.jpg)
ប្រជាកសិករប្រមូលស្រូវដែលម៉ាស៊ីនបោករួច ច្រកចូលការុង។ ហេង ជីវ័ន
ភ្នំពេញៈ ប្រធានសហព័ន្ធស្រូវអង្ករកម្ពុជា (CRF) និងអ្នកនាំចេញបានបង្ហាញពីក្តីបារម្ភពាក់ព័ន្ធនឹងការអូសបន្លាយពេលនៃគ្រោះទឹកជំនន់ ដែលបណ្តាលមកពីទឹកភ្លៀងក្នុងរយៈពេលប៉ុន្មានខែចុងក្រោយនេះ ហើយកំពុងបង្កផលប៉ះពាល់ទៅដល់ដំណាំស្រូវរបស់ប្រជាកសិករ ជាពិសេសនៅតាមបណ្តាខេត្តមានសក្តានុពល ដែលអាចនឹងធ្វើឱ្យមានការថយចុះនូវកំណើនការនាំចេញនៅដើមឆ្នាំក្រោយ។
យោងតាមរបាយការណ៍បឋមរបស់ក្រសួងសេដ្ឋកិច្ច និងហិរញ្ញវត្ថុ គិតត្រឹមថ្ងៃទី ១២ ខែតុលា ដំណាំស្រូវដែលទទួលរងផលប៉ះពាល់ ដោយសារទឹកជំនន់ គឺមានប្រមាណជាង ២ សែនហិកតា ផ្ទៃដីដំណាំស្រូវដែលរងការខូចខាតមានជាង ៨៥ ពាន់ហិកតា និងផ្ទៃដីដំណាំស្រូវដែលអាចស្តារឡើងវិញមានចំនួនជាង ៤៨ ពាន់ហិកតា។
ប្រធាន CRF លោក សុង សារ៉ន បានបង្ហាញក្តីកង្វល់ចំពោះការអូសបន្លាយពេលនៃគ្រោះទឹកជំនន់ឆ្នាំនេះ ដែលបង្កឱ្យមានផលប៉ះពាល់ដល់ទិន្នផលដំណាំស្រូវនៅតាមបណ្តាខេត្តសក្តានុពលស្រូវ-អង្កររបស់កម្ពុជា។ លោកលើកឡើងថា ការប្រែប្រួលអាកាសធាតុបានបង្កនូវក្តីបារម្ភជារួមនៃបណ្តាប្រទេសទាំងឡាយជុំវិញពិភពលោក ដែលបង្កឱ្យមានគ្រោះធម្មជាតិ ជាពិសេសទឹកជំនន់ធ្វើឱ្យប៉ះពាល់ដល់សន្តិសុខស្បៀង។
លោកថ្លែងថា៖ «ទឹកជំនន់ធំឆ្នាំនេះធ្វើឱ្យប៉ះពាល់ដល់បងប្អូនកសិករយើងជាច្រើន។ យើងសង្កេតឃើញ មានប្រជាពលរដ្ឋខ្លះប្រមូលផលមិនទាន់រួចរាល់ផងក៏ទទួលរងនូវទឹកលិចបណ្តាលឱ្យខូចខាតដំណាំស្រូវរបស់ពួកគាត់»។
លោកបន្តថា៖ «ពេលទឹកស្រកចុះទៅវិញនោះ ប្រជាកសិករនឹងធ្វើការដាំដុះឡើងវិញដែលនឹងត្រូវចំណាយពេលប្រមាណ ៤ ខែ ដូច្នេះប្រាកដណាស់នឹងធ្វើឱ្យការនាំចេញរបស់យើងអាចរាំងស្ទះខ្លះៗ សម្រាប់ដើមឆ្នាំក្រោយ ដោយសារតែយើងពុំមានស្រូវដើម្បីកិន»។
