ភ្នំពេញៈ រដ្ឋមន្ត្រីក្រសួងពាណិជ្ជកម្មកម្ពុជា លោក ប៉ាន សូរស័ក្តិ បានស្នើឯកអគ្គរដ្ឋទូតប្រទេសតួកគី ឱ្យជួយកៀរគរធុរជន និងវិនិយោគិនតួកគីចូលមកបណ្តាក់ទុនក្នុងវិស័យកសិកម្ម កសិ-ឧស្សាហកម្ម និងការកែច្នៃម្ហូបតាមស្តង់ដាហាឡាល ព្រមទាំងបើកជើងហោះហើរត្រង់មកកម្ពុជា ខណៈកម្ពុជាគឺជាប្រទេសមានវត្ថុធាតុដើមច្រើនសម្រាប់គាំទ្រដល់ចង្វាក់ផលិតកម្មលើគ្រប់វិស័យ។
នៅក្នុងជំនួបជាមួយលោកស្រី ÜlküKocaefe ឯកអគ្គរដ្ឋទូតទើបតែងតាំងថ្មីនៃសាធារណរដ្ឋតួកគី ប្រចាំកម្ពុជានៅទីស្តីការក្រសួងពាណិជ្ជកម្ម កាលពីរសៀលថ្ងៃទី ១៣ ខែតុលា លោកប៉ាន សូរស័ក្ដិ បានលើកឡើងថា ប្រទេសកម្ពុជាបានក្លាយជាទីតាំងដ៏មានសក្តានុពលសម្រាប់ការវិនិយោគ ជាមួយនឹងហេដ្ឋារចនាសម្ព័ន្ធរូបវន្តកកើតថ្មីៗដែលជាកត្តាអំណោយផលដល់ការធ្វើពាណិជ្ជកម្ម និងការចូលរួមខ្សែចង្វាក់ផលិតកម្មក្នុងតំបន់ និងពិភពលោក។
លោកថ្លែងថា៖ «ក្នុងន័យនេះ ខ្ញុំសូមស្នើឱ្យលោកស្រីបន្តកៀរគរធុរជន និងវិនិយោគិនតួកគីមកធ្វើការវិនិយោគនៅកម្ពុជា ជាពិសេសក្នុងវិស័យកសិកម្ម កសិឧស្សាហកម្ម និងការកែច្នៃម្ហូបតាមស្តង់ដាហាឡាល ដែលកម្ពុជា មានវត្ថុធាតុដើមសម្បូរបែប រួមមានកៅស៊ូ ដំឡូងមី ស្រូវ ស្វាយ ចេក ជាដើម។ បន្ថែមលើនេះ ខ្ញុំក៏ស្នើឱ្យមានការតភ្ជាប់ជើង ហោះហើរត្រង់ និងកិច្ច សហប្រតិបត្តិការផ្នែកហាឡាលផងដែរ»។
ជាការឆ្លើយតប លោកស្រី ÜlküKocaefe បានកោតសរសើរចំពោះសម្ទុះនៃការអភិវឌ្ឍខឿន សេដ្ឋកិច្ចកម្ពុជា ដែលឆ្លុះបញ្ចាំងឱ្យឃើញតាមរយៈភាពធន់នៃសេដ្ឋកិច្ច និងភាពអាចផ្គត់ផ្គង់ដោយខ្លួនឯង បានតាមរយៈអតិរេកស្បៀងបម្រុងរបស់កម្ពុជា ពិសេសនាអំឡុងវិបត្តិនានាក្នុងពិភពលោក។ ជាមួយគ្នា នេះ លោកស្រីក៏បានបង្ហាញឆន្ទៈនិងគោលជំហរក្នុងការលើកកម្ពស់កិច្ចសហប្រតិបត្តិការលើគ្រប់វិស័យឱ្យកាន់តែស៊ីជម្រៅ ជាពិសេសពាណិជ្ជកម្ម វិនិយោគ ការអប់រំ និងកិច្ចការហាឡាល និងព្យាយាមជំរុញការតភ្ជាប់ជើង ហោះហើរត្រង់រវាងកម្ពុជា និងតួកគី។
តាមរយៈកិច្ចសហប្រតិបត្តិការល្អរវាងប្រទេសទាំង ២ លោកស្រី ÜlküKocaefe បានបញ្ជាក់ ថា៖«នឹង មានការបង្កើតការិយាល័យពាណិជ្ជកម្មនៅស្ថានទូតតួកគីប្រចាំកម្ពុជា ដើម្បីជំរុញបង្កើនទំហំពាណិជ្ជកម្ម និងការវិនិយោគទ្វេភាគីកាន់តែប្រសើរ»។
