.jpg)
ជញ្ជីងពាណិជ្ជកម្មរបស់កម្ពុជាសរុបមានទឹកប្រាក់ជាង ៤១ ពាន់លានដុល្លារ ក្នុងនោះការនាំចេញសរុបមានទឹកប្រាក់ជាង ១៧ ពាន់លានដុល្លារកើនឡើងជាង ២២ ភាគរយ ខណៈទឹកប្រាក់ការនាំចូលសរុបមានជាង ២៣,៧ ពាន់លានដុល្លារ។ ហុង មិនា
ភ្នំពេញៈ កម្ពុជាទទួលរងនូវឱនភាពនៃជញ្ជីងពាណិជ្ជកម្មប្រមាណ ២៧ ភាគរយ ឬគិតជាប្រាក់ប្រមាណ ៦,៥ ពាន់លានដុល្លារក្នុងរយៈពេល ៩ ខែដើមឆ្នាំនេះ ខណៈក្រុមអ្នកសេដ្ឋកិច្ចបានអះអាងថា ឱនភាពពាណិជ្ជកម្មនេះមិនបានបង្ហាញសញ្ញាអវិជ្ជមានដល់ស្ថានភាពម៉ាក្រូសេដ្ឋកិច្ច ឬជំរុញឱ្យមានកំណើនគំហុកនៃអតិផរណានោះទេ តែវាឆ្លុះបញ្ចាំងពីការកើនឡើងនៃសកម្មភាពសេដ្ឋកិច្ចល្អប្រសើរ បន្ទាប់ពីភាពធូរស្រាលនៃការរីករាលដាលជំងឺកូវីដ ១៩ ដែលជំរុញឱ្យមានការកើនឡើងនៃតម្រូវការក្នុងស្រុក។
យោងតាមស្ថិតិរបស់អគ្គនាយកដ្ឋានគយ និងរដ្ឋាករ កម្ពុជាចេញផ្សាយកាលពីថ្ងៃទី ១០ ខែតុលា ជញ្ជីងពាណិជ្ជកម្មរបស់កម្ពុជាសរុបមានទឹកប្រាក់ជាង ៤១ ពាន់លានដុល្លារ ក្នុងនោះការនាំចេញសរុបមានទឹកប្រាក់ជាង ១៧ ពាន់លានដុល្លារកើនឡើងជាង ២២ ភាគរយ ខណៈទឹកប្រាក់ការនាំចូលសរុបមានជាង ២៣,៧ ពាន់លានដុល្លារ ដែលធ្វើឱ្យជញ្ជីងពាណិជ្ជកម្មកម្ពុជាមានឱនភាពជាង ៦,៥ ពាន់លានដុល្លារ។
អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា លោក គី សេរីវឌ្ឍន៍ បានប្រាប់ភ្នំពេញប៉ុស្តិ៍កាលពីម្សិលមិញថា ការកើនឡើងការនាំចូលនេះឆ្លុះបញ្ចាំងពីសម្ទុះនៃសេដ្ឋកិច្ចរបស់កម្ពុជា ដោយសារតែការកើនឡើងនេះ គេអាចប្រៀបធៀបនឹងឆ្នាំ ២០២១ ដែលប្រទេសកម្ពុជាយើងជួបប្រទះនឹងវិបត្តិសុខភាព។
លោកថ្លែងថា៖ «នៅពេលវិបត្តិសុខភាពបានធូរស្រាល គឺវាទាមទារឱ្យយើងធ្វើការនាំចូលច្រើន ដោយសារតែយើងមិនអាចផលិតគ្រប់តម្រូវការបានភ្លាមៗទេ ណាមួយការនាំចូលនេះក៏មានវត្ថុធាតុដើមទៅបំពេញក្នុងវិស័យផលិតកម្មផងដែរ។ ខ្ញុំសង្កេតឃើញថាការកើនឡើងការនាំចូលនេះ គឺវាមិនចោទជាបញ្ហាដល់សេដ្ឋកិច្ចរបស់យើងទេ ដោយសារតែយើងឃើញថា ការនាំចេញរបស់យើងក៏មានកំណើនច្រើនដែរ»។
លោកបានពន្យល់ថា បើក្រឡេកទៅមើលកំណើននៃការនាំចេញ និងការនាំចូល គឺការនាំចេញមានស្ថានភាពកាន់តែប្រសើរ ដែលជាកត្តាជំរុញឱ្យមានការនាំចូលនូវវត្ថុធាតុដើមចាំបាច់មួយចំនួន ដើម្បីបំពេញក្នុងវិស័យផលិតកម្ម។
