ភ្នំពេញ៖ភ្ញៀវទេសចរជិត ១ លាននាក់បានធ្វើការដំណើរកម្សាន្តទៅកាន់រមណីយដ្ឋានទេសចរណ៍នានានៅសប្តាហ៍ទី២ ដោយមានកំណើន ១៥០,៤៥ ភាគរយធៀបនឹងសប្តាហ៍ទី១ នៃខែតុលានេះ ស្របពេលដែលតាមបណ្តាខេត្តមួយចំនួនបានប្រារព្ធកម្មវិធីចំព្រឹត្តិការណ៍ប្រណាំងទូក ជាពិសេសការដាក់ឱ្យដំណើរការសាកល្បងផ្លូវល្បឿនលឿនភ្នំពេញ-ក្រុងព្រះសីហនុកាលពីដើមខែតុលានេះ។
យោងតាមរបាយការណ៍ក្រសួងទេសចរណ៍ចេញផ្សាយនៅថ្ងៃទី ១៨ ខែតុលា ចំនួនភ្ញៀវទេសចរទូទៅក្នុងសប្តាហ៍ទី២ (ចាប់ពីថ្ងៃទី ១០-១៦ ខែតុលា ២០២២) ឡើងដល់ចំនួន ៩៣៨៩២៨ នាក់ ក្នុងនោះភ្ញៀវជាតិ ៩១៤៥៤៣ នាក់ និងភ្ញៀវបរទេសផ្ទៃក្នុង ២៤៣៨៥ នាក់។
សម្រាប់គោលដៅទេសចរណ៍សំខាន់ៗ រួមមាន៖ ខេត្តកំពង់ចាមមានចំនួន ៤០១៩២៩ នាក់; ខេត្តព្រះសីហនុ មានចំនួន ១៣៩៥៩១ នាក់;ខេត្តបាត់ដំបង មានចំនួន ១៣៥៨៩៩ នាក់; ខេត្តព្រៃវែង មានចំនួន ៦៨៥២៥ នាក់; ខេត្តពោធិ៍សាត់មានចំនួន ៥៩៨៤៥ នាក់; ខេត្តសៀមរាបមានចំនួន ២៧៨២២ នាក់និងខេត្តកំពតមានចំនួន ២៣២៤៦ នាក់។
ក្រសួងបានអះអាងថា៖ «កំណើនភ្ញៀវផ្ទៃក្នុងច្រើនក្នុងសប្តាហ៍កន្លងមក ដោយសាររដ្ឋបាលខេត្តកំពង់ចាម ព្រៃវែង និងពោធិ៍សាត់បានរៀបចំពិធីប្រណាំងទូក បណ្តែតប្រទីប អុជកាំជ្រួច និងតាំងពិព័រណ៍ ដែលបានទាក់ទាញភ្ញៀវទេសចរ និងប្រជាពលរដ្ឋជាច្រើនកុះករ»។
«ទន្ទឹមនឹងនេះ ខេត្តព្រះសីហនុបន្តទទួលបានភ្ញៀវទេសចរមកកម្សាន្តជាច្រើនក្នុងរយៈពេល ២ សប្តាហ៍ជាប់គ្នា បន្ទាប់ពីមានការដាក់ឱ្យដំណើរការសាកល្បងផ្លូវល្បឿនលឿនភ្នំពេញ-ព្រះសីហនុ រយៈពេល ១ ខែ ចាប់ពីថ្ងៃទី ១-៣១ ខែតុលា ឆ្នាំ ២០២២។បណ្តាខេត្តផ្សេងទៀតដែលនៅជាប់បណ្តោយដងទន្លេបានកំពុងត្រៀមរៀបចំព្រឹត្តិការណ៍ប្រណាំងទូក ទៅតាមពេលវេលាសមស្រប និងស្ថានភាពជាក់ស្តែងក្នុងមូលដ្ឋានរបស់ខ្លួន» នេះបើយោងតាមការបញ្ជាក់របស់ក្រសួងទេសចរណ៍។
លោក ធួន ស៊ីណាន ប្រធានសមាគមទេសចរណ៍អាស៊ី បាស៊ីហ្វិក (PATA) បានសាទរចំពោះការកើនឡើងនៃភ្ញៀវទេសចរនេះ ដែលវាបានឆ្លុះបញ្ចាំងអំពីការវិវឌ្ឍដ៏ល្អមួយនៃការងើបឡើងវិញនៃវិស័យទេសចរណ៍ដែលត្រូវបានញាំញីដោយបញ្ហាវិបត្តិសុខភាពសកលអស់រយៈពេលជាង ២ ឆ្នាំមកនេះ។
លោកបានមានប្រសាសន៍ថា៖ «វាជាសញ្ញាវិជ្ជមានមួយនៃដំណើរការងើបឡើងវិញនៃវិស័យទេសចរណ៍ដែលប្រជាពលរដ្ឋគាត់មានទំនុកចិត្តក្នុងការដើរកម្សាន្តជាងមុន។ ជាមួយគ្នានេះដែរយើងក៏សង្កេត ឃើញបណ្តាខេត្តមួយ ចំនួនក៏បានរៀបចំប្រណាំងទូកជាពិសេសការដាក់ឱ្យដំណើការសាកល្បងផ្លូវល្បឿនលឿនភ្នំពេញ-ក្រុងព្រះសីហនុដែលជំរុញឱ្យបងប្អូនប្រជាពលរដ្ឋដើរកម្សាន្តច្រើនផងដែរ»។
លោក តាំង សុចិត្រគ្រឹះស្នា ប្រធានមន្ទីរទេសចរណ៍ខេត្តព្រះសីហនុ បានប្រាប់ ភ្នំពេញ ប៉ុស្តិ៍ កាលពីថ្ងៃទី ១៧ ខែតុលាថា កំណើនភ្ញៀវទេសចរដ៏ច្រើនដែលបានធ្វើដំណើរមកកម្សាន្តក្នុងខេត្តព្រះសីហនុ គឺបណ្តាលមកពី ការបើកឱ្យប្រើប្រាស់សាកល្បងផ្លូវល្បឿនលឿន (មិនគិតថ្លៃ), ការចង់ឃើញភាពរីកចម្រើនសំណង់អគារ និងហេដ្ឋារចនាសម្ព័ន្ធថ្មីៗក្នុងខេត្ត។ ទោះយ៉ាងណា លោកថា កំណើនភ្ញៀវនាពេលនេះ គឺជាទេសចរផ្ទៃក្នុងតែប៉ុណ្ណោះ ខណៈភ្ញៀវទេសចរមកពីក្រៅប្រទេសនៅមិនទាន់កើនឡើងនោះទេ។
លោកនិយាយថា៖«ក្នុងនាមអាជ្ញាធរយើងពិតជារីករាយចំពោះកំណើនភ្ញៀវទេសចរមកកម្សាន្តក្នុងខេត្តព្រះសីហនុ ប៉ុន្តែទន្ទឹមនឹងនោះយើងក៏ត្រូវខិតខំបន្ថែមទៀតក្នុងការផ្សព្វផ្សាយពីសក្តានុពលនៃវិស័យទេសចរណ៍កម្ពុជាលើឆាកអន្តរជាតិ»។
លោកលើកឡើងទៀតថា សម្រាប់ភ្ញៀវទេសចរមកពីប្រទេសជិតខាង និងក្នុងតំបន់ គឺមានវិញជាបណ្តើរៗហើយ ប៉ុន្តែសម្រាប់ភ្ញៀវមកពីប្រទេសឆ្ងាយៗ គឺនៅមានចំនួនតិចតួចបំផុតនៅពេលនេះ៕