ភ្នំពេញៈ ការបើកឱ្យដំណើរការសាកល្បងផ្លូវល្បឿនលឿនពីរាជធានីភ្នំពេញទៅកាន់ខេត្តព្រះសីហនុ និងការចង់ឃើញពីភាពរីកចម្រើនវិស័យសំណង់ និងហេដ្ឋារចនាសម្ព័ន្ធក្នុងខេត្ត ជួយឱ្យខេត្តព្រះសីហនុទទួលបានភ្ញៀវទេសចរយ៉ាងច្រើនចាប់តាំងពីដើមខែតុលាមក។ ជាក់ស្តែងរយៈពេល ២ ថ្ងៃ(ថ្ងៃទី ១៥-១៦ ខែតុលា) ចុងសប្តាហ៍កន្លងមក មានភ្ញៀវទេសចរប្រមាណ ១២៥ ០០០ នាក់បានធ្វើដំណើរទៅកម្សាន្តឆ្នេរក្នុងខេត្តព្រះសីហនុ។ នេះតាមតួលេខពីរដ្ឋបាលខេត្តព្រះសីហនុ។
តួលេខផ្លូវការរបស់រដ្ឋបាលខេត្តព្រះសីហនុ កាលពីថ្ងៃទី ១៧ ខែតុលា ឱ្យដឹងថា ភ្ញៀវទេសចរជាតិ និងអន្តរជាតិដែលមកលេងកម្សាន្តនៅខេត្តព្រះសីហនុនាចុងសប្ដាហ៍ថ្ងៃសៅរ៍ និងថ្ងៃអាទិត្យ កន្លងមក មានចំនួនសរុប ១២៥ ០០០ នាក់ ក្នុងនោះថ្ងៃសៅរ៍ មានប្រមាណ ជាង ៦០ ០០០នាក់។
បើយោងតាមរដ្ឋបាលខេត្ត៖ «កំណើនភ្ញៀវទេសចរនេះ គឺក្រោយមានការដាក់ឱ្យដំណើរការសាកល្បងផ្លូវល្បឿនលឿនភ្នំពេញ-ព្រះសីហនុ រយៈពេល ១ ខែ គឺចាប់ពីថ្ងៃទី ១ ដល់ថ្ងៃទី ៣១ ខែតុលា ឆ្នាំ ២០២២ ដោយមិនមានការបង់ប្រាក់ និងការអភិវឌ្ឍហេដ្ឋារចនាសម្ព័ន្ធ ការការពារសន្តិសុខ សណ្តាប់ធ្នាប់ អនាម័យ បរិស្ថានបានយ៉ាងល្អប្រសើរ ដែលជាការទាក់ទាញភ្ញៀវទេសចរជាតិ និងអន្តរជាតិចង់មកកម្សាន្តក្នុងខេត្តព្រះសីហនុ»។
លោក តាំង សុចិត្រគ្រឹះស្នា ប្រធានមន្ទីរទេសចរណ៍ខេត្តព្រះសីហនុ បានប្រាប់ ភ្នំពេញ ប៉ុស្តិ៍ កាលពីថ្ងៃទី១ ៧ ខែតុលាថា កំណើនភ្ញៀវដ៏ច្រើនដែលធ្វើដំណើរមកកម្សាន្តក្នុងខេត្តព្រះសីហនុ គឺបណ្តាលមកពីមូលហេតុចម្បងៗមួយចំនួនដូចជាការបើកឱ្យប្រើប្រាស់សាកល្បងផ្លូវល្បឿនលឿន(មិនគិតថ្លៃ), ការចង់ឃើញភាពរីកចម្រើនសំណង់អគារ និងហេដ្ឋារចនាសម្ព័ន្ធថ្មីៗក្នុងខេត្ត, និងការនាំក្រុមគ្រួសារមកមុជទឹកសមុទ្របន្ទាប់ពីអាក់ខានជាង ២ ឆ្នាំដោយសារតែវត្តមានជំងឺកូវីដ ១៩។ លោកបន្តថា ទោះយ៉ាងណាកំណើនភ្ញៀវនាពេលនេះ គឺជាទេសចរណ៍ផ្ទៃក្នុងតែប៉ុណ្ណោះ ខណៈភ្ញៀវទេសចរមកពីក្រៅប្រទេសនៅមិនទាន់កើនទេ។
