.jpg)
កំពង់ផែស្វយ័តភ្នំពេញ ឃុំបន្ទាយដែក ស្រុកកៀនស្វាយ ខេត្តកណ្ដាល ហេង ជីវ័ន
កំពង់ផែស្វយ័តភ្នំពេញ (PPAP) ដែលជាសហគ្រាសគ្រប់គ្រងដោយរដ្ឋចុះបញ្ជីលើផ្សារហ៊ុនទទួលបានប្រាក់ចំណូលជាង ៣០ លានដុល្លារពីប្រតិបត្តិការអាជីវកម្មក្នុងរយៈពេល ៩ ខែដំបូង ពោលគឺកើនឡើង ២១ ភាគរយបើធៀបនឹងឆ្នាំមុន បើទោះបីជាភាពមិនប្រាកដប្រជាសេដ្ឋកិច្ចសកល និងតំបន់ដែលបណ្តាលមកពីការរីករាលដាលរជំងឺកូវីដ ១៩ រយៈពេលយូរ និងសង្គ្រាមអ៊ុយក្រែនក៏ដោយ។
យោងតាមរបាយការណ៍ហិរញ្ញវត្ថុដែលមិនទាន់បានធ្វើសវនកម្មដែលបានផ្ញើទៅផ្សារមូលបត្រកម្ពុជានៅថ្ងៃទី ១២ ខែធ្នូ ប្រាក់ចំណូលសរុបរបស់ PPAP ដែលជាចំណូលពីប្រតិបត្តិការផែមានតម្លៃជាង ២៥ លានដុល្លារ កើនឡើង ២៦ ភាគរយ។ចំណូលពីអាជ្ញាធរផែមានតម្លៃជាង ៣,១៩ លានដុល្លារ កើនឡើង ២០ ភាគរយ ចំណូលពីសេវាកម្មផ្សេងៗមានតម្លៃ ២១២ ២៨៧ ដុល្លារ ធ្លាក់ចុះ ១៣ ភាគរយ ចំណូលផ្សេងៗមានតម្លៃជិត ១,៩ លានដុល្លារធ្លាក់ចុះ ១៣ ភាគរយ។
ថ្លែងទៅកាន់កាសែត ភ្នំពេញ ប៉ុស្តិ៍ កាលពីពេលថ្មីៗនេះថា លោកស្រី គឹម សុផានីតា នាយិកា CSX ទទួលបន្ទុកប្រតិបត្តិការទីផ្សាមានប្រសាសន៍ថា ប្រសិទ្ធភាពនៃការគ្រប់គ្រងជំងឺកូវីដ ១៩ របស់រដ្ឋាភិបាល ជាកាតាលីករក្នុងការជំរុញឱ្យមានសកម្មភាពសេដ្ឋកិច្ចកាន់តែប្រសើរ។
នៅខែកក្កដា PPAP គ្រោងនឹងពង្រីកចំនួនចំណតផែរណបក្រោមការត្រួតពិនិត្យរបស់ខ្លួនចំនួន ៧ ដើម្បីធានាបាននូវភាពងាយស្រួលកាន់តែច្រើនសម្រាប់អតិថិជន និងកាត់បន្ថយការចំណាយ និងសន្សំពេលវេលា។
កាលពីខែមីនា លោក ហ៊ឺ បាវី អគ្គនាយក PPAP ដែលពុំអាចទាក់ទងបានកាលពីម្សិលមិញ ធ្លាប់បានមានប្រសាសន៍ថា អត្រាការចាក់វ៉ាក់សាំងបង្ការវីរុសកូរ៉ូណាកម្រិតខ្ពស់នៅក្នុងតំបន់ និងកន្លែងផ្សេងទៀតបានអភិវឌ្ឍក្នុងកម្រិតប្រកបដោយអត្ថន័យនៃភាពស៊ាំក្នុងសហគមន៍ កាត់បន្ថយផលប៉ះពាល់ជំងឺកូវីដ ១៩ និងជំរុញឱ្យប្រទេសនានាចាប់ផ្តើមសកម្មភាពសេដ្ឋកិច្ចឡើងវិញយ៉ាងទូលំទូលាយ។ លោកបានអះអាងថា ការណ៍នេះនឹងបង្កើនកុងតឺន័រឆ្លងកាត់នៅចំណតកំពង់ផែនេះ។
យោងតាមរបាយការណ៍ហិរញ្ញវត្ថុរបស់ PPAP ក្នុងរយៈពេល ៩ ខែដំបូង បរិមាណដឹកជញ្ជូនទំនិញ និងប្រេងឥន្ធនៈតាមរយៈកំពង់ផែមានជាង ៣ លានតោន កើនឡើង ៥,២៣ ភាគរយ។ នាវាផ្ទុកទំនិញឆ្លងកាត់មានចំនួន ២,៧៤៣ ជើង កើនឡើង ៥៧,២៨ ភាគរយ។ នាវាទេសចរណ៍មានចំនួន ១៦ ជើងកើនឡើង ១៦ ភាគរយបរិមាណកុងតឺន័រមានចំនួន ៣២៩,០៤៣ TEUs កើនឡើង ២៨,៣៣ ភាគរយ និងបរិមាណអ្នកដំណើរមានចំនួន ៨៦៨ នាក់ កើនឡើង ៨៦៨ ភាគរយ៕
