ភ្នំពេញៈ ផ្សារមូលបត្រកម្ពុជា (CSX) បានសម្ពោធដាក់ឱ្យប្រើប្រាស់ជាផ្លូវការប្រព័ន្ធបើកគណនីជួញដូរតាមអនឡាញ ដែលនឹងអនុញ្ញាតឱ្យវិនិយោគិនអាចបើកគណនីបាននៅគ្រប់ទីកន្លែង និងអាចសម្រួលដល់វិនិយោគិនបានច្រើន និងបង្កើនការជួញដូរផងដែរ។
ការដាក់ឱ្យប្រើប្រាស់ជាផ្លូវការប្រព័ន្ធបើកគណនីជួញដូរតាមអនឡាញនេះត្រូវបានឡើងនៅក្នុងកម្មវិធីពិព័រណ៍ផ្សារហ៊ុនកម្ពុជាប្រចាំឆ្នាំ ២០២២ កាលពីថ្ងៃទី ២១ ខែតុលា។
លោក ហុង សុហួរ អគ្គនាយក CSX បានថ្លែងថា ដោយមើលឃើញពីនិន្នាការនៃការប្រែប្រួលមកការនិយមប្រើប្រាស់តាមប្រព័ន្ធបច្ចេកវិទ្យា CSX តែងតែព្យាយាមធ្វើទំនើបកម្មនូវកម្មវិធីផ្សេងៗសំដៅបង្កលក្ខណៈភាពងាយស្រួលដល់សាធារណជនក៏ដូចជាវិនិយោគិនអាចធ្វើការជួញដូរបានកាន់តែច្រើន។
លោកនិយាយថា៖ «ផ្សារមូលបត្រកម្ពុជាយើងបានខិតខំដាក់ចេញនូវទំនើបកម្មឌីជីថលជាលំដាប់ដូចជាការបង្កើត APP CSX Trade ដែលយើងបានសម្ពោធកាលពីសិក្ខាសាលាថ្នាក់ជាតិខួប ១០ ឆ្នាំរបស់ផ្សារមូលបត្រកម្ពុជា, ការបង្កើតនូវប្រព័ន្ធបើកគណនីជួញដូរតាមអនឡាញដែលជាជំហានសំខាន់ថ្មីរបស់ផ្សារមូលបត្រកម្ពុជា, និងការធ្វើទំនើបកម្មនូវបណ្ណាល័យព័ត៌មានរួម Phsarhun APP ជំនាន់ទី ២ ដែលផ្តល់ភាពងាយស្រួលកាន់តែខ្លាំងដល់វិនិយោគិនរបស់យើងនៅក្នុងការស្វែងយល់ពីផ្សារហ៊ុន។ ផ្សារមូលបត្រកម្ពុជាក៏នឹងបន្តខិតខំការធ្វើទំនើបកម្មប្រព័ន្ធនានា ដើម្បីសម្រួលដល់វិនិយោគិនក្នុងការវិនិយោគ»។
លោក ស៊ូ សុជាតិ អគ្គនាយកនិយ័តករមូលបត្រកម្ពុជាបានថ្លែងក្នុងកម្មវិធីនោះថា ស្របពេលរដ្ឋាភិបាលកំពុងយកចិត្តទុកដាក់ក្នុងការធ្វើការប្រែក្លាយកម្ពុជាទៅជាសេដ្ឋកិច្ចឌីជីថល ការធ្វើទំនើបកម្មរបស់ផ្សារមូលបត្រកម្ពុជា គឺពិតជារឿងចាំបាច់ណាស់ ដើម្បីដើរឱ្យទាន់គោលនយោបាយរដ្ឋាភិបាលទាំងក្នុងតំបន់ និងពិភពលោក។
