.jpg)
ស្មាត មានអតិថិជនជាង ៨ លាននាក់នៅក្នុងប្រទេសកម្ពុជា។ រូប ភ្នំពេញ ប៉ុស្តិ៍
ភ្នំពេញ៖ ក្រុមហ៊ុន Smart Axiata ដែលជាប្រតិបត្តិករទូរស័ព្ទចល័តឈានមុខគេនៅកម្ពុជាសហការជាមួយក្រុមហ៊ុន Global Mobility Player Cartrack Partner ដែលជាក្រុមហ៊ុនផ្តល់នូវប្រព័ន្ធគ្រប់គ្រងយានជំនិះឈានមុខគេនៅលើពិភពលោក ដើម្បីនាំយកប្រព័ន្ធគ្រប់គ្រងយានជំនិះ ថ្នាក់លំដាប់ដំបូងបំផុត” នៃសេវាគ្រប់គ្រងយានជំនិះនៅក្នុងព្រះរាជាណាចក្រកម្ពុជា។
ក្រុមហ៊ុន Cartrack ដែលជាផ្លាតហ្វមផ្តល់សេវាកម្មសូហ្វវែរចល័តឈានមុខគេលើពិភពលោក ផ្តល់ជូននូវដំណោះស្រាយវិភាគទិន្នន័យភ្លាមៗ សម្រាប់ប្រព័ន្ធដឹកជញ្ជូនឆ្លាតវៃដល់អតិថិជនជាង ១,៦ លាននាក់ និងដៃគូអាជីវកម្ម ៩៣ ០០០ នៅ ២៣ ប្រទេសទូទាំងពិភពលោក។ នេះបើតាមសេចក្តីប្រកាសព័ត៌មានរបស់ក្រុមហ៊ុន Smart Axiata។
ប្រព័ន្ធគ្រប់គ្រងយានជំនិះរវាងក្រុមហ៊ុន Smart Axiata និងក្រុមហ៊ុន Cartrack (ស្ថិតក្រោមឈ្មោះពាណិជ្ជកម្ម “Smart Fleet Management”) នឹងមានវត្តមានជាលើកដំបូងនៅក្នុងប្រទេសកម្ពុជា ដើម្បីបំពេញតម្រូវការរបស់ម្ចាស់អាជីវកម្មគ្រប់ប្រភេទ ដែលត្រូវការដំណោះស្រាយលើប្រព័ន្ធគ្រប់គ្រងយានជំនិះ ដើម្បីបង្កើនប្រសិទ្ធភាពការចំណាយលើប្រតិបត្តិការ និងការគ្រប់គ្រងយានជំនិះរបស់ខ្លួន។
ក្រុមហ៊ុន Smart Axiata បានឱ្យដឹងថា៖ «ដំណោះស្រាយលំដាប់ពិភពលោកនេះ ផ្តល់តម្លៃសមរម្យ ដែលអតិថិជនជាម្ចាស់អាជីវកម្មគ្រប់ប្រភេទអាចទទួលបានទិន្នន័យផ្សេងៗលើប្រព័ន្ធគ្រប់គ្រងយានជំនិះ ដែលជាជំនួយដល់ការធ្វើការសម្រេចចិត្តផ្សេងៗ។ក្រុមហ៊ុនមួយនេះបន្តថា លក្ខណពិសេសរបស់ប្រព័ន្ធគ្រប់គ្រងយានជំនិះនេះរួមមាន ការពិនិត្យតាមដានលើយានជំនិះយ៉ាងទូលំទូលាយនិងតាមពេលវេលាជាក់ស្តែង រួមទាំងព័ត៌មានស៊ីជម្រៅលើប្រតិបត្តិការយានជំនិះ អាចសិក្សាពីអាកប្បកិរិយារបស់អ្នកបើកបរ បូករួមការបណ្តុះបណ្តាលអំពីសេវាកម្មពីអ្នកឯកទេស និងការគាំទ្រយ៉ាងពេញលេញក្រោយពេលលក់ ដោយផ្ដល់របាយការណ៍យ៉ាងលម្អិត តាមរយ:ផ្ទាំងព័ត៌មានដែលមានភាពច្បាស់លាស់ និងងាយស្រួលយល់។
