំនៅកម្ពុជា ស្របពេលដែលទំហំពាណិជ្ជកម្មកម្ពុជា-អារ៉ាប៊ី សាអ៊ូឌីត សម្រេចបានប្រមាណ ២៦ លានដុល្លារអាមេរិកក្នុងឆ្នាំ ២០២១ ដែលកើនឡើងជិត ៤០% បើធៀបនឹងឆ្នាំ ២០២០ (ទំហំត្រឹមតែ ១៩ លានដុល្លារអាមេរិក)។
លោកបានថ្លែងថា ៖ «ក្នុងន័យនេះ ភាគីកម្ពុជាស្នើភាគី អារ៉ាប៊ីសាអ៊ូឌីត ពិនិត្យលទ្ធភាពក្នុងការបង្កើតយន្តការកិច្ចសហប្រតិបត្តិការក្នុងទម្រង់ជាអនុស្សរណៈ ឬកិច្ចព្រមព្រៀងស្តីពីកិច្ចសហប្រតិបត្តិការពាណិជ្ជកម្ម ដើម្បីអាចប្រើជាក្របខ័ណ្ឌគតិយុត្ត សម្រាប់ជំរុញកិច្ចសហប្រតិបត្តិការទ្វេភាគីលើវិស័យពាណិជ្ជកម្ម នាពេលអនាគត»។
ព្រះអង្គម្ចាស់ Abdulaziz bin Turki Al Saud កត់សម្គាល់អំពីការរីកចម្រើនគ្រប់វិស័យរបស់កម្ពុជា ហើយរាជរដ្ឋាភិបាលព្រះរាជាណាចក្រ អារ៉ាប៊ីសាអ៊ូឌីត បានសម្រេចថានឹងបើកស្ថានទូតប្រចាំនៅកម្ពុជា ដើម្បីពង្រឹង និងពង្រីកកិច្ចសហប្រតិបត្តិការលើវិស័យការទូត កីឡា អប់រំ និងសេដ្ឋកិច្ច ពាណិជ្ជកម្មជាដើមឲ្យមានការកើនឡើងបន្ថែមទៀត។
ព្រះអង្គម្ចាស់ Abdulaziz bin Turki Al Saud បានសន្យាថា នឹងពាំនាំសំណើរបស់ភាគី កម្ពុជាអំពីអនុស្សរណៈ ឬកិច្ចព្រមព្រៀងទៅជម្រាបជូនដល់រដ្ឋមន្ត្រីពាណិជ្ជកម្មរបស់ព្រះអង្គដើម្បីធ្វើការលើបញ្ហានេះ។
យោងតាមរបាយការណ៍របស់ក្រសួងពាណិជ្ជកម្ម ប្រទេសទាំង ២ សម្រេចបានពាណិជ្ជកម្មទ្វេភាគីក្នុងទំហំទឹកប្រាក់ ២៦ លានដុល្លារ ក្នុងឆ្នាំ ២០២១ កើនឡើងជិត ៤០% បើធៀបនឹងឆ្នាំ ២០២០ (ត្រឹមតែ ១៩ លានដុល្លារ) ខណៈដែលពាណិជ្ជកម្មទ្វេភាគីមានទំហំ ១៥.៦ លានដុល្លារ ក្នុងឆ្នាំ ២០១៩ និង ១៦ លានដុល្លារ ក្នុងឆ្នាំ ២០១៨។ កម្ពុជានាំចេញមុខទំនិញសំខាន់ៗ ទៅអារ៉ាប៊ី សាអ៊ូឌីត មានដូចជា អង្ករ សម្លៀកបំពាក់ ស្បែកជើង ផលិតផលធ្វើពីស្បែក និងផ្លែឈើ។ កម្ពុជានាំចូលមុខទំនិញ សំខាន់ៗពី អារ៉ាប៊ីសាអ៊ូឌីត មានដូចជា ផលិតផលធ្វើពីប្លាស្ទិក អាលុយមីញ៉ូម ផ្លែឈើ ជីគីមី សម្ភារសំណង់ និងដទៃទៀត៕