លោកបញ្ជាក់ថា៖ «ខ្ញុំគិតថា បើយើងបង្កើន ឬរក្សាការនាំចេញក្នុងរង្វង់ចាប់ពី ២០ ភាគរយ ខណៈការនាំចូលកើនក្នុងរង្វង់ជាង ១០ ភាគរយនេះ គឺបង្ហាញថា ដំណើរការសេដ្ឋកិច្ចរបស់យើងល្អ ដូច្នេះប្រហែល ១០ ឆ្នាំទៅមុខ យើងនឹងឃើញជញ្ជីងទូទាត់យើងមានភាពវិជ្ជមានវិញ។ ដូច្នេះនៅក្នុងករណីនេះ ទាមទារឱ្យរដ្ឋាភិបាលយកចិត្តទុកដាក់ជំរុញវិស័យឧស្សាហកម្មធុនតូច និងមធ្យមឱ្យមានខ្លាំងទប់ជាមួយការនាំចូល ធ្វើដូច្នេះគឺយើងអាចពង្រឹងផលិតកម្មក្នុងស្រុក និងកាត់បន្ថយការនាំចូល»។
លោក ចាន់ សុផល នាយកនៃមជ្ឈមណ្ឌលសិក្សាគោលនយោបាយបានសរសេរនៅលើបណ្តាញសង្គមផ្ទាល់ខ្លួនរបស់លោកកាលពីពេលថ្មីៗនេះពាក់ព័ន្ធនឹងបញ្ហាអតិផរណាថា ប្រទេសមួយចំនួនកំពុងដោះស្រាយបញ្ហាអតិផរណាតាមរយៈការដំឡើងអត្រាការប្រាក់ដោយធនាគារកណ្ដាល ដែលជាធនាគាររដ្ឋមានឥទ្ធិពលទៅលើបរិមាណប្រាក់កម្ចី ដើម្បីកាត់បន្ថយតម្រូវការដែលធ្វើឱ្យទំនិញចុះថ្លៃ ឬមិនបន្តឡើងទៀត។
លោកចោទជាសំណួរសម្រាប់ករណីប្រទេសកម្ពុជាថា នៅប្រទេសកម្ពុជាតើគួរមានចំណាត់ការដូចប្រទេសអ្នកមានដែរឬទេក្នុងការគ្រប់គ្រងអតិផរណា? ពោលគឺគួរមានវិធានការបន្ថយតម្រូវការតាមវិធីបន្ថយលំហូរសាច់ប្រាក់នៅទីផ្សារដែរឬទេ?
លោកបានបកស្រាយថា៖ «ខ្ញុំយល់ថា យើងមិនគួរធ្វើដូចគេទេ។ យើងគួរពិនិត្យមើលការកាត់បន្ថយតម្រូវការទំនិញប្រើប្រាស់នាំចូលពីគេដែលមិនចាំបាច់។ ក៏ប៉ុន្តែការបន្ថយតម្រូវការជាទូទៅនឹងប៉ះពាល់ដល់តម្រូវការចាំបាច់របស់ប្រជាពលរដ្ឋខ្វះខាត។ គួរមានគោលនយោបាយបង្កើន ឬរក្សាប្រាក់ចំណូលរបស់ប្រជាពលរដ្ឋដែលនៅខ្វះខាត និងបង្កើនប្រសិទ្ធភាពការផលិតទំនិញដែលមានតម្រូវការ ជាពិសេសស្បៀងដែលមានសារៈសំខាន់សម្រាប់ជីវិត»។
កាលពីចុងខែកញ្ញា ធនាគារពិភពលោកបានព្យាករថា កំណើនផលិតផលក្នុងស្រុកសរុប (GDP) ពិតប្រាកដរបស់កម្ពុជា នឹងកើនឡើងដល់ ៤,៨ ភាគរយ សម្រាប់ឆ្នាំ ២០២២ នេះដែលគាំទ្រដោយការកើនឡើងនៃការនាំចេញសម្លៀកបំពាក់ ស្បែកជើង ទំនិញធ្វើដំណើរ និងឧស្សាហកម្មផលិតកង់ ក៏ដូចជាកសិកម្ម ដែលបន្តគាំទ្រការងើបឡើងវិញនៃសេដ្ឋកិច្ច៕
