ភ្នំពេញៈ ក្រុមហ៊ុន តូយ៉ូតា (ខេមបូឌា) មានផែនការបង្កើនការនាំចូលរថយន្តប្រភេទ Hybrid មកទីផ្សារកម្ពុជា ដើម្បីរួមចំណែកលើកទឹកចិត្តប្រជាពលរដ្ឋកម្ពុជាឱ្យងាកមកប្រើរថយន្តប្រភេទនេះឱ្យបានច្រើន ខណៈក្រុមហ៊ុនក៏ទើបទទួលបានការអនុញ្ញាតពីរដ្ឋាភិបាលក្នុងការបង្កើតរោងចក្រដំឡើងរថយន្តកាលពីពេលថ្មីៗនេះផងដែរ។
ការបង្ហាញនូវផែនការពង្រីកអាជីវកម្មរបស់ក្រុមហ៊ុននេះធ្វើឡើងក្នុងជំនួបរវាងលោក Ryoji Fujita អគ្គនាយកក្រុមហ៊ុន តូយ៉ូតា (ខេមបូឌា) ជាមួយនឹងលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូននៅទីស្តីការក្រសួង កាលពីថ្ងៃទី ១១ ខែតុលា។
លោក Ryoji Fujita បាននិយាយថា នៅពេលប្រជាពលរដ្ឋងាកមកប្រើរថយន្តប្រភេទនេះច្រើន វានឹងចូលរួមចំណែកកាត់បន្ថយការចំណាយលើការប្រើប្រាស់ប្រេងឥន្ធនៈ និងកាត់បន្ថយការបំភាយឧស្ម័នពុលក្នុងបរិយាកាសព្រមទាំងចូលរួមចំណែកក្នុងជួយឱ្យកម្ពុជាសម្រេចគោលដៅអព្យាក្រឹត កាបូន (Carbon Neutrality) នៅឆ្នាំ ២០៥០ ផងដែរ។
លោកបានស្នើសុំឱ្យក្រសួងពិនិត្យលទ្ធភាពលើការសហការជាមួយក្រសួងសេដ្ឋកិច្ច និងហិរញ្ញវត្ថុក្នុងការបន្ធូរបន្ថយពន្ធនាំចូលរថយន្តប្រភេទ Hybrid សំដៅរួមចំណែកលើកទឹកចិត្តឱ្យប្រជាពលរដ្ឋខ្មែរងាកមកប្រើប្រាស់រថយន្តប្រភេទ Hybrid ឱ្យបានច្រើន ដើម្បីកាត់បន្ថយការប្រើប្រាស់ប្រេងឥន្ធនៈ កាត់បន្ថយការបំភាយឧស្ម័នពុលទៅក្នុងបរិយាកាស។
លោក ស៊ុន ចាន់ថុល បានលើកឡើងថា រដ្ឋាភិបាលកំពុងខំប្រឹងប្រែងជំរុញការប្រើប្រាស់យានយន្តអគ្គិសនីឱ្យបានកាន់តែទូលំទូលាយនៅកម្ពុជា ដើម្បីរួមចំណែកកាត់បន្ថយការបំពុលបរិស្ថាន តាមរយៈគម្រោងដំឡើងស្ថានីយបញ្ចូលថាមពលរថយន្តអគ្គិសនីនៅតាមបណ្តារាជធានី-ខេត្ត ក៏ដូចជាជំរុញលើកទឹកចិត្ត និងទាក់ទាញការចាប់អារម្មណ៍ឱ្យប្រើប្រាស់រថយន្តអគ្គិសនីពីសាធារណជនទូទៅ និងស្វែងរកកិច្ចសហការជាមួយនឹងក្រុមហ៊ុននានា ដើម្បីជំរុញការដំឡើងស្ថានីយបញ្ចូលថាមពលអគ្គិសនីឱ្យបានច្រើនថែមទៀតទូទាំងផ្ទៃប្រទេស។
លោកបញ្ជាក់ថា៖ «ការគាំទ្រក្នុងការបន្ធូរបន្ថយពន្ធនាំចូល ជាពិសេសករណីរថយន្តប្រភេទ Hybrid ដែលក្រុមហ៊ុនតូយ៉ូតាបានលើកឡើងនេះអាចធ្វើទៅបានលុះត្រាតែមានការស្នើសុំពិភាក្សាជាមួយក្រសួងសេដ្ឋកិច្ច និងហិរញ្ញវត្ថុ»។
លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុបានប្រាប់ ភ្នំពេញ ប៉ុស្តិ៍ កាលពីម្សិលមិញថា ក្រសួងស្វាគមន៍រាល់សំណើពីវិស័យឯកជនក្នុងការជួយសម្រួលដល់ធុរកិច្ច ប៉ុន្តែត្រូវធ្វើតាមយន្តការពិគ្រោះយោបល់ដែលមានក្រុម «ឃ» ជាយន្តការមួយដែលគេប្រជុំគ្នាដោះស្រាយកម្រិតគោលនយោបាយជារៀងរាល់ឆ្នាំ។ កម្រិតបច្ចេកទេសទាំងអស់គឺដោះស្រាយតាមក្រុម «ឃ»។
លោកថ្លែងថា៖ «ខ្ញុំគិតថា បើក្រុមហ៊ុនមានសំណើជាក់លាក់តាមរយៈក្រុមពិគ្រោះយល់នេះ យើងនឹងមានការជជែកគ្នា និងពិចារណានៅក្នុងក្រុមនេះ»។
ក្រុមប្រឹក្សាអភិវឌ្ឍន៍កម្ពុជា (CDC) កាលពីថ្ងៃទី ៨ កញ្ញា បានឱ្យដឹងថា តាមសំណើសុំវិនិយោគរបស់ក្រុមហ៊ុន Toyota Tsusho Manufacturing (Cambodia) ក្រុមប្រឹក្សាអភិវឌ្ឍន៍កម្ពុជាបានអនុម័តឱ្យគម្រោងបង្កើតរោងចក្រផ្គុំ និងដំឡើងរថយន្តតូយ៉ូតា ដែលស្ថិតក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ ក្រោមទុនវិនិយោគ ៣៦,៧ លានដុល្លារ និងបង្កើតការងារ ១៥០ នាក់។
Toyota Tsusho Manufacturing (Cambodia) Co., Ltd បានក្លាយជាក្រុមហ៊ុនដំឡើងរថយន្តលំដាប់អន្តរជាតិថ្មីមួយទៀត បន្ទាប់ពីក្រុមហ៊ុន RMA Cambodia ដែលបានបើកដំណើរការរោងចក្រដំឡើងរថយន្ត Ford ក្នុងស្រុកក្រគរ ខេត្តពោធិ៍សាត់ ក្រោមទុនវិនិយោគ ២១ លានដុល្លារ៕