.jpg)
អ្នកជំនាញពិនិត្យមើលគុណភាពអង្ករនៅក្នុងរោងម៉ាស៊ីនស្រូវ។ ហេង ជីវ័ន
ភ្នំពេញៈ កម្ពុជារកចំណូលបានជាង ៨៥០ លានដុល្លារពីការនាំចេញស្រូវ និងអង្ករទៅទីផ្សារអន្តរជាតិក្នុងរយៈពេល ៩ ខែដើមឆ្នាំ ២០២២ ខណៈអ្នកក្នុងវិស័យនេះបានអះអាងថា ទោះបីវិបត្តិជាច្រើនលើពិភពលោកបានជំរុញឱ្យតម្លៃប្រេងកើនឡើង ក៏ឧស្សាហកម្មនេះទទួលរងផលប៉ះពាល់បន្តិចបន្តួចប៉ុណ្ណោះពីការឡើងថ្លៃនៃការដឹកជញ្ជូន។
យោងតាមទិន្នន័យចុងក្រោយរបស់សហព័ន្ធស្រូវអង្ករកម្ពុជា (CRF) ដែលភ្នំពេញប៉ុស្តិ៍ទទួលបាននៅថ្ងៃទី ១០ ខែតុលា ការនាំចេញអង្កររបស់កម្ពុជាទៅទីផ្សារអន្តរជាតិ សម្រាប់ត្រីមាសទី ៣ ឆ្នាំ ២០២២ កើនឡើង ១០ ភាគរយដែលមានបរិមាណសរុប ៤៤៩ ៣២៥ តោន ហើយគិតជាប្រាក់មានចំនួន ២៨៦,៩ លានដុល្លារ។ កម្ពុជាក៏បាននាំចេញស្រូវចំនួន ២ ៣៥៧ ៦៧៤ តោន ដែលមានតម្លៃប៉ាន់ស្មាន ៥៦៣,៥៤ លានដុល្លារ ក្នុងរយៈពេល ៩ ខែ ឆ្នាំ ២០២២ ។
លោក លន់ យ៉េង អគ្គលេខាធិការ CRF បានប្រាប់ភ្នំពេញប៉ុស្តិ៍ថា ទោះបីមានភាពតានតឹងក្នុងតំបន់ និងពិភពលោកជុំវិញការអូសបន្លាយនៃជំងឺកូវីដ-១៩ និងភាពតានតឹងនៃសង្គ្រាមនៅប្រទេសអ៊ុយក្រែន ដែលប៉ះពាល់ដល់តម្រូវការពិភពលោកក៏ដោយ ក៏ការនាំចេញអង្កររបស់កម្ពុជានៅតែបន្តកើនឡើង។
លោកថ្លែងថា៖ «ការកើនឡើងការនាំចេញអង្ករ ១០ ភាគរយក៏ដោយ ក៏វានៅតែល្អ ដោយសារបច្ចុប្បន្នភាគច្រើនយើងនាំចេញអង្ករក្រអូប ខណៈតម្រូវការអង្ករប្រភេទនេះកំពុងធ្លាក់ចុះ ដោយសារការកើនឡើងអតិផរណាពិភពលោក ដូច្នេះវាជះឥទ្ធិពលដល់ការប្រើប្រាស់»។
លោកបន្ថែមថា៖ «ជាមួយគ្នានេះយើងក៏សង្កេតឃើញការនាំចេញអង្ករគ្រាប់វែងរបស់យើងទៅអឺរ៉ុបកំពុងកើនឡើង បន្ទាប់ពីសហភាពអឺរ៉ុបបញ្ចប់ការយកពន្ធលើអង្ករប្រភេទនេះពីប្រទេសយើងចាប់ពីថ្ងៃទី ២០ ខែមករា ឆ្នាំនេះ»។