លោកបញ្ជាក់ថា៖ «ការដាក់សម្ពោធឱ្យប្រើប្រាស់នូវកម្មវិធី «បើកគណនីជួញដូរតាមអនឡាញ» គឺដើម្បីឆ្លើយតបទៅនឹងគោលនយោបាយរដ្ឋាភិបាលក្នុងការបំប្លែងខ្លួនជាប្រទេសឌីជីថល និងស្របទៅនឹងនិន្នាការអភិវឌ្ឍសកល»។ លោកបន្តថា៖ «យើងចាប់ផ្តើមពីបាតដៃទទេ ឥឡូវនេះយើងមានហេដ្ឋារចនាសម្ព័ន្ធទីផ្សារពេញលេញ យើងមានទីផ្សារមូលបត្រកម្មសិទ្ធិដែលមានក្រុមហ៊ុនចំនួន ៩ កំពុងចុះបញ្ជីជួញដូរមូលបត្រកម្មសិទិ្ធ និងទីផ្សារមូលបត្របំណុលដែលមានក្រុមហ៊ុន ៧ បានចុះបញ្ជីលក់មូលបត្រចំនួន ៩ គិតត្រឹមខែតុលានេះ សញ្ញាបណ្ណ ៣ បានដល់ឥណប្រតិទានហើយ។ យើងមានក្រុមហ៊ុនមួយចំនួនស្ថិតក្នុងដំណាក់កាលរៀបចំបោះផ្សាយលក់មូលបត្រទាំងមូលបត្រកម្មសិទ្ធិ និងមូលបត្របំណុលដែលក្នុងនោះរួមមានទាំងសញ្ញាបណ្ណបៃតងផងដែរ»។
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក ហ៊ាន សាហ៊ីប បានថ្លែងក្នុងកម្មវិធីពិព័រណ៍ផ្សារភាគហ៊ុនកម្ពុជាថា ការពង្រឹងតម្លាភាព ទំនុកចិត្ត និងភាពឤចប៉ាន់ប្រមាណបានជាកត្តាចាំបាច់ ដើម្បីអនុញ្ញាតឱ្យទីផ្សារមូលបត្រកម្ពុជាធ្វើដំណើរទៅមុខ និងអភិវឌ្ឍប្រកបដោយនិរន្តរភាព។
លោកនិយាយថា៖ «ជាមួយនឹងការរីកចម្រើនផ្សារមូលបត្រកម្ពុជា ដែលមានវឌ្ឍនភាពគួរឱ្យកត់សម្គាល់មកនេះដូចជាការបង្កើតឡើងកម្មវិធីទូរស័ព្ទដៃសម្រាប់ធ្វើការជួញដូរ CSX Trade App, ប្រព័ន្ធបើកគណនីជួញដូរតាមអនឡាញ, ការធ្វើទំនើបកម្មវិធីទូរស័ព្ទ សម្រាប់រៀនសូត្រ Phsarhun App, ការបន្តជំរុញក្រុមហ៊ុនសក្តានុពលឱ្យមកចុះបញ្ជីផ្សារមូលបត្រ ការសិក្សាអំពីលទ្ធភាពក្នុងការបង្កើតផលិតផលវិនិយោគផ្សេងៗ និងការបង្កើតយន្តការនានា ដើម្បីសម្រួលដល់ការជួញដូរ មានដូចជាការជួញដូរដោយគ្មានប្រាក់តម្កល់ ១០០ ភាគរយ នឹងធ្វើឱ្យទីផ្សាររបស់យើងកាន់តែសកម្ម»។
លោកបញ្ជាក់ថា៖ «ក្នុងនាមក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាលផ្សារមូលបត្រកម្ពុជាស្នើឱ្យភាគីពាក់ព័ន្ធទាំងអស់ចូលរួមគ្នាបន្ថែមទៀតក្នុងការទាក់ទាញវិនិយោគិន សម្រួលការជួញដូរ ផ្តល់សេវាកម្មកាន់តែល្អ និងទាក់ទាញក្រុមហ៊ុនបោះផ្សាយបន្ថែមទៀត»៕