ប្រព័ន្ធគ្រប់គ្រងយានជំនិះនេះអាចឱ្យម្ចាស់យានជំនិះ ធ្វើការគ្រប់គ្រងពេញលេញទៅលើយានជំនិះរបស់ខ្លួន ជាមួយនឹងការរៀបចំផែនការដឹកជញ្ជូនឆ្លាតវៃ ការពិនិត្យតាមដានទាំងអ្នកបើកបរ ទាំងយានជំនិះ (រួមទាំងការតាមដានតាមពេលវេលាជាក់ស្តែង) របាយការណ៍អំពីចម្ងាយបើកបរ ការជូនដំណឹងអំពីការបើកបរលើសល្បឿន របាយការណ៍ចតរថយន្ត របាយការណ៍ឧបករណ៍សិនស័រ (Sensor) លើប្រេងឥន្ធនៈ ការផ្តល់សញ្ញាលើសីតុណ្ហភាពរថយន្ត និងមុខងារឆ្លាតវៃជាច្រើនទៀត។ របាយការណ៍នឹងបញ្ជូនទៅម្ចាស់អាជីវកម្មតាមរយៈការផ្ញើសារដោយផ្ទាល់ភ្លាមៗតាម កម្មវិធីទូរស័ព្ទ (អ៊ែប) និង វេបផតថល (web portal)។
លោក Zak Calisto ស្ថាបនិកនិងជានាយកប្រតិបត្តិក្រុមហ៊ុន Cartrack បានឱ្យដឹងថាក្រុមហ៊ុន Cartrack កំណត់ទិន្នន័យដែលប្រមូលបានពីឧបករណ៍ IoT ទំនើបរបស់ក្រុមហ៊ុន ដោយប្រើប្រព័ន្ធសិក្សាដោយម៉ាស៊ីន Machine learning និងការវិភាគទិន្នន័យ ដើម្បីផ្តល់ជូនអតិថិជននូវព័ត៌មានស៊ីជម្រៅជាជំនួយដល់ការចាត់វិធានការបានប្រកបដោយភាពវៃឆ្លាត និងជួយលើកកម្ពស់ដល់ការប្រតិបត្តិការផ្ទាល់កន្លែង និងទទួលបានលទ្ធផលល្អដល់អាជីវកម្ម។ លោកបន្តថា៖ «យើងមានក្តីរំភើបរីករាយក្នុងការចាប់ដៃគូជាមួយក្រុមហ៊ុន Smart Axiata ដើម្បីគាំទ្រដល់ម្ចាស់អាជីវកម្មក្នុងស្រុករបស់កម្ពុជាដែលជាផ្នែកសំខាន់ក្នុងការជួយជំរុញសេដ្ឋកិច្ចជាតិ»។
លោក FeiruzIkhwan នាយកប្រតិបត្តិស្តីទីរបស់ក្រុមហ៊ុន Smart Axiata បានថ្លែងថា៖ «ក្នុងនាមជាក្រុមហ៊ុននាំមុខគេខាងផ្នែកឌីជីថលនៅកម្ពុជា យើងសូមស្វាគមន៍បច្ចេកវិទ្យា AI ដ៏គួរឱ្យចាប់អារម្មណ៍ និងមានស្តង់ដាលក្ខណៈពិភពលោកដែលក្រុមហ៊ុន Cartrack ផ្តល់ជូនដល់អតិថិជនដែលជាក្រុមហ៊ុនអាជីវកម្មទាំងអស់របស់យើង។
លោកបញ្ជាក់ថា៖ «យើងមានទំនុកចិត្តថា តាមរយៈការផ្តល់សេវាប្រព័ន្ធគ្រប់គ្រងយានជំនិះរបស់ក្រុមហ៊ុន Cartrack ជូនដល់ក្រុមហ៊ុនអាជីវកម្មនៅទូទាំង ២៥ ខេត្តក្រុង យើងនឹងផ្តល់លទ្ធភាពឱ្យក្រុមហ៊ុនទាំងអស់អាចពង្រីកអាជីវកម្មរបស់ពួកគេ លើកកម្ពស់ប្រសិទ្ធភាពប្រើប្រាស់យានជំនិះ កាត់បន្ថយភាពគ្មានប្រសិទ្ធភាព និងធ្វើឱ្យប្រាក់ចំណេញកាន់តែកើនឡើង»។
ដំណោះស្រាយថ្មី ដែលបានចាប់ផ្ដើមពីខែតុលានេះ គឺជាផ្នែកមួយនៃការជំរុញរបស់ក្រុមហ៊ុន Smart Axiata ដើម្បីលើកទឹកចិត្តដល់ការទទួលយកដំណោះស្រាយបែបឌីជីថលសម្រាប់អាជីវកម្មទាំងអស់នៅទូទាំងប្រទេស។ Smart Fleet Management ត្រូវបានរំពឹងថា នឹងមានតម្រូវការខ្ពស់ពីសំណាក់សហគ្រាសខ្នាតតូច មធ្យម និងខ្នាតធំនៅព្រះរាជាណាចក្រកម្ពុជា ខណៈដែលក្រុមហ៊ុនទាំងនោះសម្លឹងឆ្ពោះទៅរកការបង្កើនប្រសិទ្ធភាពលើប្រតិបត្តិការ និងកាត់បន្ថយការចំណាយរបស់អាជីវកម្ម៕
