ភ្នំពេញៈ ការប្រមូលចំណូលរបស់អគ្គនាយកដ្ឋានគយ និងរដ្ឋាករកម្ពុជា (អគរ) ក្នុងរយៈពេល ៩ ខែឆ្នាំ ២០២២ មានទឹកប្រាក់សរុបជាង ២ ពាន់លានដុល្លារស្មើនឹងជិត ៧៩ ភាគរយនៃផែនការកំណត់ដោយច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ ២០២២។ នេះបើយោងតាមអគ្គនាយកដ្ឋានគយ និងរដ្ឋាករកម្ពុជា។
សេចក្តីប្រកាសព័ត៌មានកិច្ចប្រជុំបូកសរុបលទ្ធផលការងារគយ និងរដ្ឋាករ រយៈពេល ៩ ខែ ឆ្នាំ ២០២២ បានឱ្យដឹងថា ចាប់ពីខែមករាខែកញ្ញា ឆ្នាំ ២០២២ អគរ ប្រមូលចំណូលបានប្រមាណ ២ ០២៦,៨ លានដុល្លារ (ចំនួន ៨ ២៥៨,៧ ពាន់លានរៀល) ដែលតួលេខនេះត្រូវជាប្រមាណ ៧៨,៨ ភាគរយនៃផែនការកំណត់ដោយច្បាប់ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ ២០២២។ បើប្រៀបធៀបនឹងរយៈពេលដូចគ្នាក្នុងឆ្នាំ ២០២១ លទ្ធផលចំណូលនេះកើន ១ ៣៧៧,៣ ពាន់លានរៀលដែលត្រូវជា ២០ ភាគរយ។
យោងតាម អគរ ចំណូលតាមប្រភេទពន្ធ និងអាករ មានដូចជា អាករពិសេស មានចំនួន ៣ ១៤៥,៣ ពាន់លានរៀល (ស្មើនឹង ៣៨,១ ភាគរយនៃចំណូលសរុប), អាករលើតម្លៃបន្ថែម ៣ ១០៤,៧ ពាន់លានរៀល (ស្មើ ៣៧,៦ ភាគរយ), ពន្ធគយ ១ ៥៥៩,៦ ពាន់លានរៀល (ស្មើ ១៨,៩ ភាគរយ), អាករបន្ថែមលើផលិតផលប្រេង ២៨១,២ ពាន់លានរៀល (ស្មើ ៣,៤ភាគរយ), និងអាករនាំចេញ និងកម្រៃផ្សេងៗ ១៦៧,៩ ពាន់លានរៀល (ស្មើ ២ ភាគរយ)។
ដោយឡែកសម្រាប់ចំណូលតាមក្រុមទំនិញ គឺយានយន្តនិងគ្រឿងចក្រ មានចំនួន ៣ ៨៨៩,៦ ពាន់លានរៀល (ស្មើ ៤៧,១ ភាគរយ), ទំនិញចម្រុះ ២ ២០៦,៩ ពាន់លានរៀល (២៦,៧ភាគរយ), ផលិតផលតេលសិលា ១ ៦៨៣,៦ ពាន់លានរៀល (២០,៤ ភាគរយ), និងសម្ភារសំណង់ និងកម្រៃ ផ្សេងៗ ៤៧៨,៥ ពាន់លានរៀល (ស្មើ ៥,៨ ភាគរយ)។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក គី សេរីវឌ្ឍន៍ បានប្រាប់ ភ្នំពេញ ប៉ុស្តិ៍ ក្នុងថ្ងៃទី ១៣ ខែតុលាថា កំណើនតម្រូវការផលិតផលប្រើប្រាស់ក្នុងស្រុក និងវត្ថុធាតុដើមសម្រាប់កែច្នៃដើម្បីនាំចេញ បានធ្វើឱ្យចំណូលពន្ធគយដែលប្រមូលបានក្នុងរយៈពេល ៩ ខែដើមឆ្នាំ ២០២២ បន្តសញ្ញាវិជ្ជមានបើធៀបនឹងរយៈពេលដូចគ្នាឆ្នាំ ២០២១។ ផលិតផលដែលកម្ពុជានាំចូលច្រើនមានដូចជា រថយន្ត គ្រឿងចក្រ គ្រឿងសំណង់ និងឧបករណ៍អេឡិចត្រូនិក។
លោកថ្លែងថា៖ «យោងតាមសម្ទុះកំណើនសេដ្ឋកិច្ចប្រទេសនៅពេលនេះ គឺការនាំចូល និងនាំចេញរបស់កម្ពុជានឹងកើនឡើងបន្ថែមទៀត»។
អនុប្រធានសភាពាណិជ្ជកម្មកម្ពុជា លោក លឹម ហេង បាននិយាយថា ការកើនឡើងព្រមគ្នានៃចំណូលពន្ធគយ និងពន្ធផ្ទៃក្នុង (ពន្ធដារ )មានន័យថា តម្រូវការប្រើប្រាស់ក្នុងស្រុក និងការនាំចេញរបស់កម្ពុជាមានកម្លាំងដូចគ្នា។ ប្រទេសកំពុងអភិវឌ្ឍន៍ គឺតែងមានតម្រូវការនាំចូលច្រើនមកអភិវឌ្ឍប្រទេស ព្រោះការផលិតក្នុងស្រុកនៅមានកម្រិត។ លោកបានលើកឧទាហរណ៍ថា ជាក់ស្តែងនៅពេលនេះ ទោះកម្ពុជាមានរោងចក្រផលិតដែកក្នុងស្រុក ក៏ដោយ ក៏តម្រូវការនាំចូលនៅតែមានច្រើនជាប្រចាំ។
លោកបញ្ជាក់ថា៖ «កំណើនចំណូលពន្ធ គឺជាសញ្ញាដ៏ល្អដែលបញ្ជាក់អំពីកំណើនសេដ្ឋកិច្ច និងភាពមមាញឹកនៃគ្រប់ចង្វាក់ផលិតកម្ម»៕