លោកនិយាយថា៖ «ក្នុងនាមអាជ្ញាធរយើងពិតជារីករាយចំពោះកំណើនភ្ញៀវទេសចរមកកម្សាន្តក្នុងខេត្តព្រះសីហនុ ប៉ុន្តែទន្ទឹមនឹងនោះយើងក៏ត្រូវខំបន្ថែមទៀតក្នុងការផ្សព្វផ្សាយពីសក្តានុពលនៃវិស័យទេសចរណ៍កម្ពុជានៅលើឆាកអន្តរជាតិ តាមរយៈការរៀបចំឱ្យមានព្រឹត្តិការណ៍ធំៗ, ការធានាសុវត្ថិភាព, ការបង្កើតផលិតផលទេសចរណ៍ថ្មី, និងសេវាកម្មមានលក្ខណៈស្តង់ដាបន្ថែមទៀត ដើម្បីទាក់ទាញឱ្យពួកគេធ្វើដំណើរមកកម្ពុជាបានកាន់តែច្រើន»។
លោកលើកឡើងថា សម្រាប់ភ្ញៀវមកពីប្រទេសជិតខាង និងក្នុងតំបន់ គឺមានវិញជាបណ្តើរៗហើយ ប៉ុន្តែសម្រាប់ភ្ញៀវមកពីប្រទេសឆ្ងាយៗ គឺនៅមានចំនួនតិចតួចបំផុតនៅពេលនេះ។ ជាក់ស្តែងភ្ញៀវជនជាតិចិនដែលពីមុនមានយ៉ាងច្រើន គឺពេលនេះមិនសូវមានទេ។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បាននិយាយថា កំណើនភ្ញៀវទេសចរដែលធ្វើដំណើរទៅខេត្តព្រះសីហនុក្នុងរយៈពេល ២-៣ សប្តាហ៍មកនេះ បានបង្ហាញថា វិស័យទេសចរណ៍ក្នុងស្រុកចាប់ផ្តើមមានដំណើរការឡើងវិញហើយ។ កំណើនទេសចរដ៏ច្រើនក្នុងខេត្តព្រះសីហនុ គឺជាប់ទាក់ទងច្រើននឹងការបើកឱ្យប្រើផ្លូវល្បឿនលឿន ខណៈការរៀបចំទីក្រុង និងហេដ្ឋារចនាសម្ព័ន្ធនៅទីនោះក៏មានភាពស្រស់ស្អាតផងដែរ។
និយាយសំដៅដល់សណ្តាប់ធ្នាប់នៅតាមមាត់ឆ្នេរសមុទ្រ លោកស្រី ស៊ីវលីន បានបញ្ជាក់ថា ការរៀបចំរបស់រដ្ឋបាលខេត្តចំពោះកន្លែងអង្គុយលេង កន្លែងលក់ដូរ ចំណត និងកន្លែងកម្សាន្តនានា គឺមានសណ្តាប់ធ្នាប់ល្អជាងមុនច្រើន។
លោកស្រីបានបញ្ជាក់ថា៖ «ភាពល្អប្រសើរនៃវិស័យទេសចរណ៍នៅក្នុងខេត្តព្រះសីហនុ គឺមិនត្រឹមតែជួយបង្កើតការងារ និងប្រាក់ចំណូលដល់ផ្នែកពាក់ព័ន្ធដូចជា ភោជនីយដ្ឋាន កន្លែងស្នាក់នៅ សេវាដឹកជញ្ជូនប៉ុណ្ណោះទេ ប៉ុន្តែក៏ជួយបង្កើនចំណូលជាតិផងដែរ»។
ខេត្តព្រះសីហនុ ត្រូវបានរាជរដ្ឋាភិបាលកម្ពុជាកំណត់ជាតំបន់សេដ្ឋកិច្ចពិសេសគំរូពហុបំណង និងជាតារារះនាទិសនិរតី ដែលមានខេត្តជាប់សមុទ្រ ៤ មានដូចជា ខេត្តព្រះសីហនុ ខេត្តកោះកុង ខេត្តកែប និងខេត្តកំពត៕