លោក អែនឌី ឡាយ អគ្គនាយកក្រុមហ៊ុន City Rice Import Export បានប្រាប់ភ្នំពេញប៉ុស្តិ៍ថា សម្រាប់ឆ្នាំ ២០២២ នេះ ទឹកបានជន់លិចខ្លាំងនៅបណ្តាខេត្តសំខាន់ដែលជាជង្រុកស្រូវកម្ពុជាដូចជា ខេត្តកំពង់ធំ បាត់ដំបង និងខេត្តបន្ទាយមានជ័យ ដែលអាចធ្វើឱ្យប៉ះពាល់ខ្លះដល់ការនាំចេញនៅដើមឆ្នាំក្រោយ។
លោកអះអាងថា៖ «ខ្ញុំគិតថាសម្រាប់ឆ្នាំនេះការនាំចេញរបស់យើងគឺនឹងមិនមានបញ្ហាទេ ប៉ុន្តែការនាំចេញអាចនឹងមានការធ្លាក់ចុះខ្លះនៅដើមឆ្នាំក្រោយ ដោយសារតែគ្រោះទឹកជំនន់បានជន់លិចស្រូវរបស់ប្រជាកសិករដែលច្រូតកាត់ពុំទាន់រួចរាល់»។
បើយោងតាមលោក សារ៉ន សម្រាប់ការនាំចេញអង្ករនៅក្នុងខែកញ្ញា និងខែតុលា កម្ពុជាអាចចុះខ្សោយ ដោយសារផលប៉ះពាល់នៃទឹកជំនន់ធ្វើឱ្យស្រូវមួយចំនួនធំត្រូវបានលិចលង់ ហើយរំពឹងថាការនាំចេញនឹងងើបឡើងវិញនៅចុងខែវិច្ឆិកា និងខែធ្នូ ពេលដែលការប្រមូលទិន្នផលស្រូវផ្ការំដួលម្តងទៀត ប្រសិនបើស្រូវផ្ការំដួលទាំងនោះមិនទទួលរងផលប៉ះពាល់អាក្រក់ ដូច្នេះរោងម៉ាស៊ីនកិនស្រូវនានាអាចប្រមូលទិញ ដើម្បីកិននាំចេញឡើងវិញ។
លោកបញ្ជាក់ថា៖ «យើងសង្ឃឹមថា រដ្ឋាភិបាលនឹងផ្តល់ពូជស្រូវថ្មីដល់ប្រជាកសិករនៅពេលទឹកស្រក ដើម្បីដាំដុះឡើងវិញ។ ពេលនេះយើងកំពុងរង់ចាំរបាយការណ៍ចុងក្រោយរបស់ក្រសួងកសិកម្ម និងគណៈកម្មាធិការគ្រប់គ្រងគ្រោះមហន្តរាយ ថាតើផលប៉ះពាល់មានកម្រិតណា ហើយការដាំដុះឡើងវិញចំនួនប៉ុន្មាន ដូច្នេះយើងអាចវាយតម្លៃថា យើងនឹងមានស្រូវ សម្រាប់កិននាំចេញបានប៉ុន្មាន»។
យោងតាមទិន្នន័យចុងក្រោយរបស់សហព័ន្ធស្រូវអង្ករកម្ពុជា ដែលភ្នំពេញ-ប៉ុស្តិ៍ទទួលបាន ការនាំចេញអង្កររបស់កម្ពុជាទៅទីផ្សារអន្តរជាតិសម្រាប់ ៣ ត្រីមាស ឆ្នាំ ២០២២ គឺកើនឡើង ១០ ភាគរយដែលមានបរិមាណសរុប ៤៤៩ ៣២៥ តោន ដោយគិតជាប្រាក់គឺចំនួន ២៨៦,៩០ លានដុល្លារ។ កម្ពុជាក៏បាននាំចេញស្រូវ ២ ៣៥៧ ៦៧៤ តោន ដែលមានតម្លៃប៉ាន់ស្មានប្រមាណ ៥៦៣,៥៤ លានដុល្លារ ក្នុងរយៈពេល ៩ ខែនៃឆ្នាំ ២០២២៕
វីដេអូ៖
