ភ្នំពេញៈ ការផ្លាស់ប្តូរទំនិញទ្វេភាគីរវាងកម្ពុជា-អាល្លឺម៉ង់ ក្នុងរយៈពេល ៣ ត្រីមាសដំបូងឆ្នាំ ២០២២ មានទឹកប្រាក់ប្រមាណជាង ៩៤៦ លានដុល្លារ កើនជាង ២០ ភាគរយធៀបរយៈពេលដូចគ្នាឆ្នាំ ២០២១ ក្នុងនោះជញ្ជីងពាណិជ្ជកម្មកម្ពុជាមានឧត្តមភាពជាង ៧១១ លានដុល្លារ។ នេះបើតាមអគ្គនាយកដ្ឋានគយ និងរដ្ឋាករកម្ពុជា។
ទិន្នន័យពីអគ្គនាយកដ្ឋានគយ និងរដ្ឋាករកម្ពុជាបានឱ្យដឹងថា ចាប់ពីខែមករា-ខែកញ្ញា ឆ្នាំ ២០២២ ការនាំចេញនាំចូលទំនិញរវាងកម្ពុជា និងអាល្លឺម៉ង់ មានទឹកប្រាក់សរុប ៩៤៦,៣២ លានដុល្លារ កើន ២០,៣ ភាគរយពីចំនួន ៧៨៦,៧២ លានដុល្លារ នារយៈពេលដូចគ្នាឆ្នាំ ២០២១។ សម្រាប់ទំនិញដែលកម្ពុជានាំទៅប្រទេសអាល្លឺម៉ង់មានតម្លៃ ៨២៨,៨៧ លានដុល្លារកើនឡើង ២៦,៤ ភាគរយ និងទំនិញនាំពីអាល្លឺម៉ង់មកកម្ពុជា មាន ១១៧,៤៤ លានដុល្លារធ្លាក់ពីចំនួន ១៣០,៨២ លានដុល្លារ ស្មើ -១០,២ ភាគរយ។
អនុប្រធានសភាពាណិជ្ជកម្មកម្ពុជា លោក លឹម ហេង បានប្រាប់ ភ្នំពេញ ប៉ុស្តិ៍ នៅថ្ងៃទី ២៦ ខែតុលាថា អាល្លឺម៉ង់ គឺជាប្រទេសក្នុងសហគមន៍អឺរ៉ុបដែលកំពុងផ្តល់ឱ្យកម្ពុជាប្រព័ន្ធលើកលែងពន្ធនាំចូល EBA ទៅទីផ្សាររបស់ខ្លួន ដូច្នេះនិន្នាការនាំចេញទំនិញទៅទីនោះនឹងបន្តកើនឡើងថែមទៀត។ លោកបន្តថា ក្រៅពីលក្ខណៈអំណោយផលខាងលើទំនិញកម្ពុជាក៏មានគុណភាព និងមានចម្រុះច្រើនប្រភេទដែលឆ្លើយតបនឹងតម្រូវការនៅទីនោះផងដែរ។
លោកថ្លែងថា៖ «ខ្ញុំមានសុទិដ្ឋិនិយមថា ការនាំចេញទំនិញរបស់កម្ពុជាទៅប្រទេសអាល្លឺម៉ង់នឹងកើនឡើងច្រើនទៀត បើទោះបីពេលខាងមុខ ទំនិញកម្ពុជានាំចេញទៅទីនោះអាចត្រូវបាត់បង់ការលើកលែងពន្ធក្រោមប្រព័ន្ធ EBA ក៏ដោយ»។
ទោះយ៉ាងណា លោក លឹម ហេង និយាយថា តាមរយៈកិច្ចសហប្រតិបត្តិការល្អរវាងប្រទេសទាំង ២ លោករំពឹងថា នៅពេលខាងមុខថា រដ្ឋាភិបាលនៃប្រទេសទាំង ២ ក៏អាចនឹងពិចារណាបើកការចរចាបង្កើតកិច្ចព្រមព្រៀងពាណិជ្ជកម្មសេរីជាមួយគ្នាផងដែរ។
ទំនិញកម្ពុជានាំទៅទីផ្សារអាល្លឺម៉ង់ភាគច្រើនជាសម្លៀកបំពាក់ ស្បែកជើង ផលិតផលធ្វើដំណើរ កង់ គ្រឿងបង្គុំអគ្គិសនី និងកសិផល ខណៈទំនិញនាំពីអាល្លឺម៉ង់ រួមមាន រថយន្ត គ្រឿងសង្ហារិម និងគ្រឿងសំណង់ជាដើម។
អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បាននិយាយថា អាល្លឺម៉ង់ គឺជាប្រទេសមានប្រជាជនច្រើន និងមានសេដ្ឋកិច្ចធំជាងគេក្នុងសហគមន៍អឺរ៉ុប ហេតុនេះតម្រូវការទំនិញនាំចូលក៏មានច្រើនដែរ។ បើកម្ពុជាអាចទទួលបានការបញ្ជាទិញកាន់តែច្រើនពីអាល្លឺម៉ង់ ហើយវិនិយោគិនអាល្លឺម៉ង់ ចូលមកបណ្តាក់ទុនកាន់តែច្រើននោះវានឹងនាំមកនូវភាពវិជ្ជមានច្រើនសម្រាប់សេដ្ឋកិច្ចកម្ពុជា។
លោកអះអាងថា៖ «អាល្លឺម៉ង់ នឹងបន្តឈរជាទីផ្សារគោលដៅសំខាន់សម្រាប់ទំនិញកម្ពុជា ព្រោះប្រទេសទាំង ២ មានកិច្ចសហប្រតិបត្តិការល្អជាមួយគ្នាលើគ្រប់វិស័យ។ អាល្លឺម៉ង់ ក៏ជាប្រទេសដែលផ្តល់ជំនួយច្រើនមកឱ្យកម្ពុជាផងដែរ»។
លោកនាយករដ្ឋមន្ត្រី ហ៊ុន សែន ក្នុងជំនួបជាមួយ លោក Stefan Anton Messerer ឯកអគ្គរដ្ឋទូតអាល្លឺម៉ង់ប្រចាំកម្ពុជាកាលពីថ្ងៃទី ១០ ខែតុលា ឆ្នាំ ២០២២ បានសម្តែងការរីករាយចំពោះកិច្ចសហប្រតិបត្តិការល្អរវាងកម្ពុជា និងអាល្លឺម៉ង់ ខណៈអាល្លឺម៉ង់ គឺជាដៃគូអភិវឌ្ឍន៍ដ៏សំខាន់ជាងគេនៅក្នុងតំបន់អឺរ៉ុប។
កាលពីឆ្នាំ ២០២១ ពាណិជ្ជកម្មរវាងកម្ពុជា-អាល្លឺម៉ង់ មានទឹកប្រាក់សរុប ១ ០៤៥,៣៧ លានដុល្លារ កើនឡើង ៦,៨ ភាគរយធៀបឆ្នាំ ២០២០ ។ ក្នុងនោះការនាំទំនិញពីកម្ពុជាទៅអាល្លឺម៉ង់ មាន ៨៨០,៧៨ លានដុល្លារ កើន ០,៤ ភាគរយ និងការនាំចូលមកវិញចំនួន ១៦៤,៥៨ លានដុល្លារ កើន ៦១,៧ ភាគរយ។ នេះបើតាមអគ្គនាយកដ្ឋានគយ និងរដ្ឋាករកម្ពុជា៕