.jpg)
កម្មករលីអង្ករចេញពីកន្លែងស្តុកយកទៅឱ្យអតិថិជន។ ហេង ជីវ័ន
ភ្នំពេញៈ មន្ត្រីក្រសួងពាណិជ្ជកម្ម អ្នកក្នុងវិស័យធុរកិច្ច និងអ្នកជំនាញបានសាទរចំពោះគំនិតផ្តួចផ្តើមរបស់រដ្ឋាភិបាលក្នុងការគ្រោងធ្វើការចរចាបង្កើតកិច្ចព្រមព្រៀងពាណិជ្ជកម្មសេរី (FTA) កម្ពុជា-បង់ក្លាដែស សំដៅធ្វើពិពិធកម្មការនាំចេញ និងជំរុញរំហូរវិនិយោគរវាងប្រទេសទាំង ២។
ការសាទរនេះធ្វើឡើង បន្ទាប់ពីលោកនាយករដ្ឋមន្ត្រី ហ៊ុន សែន បានពិភាក្សាទ្វេភាគីជាមួយនឹងលោកស្រី Sheikh HASINA នាយករដ្ឋមន្ត្រីបង់ក្លាដែស កាលពីថ្ងៃទី ២២ ខែកញ្ញា ឆ្នាំ ២០២២ នៅទីក្រុងញូវយ៉ក សហរដ្ឋអាមេរិក ក្នុងគោលបំណង ដើម្បីបង្កើនទំហំពាណិជ្ជកម្ម និងវិនិយោគ។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្មបានប្រាប់ ភ្នំពេញ ប៉ុស្តិ៍ កាលពីថ្ងៃទី ៦ ខែតុលាថា គំនិតផ្តួចផ្តើមរបស់ថ្នាក់ដឹកនាំប្រទេសទាំង ២ គឺក្នុងគោលបំណងពង្រីកទំហំពាណិជ្ជកម្មរវាងគ្នា ជាពិសេសគឺរំហូរវិនិយោគ បើទោះបីប្រទេសទាំង ២ មានផលិតផលនាំចេញប្រហាក់ប្រហែលគ្នាក៏ដោយ។
លោកថ្លែងថា៖ «នេះជារឿងមួយដ៏ល្អសម្រាប់យើង ព្រោះការធ្វើពាណិជ្ជកម្មសេរីគឺអាចអនុញ្ញាតឱ្យប្រទេសទាំង ២ ជំរុញការនាំចេញនាំចូលរវាងគ្នាទៅវិញទៅមក។ ទោះយើងមានប្រភេទទំនិញខ្លះនាំចេញដូចគ្នា ប៉ុន្តែទំនិញខ្លះទៀតខាងគេពុំមានដូច្នេះយើងអាចបំពេញបន្ថែមឱ្យគ្នាទៅវិញទៅមក»។
លោក គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជាបានឱ្យដឹងថា ប្រទេសបង់ក្លាដែសមានស្ថានភាពផលិតកម្ម និងមានទំនិញនាំចេញប្រហាក់ប្រហែលកម្ពុជាដែរ ក្នុងនោះអ្វីដែលបង់ក្លាដែសនាំចេញច្រើនជាងគេនៅក្នុងសកលលោកនោះ គឺក្នុងវិស័យកាត់ដេរ និងវាយនភណ្ឌ។
លោកថ្លែងថា៖ «ការចុះកិច្ចព្រមព្រៀងពាណិជ្ជកម្មសេរីកម្ពុជា-បង់ក្លាដែសនឹងផ្តល់ផលប្រយោជន៍ដល់ប្រទេសកម្ពុជាទៅលើផលិតផលកសិកម្មមួយចំនួនដូចជាគ្រឿងទេស ព្រោះប្រទេសនោះត្រូវការគ្រឿងទេសច្រើនជាមួយគ្នានេះកម្ពុជាក៏អាចនាំចូលនូវផលិតផលមួយចំនួន ដែលយើងមិនអាចផលិតបាន និងនាំចេញទៅវិញនូវផលិតផលណាដែលបង់ក្លាដែសមានថ្លៃដើមខ្ពស់ ដូច្នេះប្រទេសទាំង ២ ធ្វើពិពិធកម្មនៃការនាំចេញ ដើម្បីអត្ថប្រយោជន៍រវាងគ្នា និងគ្នា»។
លោក សុង សារ៉ន អគ្គនាយកក្រុមហ៊ុន Amru Rice (Cambodia) បានសាទរ ចំពោះគំនិតផ្តួចផ្តើមនេះ ដោយលោកសម្លឹងឃើញថា កម្ពុជាអាចជំរុញការនាំចេញអង្ករទៅទីផ្សារមួយនេះ។ លើសពីនេះទៀត ប្រទេសបង់ក្លាដែសក៏អាចមកវិនិយោគលើដំណាំស្រូវនៅកម្ពុជា ដើម្បីធ្វើការនាំចេញផងដែរ។
លោកអះអាងថា៖ «ខ្ញុំយល់ឃើញថាវាជាកិច្ចការមួយដ៏ល្អដែលប្រទេសទាំង ២ នឹងអាចឈានដល់ការចុះហត្ថលេខា ដើម្បីសហការក្នុងការផ្គត់ផ្គង់ និងផលិតស្រូវអង្ករធ្វើការជួញដូរ ឬដឹកជញ្ជូនទៅបង់ក្លាដែស។ នៅពេលប្រទេសទាំង ២ ចុះហត្ថលេខារួច ខ្ញុំក៏នឹងធ្វើការសិក្សាពីការដឹកជញ្ជូន ឡូជីស្ទីក ប្រភេទអង្ករ និងស្តង់ដាផ្សេងៗដែលអាចមានលទ្ធភាពបំពេញតាមសេចក្តីត្រូវការ និងពេលវេលានៃការដឹកជញ្ជូន និងសិក្សាពីលទ្ធភាពឱ្យប្រទេសបង់ក្លាដែសធ្វើការវិនិយោគដោយផ្ទាល់ ដើម្បីកែច្នៃអង្ករដឹកជញ្ជូនទំនិញទៅកាន់ប្រទេសគាត់វិញ»។
យោងតាមក្រសួងពាណិជ្ជកម្ម ពាណិជ្ជកម្មទ្វេភាគីរវាងកម្ពុជា-បង់ក្លាដែសមានទឹកប្រាក់ជាង ២២ លានដុល្លារក្នុងរយៈពេល ៩ ខែនៃឆ្នាំ ២០២២ កើនជិត ៥៦ ភាគរយធៀបនឹងរយៈពេលដូចគ្នាឆ្នាំ ២០២១៕