ក្នុង ជំនួបពិភាក្សាខាងលើ ភាគីទាំង ២ ក៏បានបញ្ជាក់អំពីកិច្ចសហការគ្រប់ជ្រុងជ្រោយរវាងប្រទេសទាំង ២ ជាពិសេសតាមរយៈយន្តការគណៈកម្មការសេដ្ឋកិច្ចចម្រុះកម្ពុជា-តួកគី ដែលកិច្ចប្រជុំលើកទី៣ គ្រោងនឹងធ្វើនៅរាជធានីភ្នំពេញនាពេលខាងមុខ។ ចាប់តាំងពីឆ្នាំ ២០១៥ មក គណៈកម្មការសេដ្ឋកិច្ចចម្រុះកម្ពុជា-តួកគី បានដើរតួនាទីយ៉ាងសំខាន់ក្នុងការពង្រីក និងពង្រឹងកិច្ចសហប្រតិបត្តិការទ្វេភាគីលើគ្រប់វិស័យអាទិភាព មួយចំនួនដូចជា សេដ្ឋកិច្ច ពាណិជ្ជកម្ម វិនិយោគ ទេសចរណ៍ អប់រំ កសិកម្ម សុខាភិបាល ឧស្សាហកម្ម វិទ្យាសាស្ត្រនិងបច្ចេកវិទ្យា។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ ភ្នំពេញ ប៉ុស្តិ៍ កាលពីថ្ងៃទី ១៦ ខែតុលា ថា ទោះបីទំនាក់ទំនងការទូត និងពាណិជ្ជកម្មរវាងកម្ពុជា-តួកគី បានកើតមានជាយូរមកហើយ ប៉ុន្តែវាទើបតែត្រូវបានរឹតបន្តឹងខ្លាំងចាប់ពីឆ្នាំ ២០១៨ ពីក្រោយដំណើរទស្សនកិច្ចរបស់លោកនាយករដ្ឋមន្ត្រី ហ៊ុន សែន ទៅកាន់ប្រទេសតួកគី ដែលពេលនោះក៏មានការចុះកិច្ចព្រមព្រៀងកិច្ចសហប្រតិបត្តិការទ្វេភាគីផ្នែកសេដ្ឋកិច្ច-ពាណិជ្ជកម្ម និងវិស័យមួយចំនួនទៀត។
លោកប្រាប់ទៀតថា កាលពីដើមឆ្នាំ ២០២២ ក្នុងឱកាសបើកស្ថានទូតកម្ពុជានៅក្នុងទីក្រុងអង់ការ៉ា ប្រទេសតួកគី ថ្នាក់ដឹកនាំសភាពាណិជ្ជកម្មកម្ពុជាក៏បានជួបពិភាក្សាការងារជាមួយក្រុមពាណិជ្ជករ សហគមន៍ និងសមាគមពាណិជ្ជកម្មមួយចំនួនដើម្បីជំរុញទំនាក់ទំនងពាណិជ្ជកម្មទ្វេភាគីឱ្យកាន់តែប្រសើរ។ នៅពេលជំងឺកូវីដ ១៩ អាចគ្រប់គ្រងបាន និងសង្គ្រាមរវាងរុស្ស៊ី-អ៊ុយក្រែន មានភាពធូរស្រាលនឹងមានវិនិយោគិនតួកគីជាច្រើនធ្វើដំណើរមកកម្ពុជាដើម្បីស្វែងរកឱកាសវិនិយោគ។
លោកបញ្ជាក់ថា៖«ខ្ញុំគិតថា តួកគី គឺជាប្រទេសមានសក្តានុពលមួយដែលអាចនឹងមានអ្នកវិនិយោគចូលមកបណ្តាក់ទុននៅកម្ពុជា ព្រោះប្រទេសនេះនៅជាប់ទ្វីបអាស៊ីផង និងអឺរ៉ុបផង និងជាទីផ្សារថ្មីមួយរបស់កម្ពុជា។ តាមរយៈប្រទេសតួកគី ទំនិញកម្ពុជាក៏អាចឈានចេញទៅប្រទេសជិតខាងតួកគីផងដែរ»។
ក្នុងឆ្នាំ ២០២១ ទំហំពាណិជ្ជកម្មរវាងកម្ពុជា-តួកគីមានតម្លៃសរុបប្រមាណ ៩០ លានដុល្លារ។ ដោយឡែកក្នុងរយៈពេល ៨ ខែដើមឆ្នាំ ២០២២ ទំហំពាណិជ្ជកម្មទ្វេភាគីមានចំនួន ៨៥ លានដុល្លារ។ មុខទំនិញសំខាន់ៗសម្រាប់ពាណិជ្ជកម្មទ្វេភាគីរួមមាន វាយនភណ្ឌនិងសម្លៀកបំពាក់ ស្បែកជើង អង្ករ កៅស៊ូ គ្រឿងបរិភោគ បរិធានអគ្គិសនី យានយន្ត រ៉ែ ជាដើម។ នេះបើយោងតាមក្រសួងពាណិជ្ជកម្ម៕