ភ្នំពេញៈ ចំពោះរដ្ឋាភិបាលបានសម្រេចជាគោលការណ៍ដល់ក្រុមហ៊ុន ហ្គោលដិនទ្រី ដើម្បីបោះផ្សាយសញ្ញាបណ្ណបៃតងនៅផ្សារមូលបត្រកម្ពុជា (CSX) ដែលបានអនុលោមទៅតាមគោលការណ៍ណែនាំនៃសញ្ញាបណ្ណបៃតងអាស៊ាន។ មន្ត្រីផ្សារមូលបត្រកម្ពុជាបានថ្លែងថា ក្រុមហ៊ុនអាចនឹងធ្វើការបោះផ្សាយប្រភេទមូលបត្របៃតងនេះនៅដើមខែវិច្ឆិកាឆាប់ៗខាងមុខ។
កាលពីថ្ងៃទី ១២ ខែតុលា ក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ (អ.ស.ហ.) បានផ្តល់ការអនុញ្ញាតជាគោលការណ៍លើសំណើសុំបោះផ្សាយលក់មូលបត្របំណុលជាសាធារណៈជាប្រភេទសញ្ញាប័ណ្ណបៃតងដំបូងគេនៅកម្ពុជារបស់ក្រុមហ៊ុន ហ្គោលដិនទ្រី នេះបើយោងតាមនិយតករមូលបត្រកម្ពុជា។
«សញ្ញាប័ណ្ណបៃតងដំបូងនេះ គឺបានរៀបចំស្របតាមគោលការណ៍ណែនាំនៃសញ្ញាប័ណ្ណបៃតងអាស៊ានផងដែរ ដែលការណ៍នេះ ការបោះផ្សាយនេះនឹងមានការទទួលស្គាល់ជាសញ្ញាប័ណ្ណបៃតងអាស៊ាន»។ នេះបើយោងតាម SERC។
លោក ស៊ូ សុជាតិ អគ្គនាយកនៃ SERC បានថ្លែងប្រាប់ភ្នំពេញ-ប៉ុស្តិ៍កាលពីម្សិលមិញថា ការសម្រេចរបស់ អ.ស.ហ.គឺជាការបើកផ្លូវឱ្យក្រុមហ៊ុនបន្តនីតិវិធីបោះផ្សាយនៅលើផ្សារមូលបត្រកម្ពុជា។ លោកបានថ្លែងថា៖ «ការបោះផ្សាយសញ្ញាប័ណ្ណបៃតងគឺឆ្លុះបញ្ចាំងអំពីការបោះជំហានមួយដំណាក់កាលទៀតនៃការអភិវឌ្ឍរបស់វិស័យមូលបត្រយើង គឺមានន័យថាចាប់ពីពេលនេះតទៅគឺយើងមិនត្រឹមតែមានសញ្ញាប័ណ្ណធម្មតានោះទេ គឺពេលនេះយើងក៏មានការបោះផ្សាយសញ្ញាប័ណ្ណបៃតងដែលគោរពទៅតាមគោលការណ៍បោះផ្សាយសញ្ញាប័ណ្ណបៃតងអាស៊ាន»។
«ដូច្នេះ សម្រាប់ក្រុមហ៊ុនបន្ទាប់ពីចុះបញ្ជីទីផ្សាររួចរាល់ហើយនោះ ក្រុមហ៊ុននឹងទទួលនូវ ASEAN Label on Green Bond ដែលអនុញ្ញាតឱ្យឈ្មោះរបស់ក្រុមហ៊ុនត្រូវបានផ្សព្វផ្សាយទូទាំងអាស៊ាន។ ក្នុងករណីដែលក្រុមហ៊ុនមាន បំណងចង់ធ្វើការបោះផ្សាយបន្ថែមតាមក្រោយទៀត ខ្ញុំគិតថាក្រុមហ៊ុនអាចទាក់ទាញវិនិយោគិនពីក្រៅប្រទេសបានច្រើនពាក់ព័ន្ធនឹងការវិនិយោគលើផ្នែកបៃតងនេះ»។ នេះបើយោងតាមការថ្លែងអះអាងរបស់លោក ស៊ូ សុជាតិ។
លោក ហុង សុហួរ អគ្គនាយក CSX បានប្រាប់ភ្នំពេញប៉ុស្តិ៍នៅថ្ងៃទី ៦ ខែតុលាថា ជាមួយការបោះផ្សាយសញ្ញាប័ណ្ណនេះ ក្រុមហ៊ុនគ្រោងកៀរគរទឹកប្រាក់ប្រមាណ ៣ លានដុល្លារ សម្រាប់រយៈពេល ៥ ឆ្នាំជាមួយអត្រាការប្រាក់ ៧ ភាគរយ។ ដូច្នេះជាមួយការសម្រេចជាគោលការណ៍ពី អ.ស.ហ ការចុះបញ្ជីក៏អាចនឹងកើតឡើងឆាប់ៗក្នុងខែវិច្ឆិកាខាងមុខនេះ។
កាលពីថ្ងៃទី ៨ ខែតុលាឆ្នាំ ២០២២ កន្លងមកនេះ សាជីវកម្មហិរញ្ញវត្ថុអន្តរជាតិ (IFC) ដែលជាក្រុមហ៊ុនបុត្រសម្ព័ន្ធរបស់ធនាគារពិភពលោកបានទទួលស្គាល់អគារការិយាល័យ VTrustTower គ្រប់គ្រងដោយក្រុមហ៊ុន ហ្គោលដិនទ្រី សម្រាប់អគារការិយាល័យពាណិជ្ជកម្មបៃតងដំបូងគេក្នុងប្រទេសកម្ពុជាតាមប្រព័ន្ធ Edge ដែលជាប្រព័ន្ធផ្តល់វិញ្ញាបនបត្រអគារបៃតងមួយ ដែលមានការទទួលស្គាល់ជាអន្តរជាតិ៕