.jpg)
លោក គង់ វិបុល អគ្គនាយកនៃអគ្គនាយកដ្ឋានពន្ធដារ។ រូបថត សហការី
ភ្នំពេញៈ ប្រធានពន្ធដារកម្ពុជាបានប្ដេជ្ញាប្រយុទ្ធប្រឆាំងនឹងការលាងលុយកខ្វក់ ដើម្បីនាំយកប្រទេសកម្ពុជា ចេញពីបញ្ជីពណ៌ប្រផេះទៅជាបញ្ជីពណ៌ស ក្នុងគោលបំណងបង្កើតបរិយាកាសវិនិយោគដ៏ល្អមួយ ដើម្បីទាក់ទាញអ្នកវិនិយោគ និងធុរកិច្ចកាន់តែប្រសើរបន្ថែមទៀត។
ថ្លែងនៅក្នុងវេទិកាពន្ធប្រចាំឆ្នាំ EuroCham កាលពីថ្ងៃទី ២៦ ខែតុលា លោក គង់ វិបុល អគ្គនាយកនៃអគ្គនាយកដ្ឋានពន្ធដារ (GDT) បានប្រាប់ឱ្យដឹងថា អាទិភាពចម្បងរបស់ GDT រួមមានការធានាឱ្យមានការប្រកួតប្រជែងដោយស្មើភាព ការប្រយុទ្ធប្រឆាំងនឹងការបាត់បង់ប្រាក់ចំណូល តាមរយៈផែនការគេចពន្ធ និងការប្រយុទ្ធប្រឆាំងនឹងការលាងលុយកខ្វក់។
លោកថ្លែងថា៖ «យន្តការនេះ (ការប្រឆាំងនឹងការលាងលុយកខ្វក់) អាចជួយនាំឱ្យប្រទេសកម្ពុជាត្រឡប់មកក្នុងបញ្ជីពណ៌ «ស» វិញ។ នៅពេលយើងស្ថិតនៅក្នុងបញ្ជីពណ៌ស អាជីវកម្មកាន់តែច្រើននឹងចូលមក ហើយវានឹងទាក់ទាញនូវការវិនិយោគផ្ទាល់ពីបរទេស (FDI)។ ប៉ុន្តែនៅពេលនេះយើងកំពុងស្ថិតក្នុងបញ្ជីពណ៌ប្រផេះ នាំឱ្យមានការសង្ស័យច្រើន ហើយវិនិយោគិនសក្តានុពលជាច្រើនទទួលយកវិធីសាស្ត្ររង់ចាំមើលសិន»។
កាលពីពេលថ្មីៗនេះមូលនិធិរូបិយវត្ថុអន្តរជាតិ (IMF) បានចែករំលែកបទពិសោធរបស់ពួកគេជាមួយមន្ត្រីគយកម្ពុជា ស្តីពីបច្ចេកទេសស៊ើបអង្កេត ការលាងលុយកខ្វក់ និងហិរញ្ញប្បទានភេរវកម្មក្នុងសិក្ខាសាលារួមគ្នាមួយរវាងអគ្គនាយកដ្ឋានគយ និងរដ្ឋាករកម្ពុជា (GDC-E) និង IMF ក្រោមការគាំទ្រហិរញ្ញវត្ថុពីរដ្ឋាភិបាលជប៉ុន នាថ្ងៃទី ២៤-២៨ ខែតុលា។
ប្រទេសកម្ពុជាបានឈានឆ្ពោះទៅរកការដកខ្លួនបន្តិចម្ដងៗចេញពីបញ្ជីពណ៌ប្រផេះនៃប្រទេសដែលមានហានិភ័យខ្ពស់ក្នុងការលាងលុយកខ្វក់ បន្ទាប់ពីព្រះរាជាណាចក្រកម្ពុជាត្រូវបានជាប់ក្នុងបញ្ជីនេះអស់រយៈពេល ៣ ឆ្នាំជាប់ៗគ្នាចាប់ពីឆ្នាំ ២០២០ ដល់ឆ្នាំ ២០២២ ។
