.jpg)
អតិថិជនទទួលសេវាកម្មធនាគារអេស៊ីលីដា នាពេលកន្លងទៅ។ រូបថត រ៉ាហ៊ីម
ភ្នំពេញៈ ប្រាក់បញ្ញើរបស់គ្រឹះស្ថានមីក្រូហិរញ្ញវត្ថុទទួលប្រាក់បញ្ញើ (MDI) ទាំង ៥ សម្រេចបានចំនួន ៤,៧ ពាន់លានដុល្លារ កើនជាង ២២ ភាគរយ ខណៈអ្នកតំណាងក្នុងវិស័យនេះអះអាងថា កំណើនដ៏ច្រើននេះឆ្លុះបញ្ចាំងអំពីការទទួលបានទំនុកចិត្ត និងការយល់ដឹងអំពីសារប្រយោជន៍របស់សាធារណជនលើប្រព័ន្ធហិរញ្ញវត្ថុនៅប្រទេសកម្ពុជា។
យោងតាមរបាយការណ៍សមាគមមីក្រូហិរញ្ញវត្ថុកម្ពុជា (CMA) គិតត្រឹមត្រីមាសទី ៣ ឆ្នាំ ២០២២ គ្រឹះស្ថាន-មីក្រូហិរញ្ញវត្ថុទទួលប្រាក់បញ្ញើទាំង ៥ បានទទួលប្រាក់បញ្ញើសរុប ៤,៧ ពាន់លានដុល្លារកើនជាង ២២ ភាគរយពីអតិថិជនប្រមាណ ២,៦ លាននាក់។
លោក សុខ វឿន ប្រធានក្រុមប្រឹក្សាភិបាល CMA បានប្រាប់ភ្នំពេញប៉ុស្តិ៍នៅថ្ងៃទី ៣០ ខែតុលាថា ចំនួនប្រាក់បញ្ញើបានកើនជាលំដាប់ តាមរយៈសេវាកម្មដែលមានភាពច្នៃប្រឌិត និងងាយស្រួលដល់ប្រជាពលរដ្ឋ។
លោកបញ្ជាក់ថា៖ «សម្រាប់ការកើនឡើងនេះ គឺឆ្លុះបញ្ចាំងអំពីការខិតខំប្រឹងប្រែងផ្សព្វផ្សាយរបស់គ្រឹះស្ថានដែលទទួលបានអាជ្ញាប័ណ្ណអំពីសារប្រយោជន៍នៃការសន្សំប្រាក់ដល់សាធារណជន។ លើសពីនេះទៀត ពេលបច្ចុប្បន្ន MDIs ទាំងអស់បានខិតខំធ្វើទំនើបកម្មប្រព័ន្ធបច្ចេកវិទ្យារបស់ខ្លួនក្នុងការផ្តល់ជូនអតិថិជននូវសេវាកម្មថ្មីៗ និងកាន់តែងាយស្រួលដូចធនាគារដែរ ដូចជាការទូទាត់តាមប្រព័ន្ធឌីជីថលជាដើម។ ជាមួយគ្នានេះយើងបានផ្តល់នូវអត្រាការប្រាក់អាចលើសធនាគារពាណិជ្ជមួយចំនួនសម្រាប់ Fixed Deposit ដែលជាការទាក់ទាញមួយធ្វើឱ្យ MDIs អាចទទួលបានប្រាក់បញ្ញើច្រើន»។
អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា លោក គី សេរីវឌ្ឍន៍ យល់ឃើញថា ប្រជាពលរដ្ឋមានការយល់ដឹងកាន់តែច្រើនលើប្រព័ន្ធហិរញ្ញវត្ថុស្របពេលការបន្តកើនឡើងសន្សឹមៗនៃសេដ្ឋកិច្ចជាកត្តាជំរុញឱ្យប្រជាពលរដ្ឋមានការសន្សំកាន់តែច្រើន។
លោកថ្លែងថា៖ «ការកើនឡើងប្រាក់បញ្ញើរបស់គ្រឹះស្ថានឆ្លុះបញ្ចាំងពីការកើនឡើងនៃទំនុកចិត្តរបស់ប្រជាពលរដ្ឋលើប្រព័ន្ធហិរញ្ញវត្ថុ និងក៏ជាការយល់ឃើញអំពីកំណើនសន្សឹមៗនៃសេដ្ឋកិច្ចធ្វើឱ្យប្រជាពលរដ្ឋមានការប្រយ័ត្នប្រយែងទៅលើការចាយវាយដោយជំនួសមកវិញនូវការសន្សំ»។
ទោះយ៉ាងណា លោកនៅតែលើកទឹកចិត្តឱ្យទាំងគ្រឹះស្ថានមីក្រូហិរញ្ញវត្ថុបន្តជំរុញយន្តការនានាក្នុងការកៀរគរប្រាក់សន្សំក្នុងស្រុកជាជាងការរកទុនពីខាងក្រៅ។ លោកបន្តថា នាពេលបច្ចុប្បន្នទុនដែលគ្រឹះស្ថានមីក្រូហិរញ្ញវត្ថុពឹងផ្អែកខ្លាំងគឺពីខាងក្រៅដែលស្មើនឹង ១០ ដងនៃទុនក្នុងស្រុក។
ធនាគារជាតិនៃកម្ពុជា (NBC) កាលពីថ្ងៃទី ៦ ខែធ្នូ ឆ្នាំ ២០២១ បានចេញសេចក្តីជូនដំណឹងមួយស្តីពីការបញ្ឈប់ការផ្តល់អាជ្ញាប័ណ្ណថ្មី សម្រាប់ប្រកបអាជីវកម្មគ្រឹះស្ថានមីក្រូហិរញ្ញវត្ថុទទួលប្រាក់បញ្ញើ ដោយលើកឡើងថា ដើម្បីពង្រឹងបន្ថែមទៀតនូវសមត្ថភាពរបស់គ្រឹះស្ថានធនាគារ និងហិរញ្ញវត្ថុ ក៏ដូចជាការត្រួតពិនិត្យ សំដៅរក្សាស្ថិរភាពហិរញ្ញវត្ថុ និងរួមចំណែកដល់ការអភិវឌ្ឍសេដ្ឋកិច្ចជាតិ។
លោក សុខ វឿន រំពឹងថា ប្រាក់បញ្ញើរបស់ MDIs នឹងមានកំណើនដល់ ៣០ ភាគរយនៅត្រឹមដំណាច់ឆ្នាំនេះ ធៀបឆ្នាំ ២០២១ ។ លោកបញ្ជាក់ថា៖ «ការកើនឡើងចំនួនគណនី និងសមតុល្យប្រាក់បញ្ញើ ឆ្លុះបញ្ចាំងឱ្យឃើញពីការយល់ដឹងផ្នែកហិរញ្ញវត្ថុរបស់ប្រជាពលរដ្ឋ ជាពិសេសការយល់ដឹងពីសារៈសំខាន់នៃការសន្សំ»៕
