ធនាគារអភិវឌ្ឍន៍អាស៊ី (ADB) បានកៀរគរកញ្ចប់ហិរញ្ញប្បទានចំនួន ១៣៥ លានដុល្លារ សម្រាប់ក្រុមហ៊ុន VinFast ដើម្បីឱ្យ ក្រុមហ៊ុនផលិតរថយន្តក្រុងសាធារណៈ។ ជារថយន្តក្រុងសាធារណៈ ដែលនឹងដំណើរការដោយថាមពលអគ្គិសនីទាំងស្រុងដំបូងគេរបស់វៀតណាមហើយ VinFast ក៏នឹងត្រូវសាងសង់បណ្តាញសាករថយន្តអគ្គិសនីជាតិដំបូងគេដែរ។ នេះបើតាមសារព័ត៌មានវៀតណាម កាលពីថ្ងៃទី ២៤ ខែតុលា។
កញ្ចប់ជំនួយហិរញ្ញវត្ថុនេះ នឹងគាំទ្រដល់កិច្ចខិតខំប្រឹងប្រែងរបស់វៀតណាម ក្នុងការសម្រេចគោលដៅ អព្យាក្រឹតកាបូន និងពង្រីកឧស្សាហកម្មនេះ ដោយផ្អែកលើបច្ចេកវិទ្យាជាន់ខ្ពស់។
ការផ្តល់ហិរញ្ញប្បទានសម្រាប់រយៈពេល ៧ឆ្នាំ រួមមានប្រាក់កម្ចីចំនួន ២០ លានដុល្លារ ដែលផ្តល់ដោយមូលនិធិរបស់ ADB និងប្រាក់កម្ចីប៉ារ៉ាឡែល (កម្ចីរវាងក្រុមហ៊ុន ២) ចំនួន ៨៧ លានដុល្លារ ដែលសម្របសម្រួលដោយ ADB។ ចំណែកឯទឹក ប្រាក់ចំនួន២៨លានដុល្លារទៀត គឺជាហិរញ្ញប្បទានសម្បទាន។
អគ្គនាយកនៃនាយកដ្ឋានប្រតិបត្តិការវិស័យឯកជនរបស់ ADB អ្នកស្រី Suzanne Gabory បានលើកឡើងថា៖ «គម្រោងនេះ ផ្តល់នូវដំណោះស្រាយដឹកជញ្ជូនប្រកបដោយនិរន្តរភាពសម្រាប់ប្រទេសវៀតណាម ហើយជួយប្រទេសនេះឱ្យសម្រេចបាននូវគោលដៅអាកាសធាតុ និងគាំទ្រដល់កំណើនហិរញ្ញវត្ថុអាកាសធាតុនៅក្នុងតំបន់»។
អ្នកស្រីបន្តថា៖ «អាស៊ីនិងប៉ាស៊ីហ្វិក គឺជាតំបន់ជួរមុខនៃការប្រយុទ្ធប្រឆាំងទៅនឹងការប្រែប្រួល អាកាសធាតុជាសកល ហើយគម្រោងសម្រាប់វិស័យឯកជនបែបនេះ ជាមួយដៃគូច្នៃដែលប្រកបដោយភាពច្នៃប្រឌិតដូចជា VinFast ពិតជាមានសារៈ សំខាន់ណាស់ក្នុងការជួយប្រទេសកាត់បន្ថយការបញ្ចេញកាបូន»។
វិស័យដឹកជញ្ជូនរបស់វៀតណាមមានចំណែកប្រមាណ ១៨ ភាគរយ នៃការបំភាយឧស្ម័នផ្ទះកញ្ចក់ប្រចាំឆ្នាំ។ ដូច្នេះការបន្ថយបំភាយឧស្ម័នតាមរយៈជម្រើសផ្សេងៗដូចជាការធ្វើបំលាស់ទីដោយប្រើថាមពលអគ្គិសនី (e-mobility) នឹងជះឥទ្ធិពលដោយផ្ទាល់ដល់មហិច្ឆតារបស់ប្រទេសវៀតណាម ក្នុងការសម្រេចបាននូវអព្យាក្រឹតកាបូនត្រឹមឆ្នាំ ២០៥០។
លើសពីនេះទៀត គម្រោងនេះក៏រួមបញ្ចូលទាំងជំនួយបច្ចេកទេស (TA) ចំនួនជិត ១ លានដុល្លារពី ACFP និង CTF។ ជំនួយនេះនឹងផ្តោតលើការបង្កើនចំណេះដឹងរបស់អ្នកប្រើប្រាស់អំពី e-mobility ដើម្បីជួយជំរុញការពង្រីកទីផ្សារបន្ថែមទៀត។
បង្កើតឡើងក្នុងឆ្នាំ ២០១៧ VinFast គឺជាក្រុមហ៊ុនរថយន្តក្នុងស្រុក និងជាក្រុមហ៊ុនផលិតរថយន្តអគ្គិសនីដំបូងគេរបស់វៀតណាម។ VinFast គឺជាក្រុមហ៊ុនបុត្រសម្ព័ន្ធរបស់ក្រុមហ៊ុន Vingroup Joint Stock Company ដែលជាសហគ្រាស ឯកជនធំបំផុតរបស់វៀតណាមនិងជាក្រុមហ៊ុនចុះបញ្ជី (ហ៊ុន) ធំជាងគេនៅវៀតណាម។
VinFast បានអភិវឌ្ឍន៍រថយន្តអគ្គិសនីសម្រាប់ទីផ្សារក្នុងស្រុក និងអន្តរជាតិ ហើយកំពុងវិនិយោគលើបណ្តាញទូទាំងប្រទេសសម្រាប់ការសាកថ្មល្បឿនលឿនលើប្រភេទរថយន្តអគ្គិសនីក្នុងប្រទេសវៀតណាម៕