លោក ប៉ិច ពិសី នាយកប្រតិបត្តិនៃអង្គការតម្លាភាពកម្ពុជា (TI Cambodia) បានសាទរចំពោះផែនការសកម្មភាពរបស់រដ្ឋាភិបាលក្នុងការផ្លាស់ប្តូរបញ្ជីពណ៌ប្រផេះរបស់ប្រទេសនេះទៅជាពណ៌ស ដោយសារវាចាំបាច់សម្រាប់រដ្ឋាភិបាលក្នុងការរៀបចំយុទ្ធសាស្ត្រសំខាន់ ដើម្បីប្រឆាំងនឹងការលាងលុយកខ្វក់ និងហិរញ្ញប្បទានភេរវកម្ម។ បញ្ហានេះគឺជាវិស័យដែលប្រទាក់ក្រឡាគ្នា ដូច្នេះចាំបាច់ត្រូវមានស្ថាប័នសំខាន់មួយ ដើម្បីដឹកនាំដោយមានយន្តការ និងគំនិតផ្តួចផ្តើមច្បាស់លាស់ព្រមទាំងធនធានមនុស្ស ដែលមានលក្ខណសម្បត្តិគ្រប់គ្រាន់ និងការជាប់ទាក់ទងជាមួយអង្គការអន្តរជាតិផងដែរ។
លោកបញ្ជាក់ថា៖ «ខ្ញុំសង្កេតឃើញថាកម្ពុជាកំពុងដំណើរការលើផ្លូវត្រូវលើក្រុមការងារសកម្មភាពហិរញ្ញវត្ថុ (FATF) ដែលជាអង្គការអន្តររដ្ឋាភិបាលដែលមានភារកិច្ចបង្កើតគោលនយោបាយ ដើម្បីប្រយុទ្ធប្រឆាំងនឹងការលាងលុយកខ្វក់អន្តរជាតិ និងការផ្តល់មូលនិធិនៃអំពើភេរវកម្មទាក់ទងនឹងការអនុម័តស្ដីពីច្បាប់ប្រឆាំងការលាងលុយកខ្វក់។ កម្ពុជាបានចាត់ឱ្យអន្តរក្រសួងធ្វើការលើបញ្ហានេះរួចហើយ ប៉ុន្តែអ្វីដែលនៅខ្វះចន្លោះនោះគឺការអនុវត្តច្បាប់ ពិសេសទាក់ទងនឹងការស៊ើបអង្កេតជាប្រព័ន្ធការចាប់ខ្លួន និងការផ្តន្ទាទោសលើជនសង្ស័យជាដើម»។ លោកបានបន្ថែមថា បញ្ហាទី២ ដែលសំខាន់ផងដែរ គឺត្រូវមានការចូលរួម ជាពិសេសធនាគារ និងស្ថាប័នហិរញ្ញវត្ថុផ្សេងទៀត គណនេយ្យករ ឬមេធាវី អ្នកមកពីល្បែងស៊ីសងដែលពាក់ព័ន្ធនឹងការប្រឆាំងការលាងលុយកខ្វក់ ដើម្បីសហការជាមួយនឹងអាជ្ញាធរមានសមត្ថកិច្ច។
លោកបញ្ជាក់ថា៖ «ខ្ញុំគិតថា បើយើងមានឆន្ទៈនយោបាយខ្ពស់ និងធ្វើការជាប្រព័ន្ធក្នុងកិច្ចសហប្រតិបត្តិការជាមួយភាគីពាក់ព័ន្ធក្នុងការប្រឆាំងការលាងលុយកខ្វក់ និងកិច្ចសហប្រតិបត្តិការជាមួយតំបន់ និងអន្តរជាតិអនុលោមតាម FATF នោះ ខ្ញុំជឿថា យើងអាចផ្លាស់ប្តូរពីបញ្ជីពណ៌ប្រផេះទៅជាពណ៌ស វិញ»។
កម្ពុជាបានក្លាយជាសមាជិកនៃក្រុមអាស៊ីប៉ាស៊ីហ្វិកស្តីពីការលាងលុយកខ្វក់ (APG) ក្នុងឆ្នាំ ២០០៤ ។ ជាមួយនឹងការចូលរួមនេះ កម្ពុជាត្រូវតែរាយការណ៍អំពីកាតព្វកិច្ចហិរញ្ញប្បទានប្រឆាំងការលាងលុយកខ្វក់ និងប្រឆាំងអំពើភេរវកម្មរបស់ខ្លួនជាប្រចាំ ស្របតាមបញ្ហា និងវិធានការចុងក្រោយដែលកំណត់ដោយ APG និង FAFT។
ប្រទេសកម្ពុជាមានសេចក្តីព្រាងច្បាប់ស្តីពីការប្រឆាំងការលាងលុយកខ្វក់ និងការផ្តល់ហិរញ្ញប្បទានភេរវកម្មតាំងពីឆ្នាំ ២០២០៕
