.jpg)
បុរស ២ នាក់ជិះម៉ូតូកាត់ពីមុខអគារទីស្នាក់ការ CSX។ ហេង ជីវ័ន
ភ្នំពេញៈ និយតករមូលបត្រកម្ពុជា (SERC) នឹងដាក់ឱ្យដំណើរការនូវក្រុមហ៊ុនមូលនិធិ (Exchange Trading Fund-ETF) នៃទីផ្សារអចលនវត្ថុនៅឆ្នាំ ២០២៣ ដែលអនុញ្ញាតឱ្យគេអាចធ្វើការជួញដូរលើផ្សារមូលបត្រកម្ពុជា (CSX) ហើយជាការបើកផ្លូវឱ្យពួកគេធ្វើការកៀរគរទុនបន្ថែមពីសាធារណជន ដើម្បីយកទៅពង្រីកការអភិវឌ្ឍវិស័យអចលនវត្ថុ។
លោក ស៊ូ សុជាតិ អគ្គនាយក SERC បានប្រាប់ ភ្នំពេញ ប៉ុស្តិ៍ នៅថ្ងៃទី ២៦ ខែតុលាថា SERC កំពុងរៀបចំបទប្បញ្ញត្តិទាក់ទងនឹងក្រុមហ៊ុនមូលនិធិ Fund Management Company ដែលទទួលបានអាជ្ញាប័ណ្ណអាចធ្វើការកៀរគរមូលនិធិបន្ថែម ដើម្បីយកទៅវិនិយោគនៅលើវិស័យអចលនទ្រព្យរបស់ខ្លួន។
លោកថ្លែងថា៖ «យើងកំពុងពិនិត្យ ដោយយើងនឹងអាចដាក់ឱ្យដំណើរការនៅឆ្នាំ ២០២៣ ដែលក្រុមហ៊ុន Fund Management company អាចរៀបចំបណ្តើរៗ។ ផលិតផលនេះគឺធ្វើឡើងតាមរយៈការប្រមូលសាច់ប្រាក់ពីវិនិយោគ ដើម្បីយកទៅវិនិយោគក្នុងវិស័យអចលនវត្ថុ»។
លោកបន្ថែមថា ពេលណាមានផលិតផល Fund នេះ គឺផលិតផលនេះអាចចុះបញ្ជីនៅលើផ្សារមូល ត្រកម្ពុជាដែលអនុញ្ញាតឱ្យបំប្លែង Property Fund ឱ្យទៅជា Exchange Trading Fund ដែលអនុញ្ញាតឱ្យខ្លួនធ្វើការជួញដូរលើផ្សារភាគហ៊ុនបាន ប៉ុន្តែពួកគេក៏ត្រូវទាមទារឱ្យមានវិធានចុះបញ្ជីបន្ថែមទៀតផងដែរ។
លោកបញ្ជាក់ថា៖ «នៅពេលនេះយើងកំពុងសិក្សាលទ្ធភាព ព្រោះយើងត្រូវរៀបចំបទប្បញ្ញត្តិច្រើន ដើម្បីអនុញ្ញាតឱ្យវាដំណើរការទៅរួច គ្រាន់តែការប្រមូលសាច់ប្រាក់ដើម្បីវិនិយោគអចលនវត្ថុយើងអាចសម្លឹងមើលឆ្នាំក្រោយ ប៉ុន្តែការយកវាទៅ ចុះបញ្ជីដើម្បីធ្វើការជួញដូរគឺយើងត្រូវការពេលបន្ថែមទៀត។
លោក ច្រឹក សុខនឹម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានឱ្យដឹងថា គំនិតផ្តួចផ្តើមនេះនឹងដើរតួនាទីជាកាតាលីករមួយដ៏សំខាន់ក្នុងការចូលរួមចំណែកលើកកម្ពស់វិស័យអចលនវត្ថុនៅកម្ពុជាឱ្យកាន់តែរឹងមាំដែលអនុញ្ញាតឱ្យក្រុមហ៊ុនគ្រប់គ្រងមូលនិធិអាចកៀរគរការវិនិយោគពីសាធារណជន និងធ្វើការចុះបញ្ជីនៅផ្សារហ៊ុន។
លោកថ្លែងថា៖ «យើងសាទរចំពោះគំនិតផ្តួចផ្តើមរបស់អាជ្ញាធរ ជាពិសេសនិយតករមូលបត្រកម្ពុជាដែលនឹងអនុញ្ញាតឱ្យក្រុមហ៊ុនគ្រប់គ្រងមូលនិធិទាំងឡាយអាចមានលទ្ធភាពបន្ថែមទៀត ពិសេសតាមរយៈការកៀរគរមូលនិធិតាមផ្សារភាគហ៊ុន ដែលជាការរួមចំណែកដល់ការអភិវឌ្ឍវិស័យអចលនវត្ថុនៅកម្ពុជាកាន់តែរឹងមាំ និងមាននិរន្តរភាព»។
យោងតាមលោក ស៊ូ សុជាតិ បច្ចុប្បន្ន SERC បានផ្តល់អាជ្ញាប័ណ្ណដល់ក្រុមហ៊ុនគ្រប់មូលនិធិចំនួន ១៥ ហើយក្រុមហ៊ុនមូលនិធិដែលទទួលបានអាជ្ញាប័ណ្ណអាចរៀបចំផលិតផលនេះបាន ដោយ SERCនឹងធ្វើការសិក្សាមួយជំហានទៅមុខទៀតគឺការយកផលិតផល Fund នេះទៅចុះបញ្ជីនៅផ្សារមូលបត្រកម្ពុជាដើម្បីអនុញ្ញាតឱ្យពួកគាត់ធ្វើការជួញដូរបាន។
លោកថ្លែងថា៖ «យើងត្រូវការពេលវេលាខ្លះ ដោយត្រូវធ្វើការជាមួយនិយតករអចលនវត្ថុបន្ថែមទៀត ដូច្នេះវាជាគំនិតផ្តួចផ្តើមមួយដែលយើងនឹងពិនិត្យការងារនេះបន្ត។ យើងនឹងមានលក្ខខណ្ឌដែលយើងនឹងរៀបចំចេញជាបន្តបន្ទាប់អាចចុងឆ្នាំនេះ ឬដើមឆ្នាំក្រោយដែលយើងកំពុងសិក្សាអ៊ីចឹងហើយនេះជាគំនិតផ្តួចផ្តើមដែលយើងត្រូវការពេល ដើម្បីរៀបចំបទប្បញ្ញត្តិនានាដែលអនុញ្ញាតឱ្យចាប់ផ្តើមដំណើរការបាន។ យើងដាក់ទិសដៅនៅឆ្នាំក្រោយ បើសិនបទប្បញ្ញត្តិនានារួចរាល់»៕
