.jpg)
អំពូលភ្លើងដាក់តាំងលក់ក្នុងហាង ១ កន្លែងនៅភ្នំពេញ។ ភ្នំពេញ ប៉ុស្តិ៍
ភ្នំពេញៈ គម្រោងវិនិយោគលើរោងចក្រផលិតអំពូលភ្លើង អំពូលលម្អ គ្រឿងផ្គុំអំពូលលម្អ គ្រឿងអេឡិចត្រូនិក និងគ្រឿងបន្លាស់អេឡិចត្រូនិក ចំនួន ៤ ដែលមានទុនវិនិយោគ ២៤,១ លានដុល្លារ និងបង្កើតការងារបានចំនួន ៣ ៨១៧ កន្លែងត្រូវបានក្រុមប្រឹក្សាអភិវឌ្ឍន៍កម្ពុជា (CDC) អនុម័តឱ្យវិនិយោគ។ នេះបើយោងតាម CDC។
យោងតាមការផ្សព្វផ្សាយលើបណ្តាញសង្គម CDC កាលពីថ្ងៃទី ១២ ខែតុលា បានឱ្យដឹងថា តាមសំណើសុំវិនិយោគ CDC បានសម្រេចចេញវិញ្ញាបនបត្រចុះបញ្ជីឱ្យគម្រោងវិនិយោគចំនួន ៤ ដែលរួមមាន គម្រោងបង្កើតរោងចក្រផលិតអំពូលភ្លើង អំពូលលម្អ និងគ្រឿងផ្គុំរបស់អំពូលលម្អ នៃក្រុមហ៊ុន Gorgeous Lights Co., Ltd ដែលស្ថិតនៅក្នុងស្រុកស្វាយជ្រំ ខេត្តស្វាយរៀងមានទុនវិនិយោគ ៨,១ លានដុល្លារ និងគម្រោងបង្កើតរោងចក្រផ្គុំដំឡើងអំពូលភ្លើង គ្រឿងអេឡិចត្រូនិក និងគ្រឿងបន្លាស់អេឡិចត្រូនិកនៃក្រុមហ៊ុន Lingbenyang Optoelectronics (Cambodia) Co., Ltd ស្ថិតនៅស្រុកត្រាំកក់ ខេត្តតាកែវ មានទុនវិនិយោគ ៥,២ លានដុល្លារ។
ចំណែកគម្រោង ២ ទៀតរួមមាន គម្រោងបង្កើតរោងចក្រផលិតគ្រឿងអេឡិចត្រូនិកគ្រប់ប្រភេទ អំពូលភ្លើង និងគ្រឿងផ្គុំអំពូលភ្លើងរបស់ក្រុមហ៊ុន JT Electronics Co.,Ltd នៅស្រុកស្វាយជ្រំ ខេត្តស្វាយរៀង មានទុនវិនិយោគ ៥,៤ លានដុល្លារ និងគម្រោងបង្កើតរោងចក្រផលិតដើមណូអែល អំពូលភ្លើងលម្អដើមណូអែល សម្ភារគ្រប់ប្រភេទសម្រាប់តុបតែងលម្អនិងវត្ថុអនុស្សាវរីយ៍របស់ក្រុមហ៊ុន Foreststar Tree Industrial (Cambodia) Co., Ltd. នៅក្នុងតំបន់សេដ្ឋកិច្ចពិសេស ហាយ ផាក ខេត្តស្វាយរៀង មានទុនវិនិយោគ ៥,៤ លានដុល្លារ។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ ភ្នំពេញ ប៉ុស្តិ៍ ក្នុងថ្ងៃទី ១៣ ខែតុលាថា ជម្លោះពាណិជ្ជកម្មរវាងមហាអំណាចសេដ្ឋកិច្ចធំទាំង ២ អាមេរិក និងចិន ដែលជំរុញឱ្យមានការដំឡើងពន្ធរវាងគ្នា និងការទទួលបានភាពអនុគ្រោះពន្ធនាំចូលពីប្រទេសធំៗបានធ្វើឱ្យប្រទេសកម្ពុជាក្លាយជាទីតាំងដ៏មានសក្តានុពលសម្រាប់ការបណ្តាក់ទុន។
លោកបញ្ជាក់ថា៖ «កម្ពុជាកំពុងទទួលបានកំណើនការចូលមកបណ្តាក់ទុនកាន់តែច្រើននាពេលថ្មីៗនេះ ជាពិសេសលើផលិតផលដែលទទួលបានការលើកលែងពន្ធពីប្រទេសធំៗ។ ជាក់ស្តែងការផ្តល់ភាពអនុគ្រោះពន្ធនាំចូលសម្រាប់ផលិតផលបន្ទះសូឡាកម្ពុជាទៅកាន់ទីផ្សារអាមេរិកកាលពីពេលថ្មីៗ ក៏កំពុងទាក់ទាញឱ្យក្រុមហ៊ុនកាន់តែច្រើនចូលមកវិនិយោគនៅកម្ពុជាដើម្បីនាំចេញទៅទីផ្សារអាមេរិក»។
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ និយាយថា ស្ថានភាពនៃការវិនិយោគនៅកម្ពុជាកំពុងមានដំណើរការទៅមុខយ៉ាងល្អ ខណៈការវិនិយោគថ្មីៗ គឺមានគ្រប់វិស័យ ដែលខុសពីមុនពឹងផ្អែកភាគច្រើនលើវិស័យវាយនភណ្ឌ។ ការវិនិយោគលើរោងចក្រអំពូលភ្លើង គ្រឿងបរិក្ខារអគ្គិសនី និងអេឡិចត្រូនិក គឺពិតជាល្អ ព្រោះជាផលិតផលមានតម្រូវការទីផ្សារច្រើន និងមានប្រើប្រាស់បច្ចេកវិទ្យា។
លោកប្រាប់ថា៖ «កម្ពុជាកំពុងក្លាយជាកន្លែងមានភាពទាក់ទាញក្នុងការបណ្តាក់ទុន ព្រោះក្រៅពីសម្បូរកម្លាំងពលកម្ម និងមានច្បាប់វិនិយោគអំណោយផល ប្រទេសនេះក៏មានទីផ្សារនាំចេញច្រើន និងមានប្រព័ន្ធអនុគ្រោះពន្ធទៀតផង»៕