លោក អែនឌី ឡាយ ប្រធាននាយកប្រតិបត្តិក្រុមហ៊ុន City Rice Import Co.,Ltd បានប្រាប់ភ្នំពេញប៉ុស្តិ៍កាលពីថ្ងៃទី ១០ ខែតុលាថា បច្ចុប្បន្នទីផ្សារអឺរ៉ុប និងចិនកំពុងដើរតួនាទីសំខាន់លើការនាំចូលអង្កររបស់កម្ពុជានៅឆ្នាំនេះ។
លោកនិយាយថា៖ «ការនាំចេញអង្កររបស់ខ្ញុំគឺស្ថិតនៅលំដាប់ទី ១ នៃការនាំចេញទៅប្រទេសចិននៅក្នុងពេលនេះ។ យើងអាចមើលឃើញថា និន្នាការនៃការនាំចេញកំពុងកើនឡើង ដោយសារការថយចុះតម្លៃដឹកជញ្ជូននៅពេលនេះ។ លោកបានឱ្យដឹងថា ទីផ្សារប្រទេសចិន និងអឺរ៉ុបនៅតែជាគោលដៅឈានមុខគេរបស់យើងក្នុងការនាំចេញពីកម្ពុជា។ រហូតមកដល់ខែកញ្ញា ក្រុមហ៊ុនលោកបាននាំចេញចំនួន ៦៦ ០០០ តោន។
បើតាមលោក អែនឌី មកដល់ពេលនេះ តម្លៃដឹកជញ្ជូនធ្លាក់ចុះច្រើនផងដែរ ដោយតម្លៃនៃការនាំចេញទៅប្រទេសនៅអឺរ៉ុបដែលពីមុនមានតម្លៃ ៨ ០០០ ដុល្លារក្នុង ១ កុងតឺន័រ ឥឡូវនេះធ្លាក់មកនៅប្រហែល ៣ ០០០ ដុល្លារ ចំណែកការដឹកជញ្ជូនទៅប្រទេសចិនពីមុនតម្លៃ ៦០០-៧០០ ដុល្លារបានធ្លាក់មកនៅត្រឹម ២៥០ ដុល្លារ ឬ ៣០០ ដុល្លារ។
របាយការណ៍ CRF បានបង្ហាញថា រយៈពេល ៩ ខែឆ្នាំ ២០២២ កម្ពុជាបាននាំចេញអង្ករគ្រប់ប្រភេទ ៤៤៩ ៣២៥ តោនទៅកាន់គោលដៅ ៥៥ ដែលក្នុងនោះប្រទេសចំនួន ៩ បានគ្របដណ្ដប់លើទីផ្សារនាំចេញអង្ករកម្ពុជាជាង ៨២ ភាគរយក្នុងនោះប្រទេសចិន ៤៤,០៩ ភាគរយ, បារាំង ១៤,៨៣ ភាគរយ, ម៉ាឡេស៊ី ៥,៥៨ ភាគរយ, ហូឡង់ ៤,៦៥ ភាគរយ, អ៊ីតាលី ២,៦៥ ភាគរយ, ហ្គាប៊ុង ២,៦៣ ភាគរយ, ប្រ៊ុយណេ ២,៤៤ ភាគរយ, ចក្រភពអង់គ្លេស ២,៤៥ ភាគរយ និងអាល្លឺម៉ង់ ២,០៨ ភាគរយ។
ប្រភេទអង្ករក្រអូបប្រណីតដែលនាំចេញក្នុងរយៈពេលខាងលើ គឺមានជាង ៣៩ ភាគរយ ឬ ១៧៧ ៤៨១ តោន, អង្ករសែនក្រអូបជិត ២៩ ភាគរយ ឬ ១២៨ ៧៥៣ តោន អង្ករគ្រាប់វែងចំនួនជិត ២៨ ភាគរយ ឬ ១២៣ ៣១៨ តោន អង្ករចំហុយជាង ២ ភាគរយ ឬ ១០ ៦៨០ តោន អង្ករសរីរាង្គចំនួនជិត ២ ភាគរយ ឬ ៨ ១០៦ តោន៕
