ភ្នំពេញៈ កម្ពុជាទទួលបានភ្ញៀវទេសចរបរទេសប្រមាណជាង ១,២៦ លាននាក់ក្នុងរយៈពេល ៩ ខែ ឆ្នាំ ២០២២ កើនជាង ៨៦១ ភាគរយ ធៀបរយៈពេលដូចគ្នាឆ្នាំ ២០២១ ក្នុងនោះភ្ញៀវមកពីប្រទេសថៃ និងវៀតណាម មានចំនួនជាង ៥៩ ភាគរយ។ នេះបើតាមទិន្នន័យពីក្រសួងទេសចរណ៍។
ទិន្នន័យចេញផ្សាយកាលពីចុងសប្តាហ៍មុនបង្ហាញថា ក្នុងចំណោមភ្ញៀវទេសចរបរទេសដែលធ្វើដំណើរមកកម្ពុជា ១ ២៦៥ ៧៧២ នាក់ ពីខែមករា ដល់ខែកញ្ញា ឆ្នាំ ២០២២ គឺភ្ញៀវមកពីប្រទេសថៃ មានចំនួន ៤៦២ ៧០៥ នាក់ កើនឡើង ៦១៧,៨ ភាគរយ បើធៀបរយៈពេលដូចគ្នាឆ្នាំ ២០២១ ដែលស្មើនឹង ៣៦,៦ ភាគរយនៃចំនួនភ្ញៀវសរុប និងភ្ញៀវជនជាតិវៀតណាម មានចំនួន ២៨៥ ១៦៣ នាក់ កើនឡើង ៣ ៦២៨,១ ភាគរយ ស្មើ ២២,៥ ភាគរយ។
ក្រៅពីប្រទេសទាំង ២ គឺមានមកពីប្រទេសចិន ៦២ ៤២៥ នាក់ ស្មើចំណែក ៤,៩ ភាគរយ, ឥណ្ឌូនេស៊ី ៤៩ ៩០៣ នាក់ ស្មើ ៣,៩ ភាគរយ, អាមេរិក ៤៩ ៨០២ នាក់ ស្មើ ៣,៩ ភាគរយ, ឡាវ ៣៨ ៧៨៣ នាក់ ស្មើ ៣,១ភាគរយ, កូរ៉េ ៣៦ ៤០៤ នាក់ ស្មើ ២,៩ ភាគរយ និងប្រទេសមួយចំនួនទៀតដូចជា ម៉ាឡេស៊ី បារាំង និងចក្រភពអង់គ្លេស។
ប្រធានសមាគមមគ្គុទ្ទេសក៍ទេសចរអង្គរ លោក ខៀវ ធី បានប្រាប់ ភ្នំពេញ ប៉ុស្តិ៍ កាលពីថ្ងៃទី ៣០ ខែតុលាថា ចំនួនភ្ញៀវទេសចរបរទេសមកទស្សនាប្រាសាទអង្គរវត្តបានកើនឡើងគួរឱ្យកត់សម្គាល់នារយៈពេលប៉ុន្មានខែចុងក្រោយនេះ។ ភ្ញៀវភាគច្រើន គឺមកពីប្រទេសនៅជាប់ព្រំដែនកម្ពុជា ជាពិសេសជនជាតិថៃ ខណៈមុនពេលការផ្ទុះឡើងនៃជំងឺកូវីដ ១៩ ភាគច្រើនជាជនជាតិចិន។
លោកបន្តថា ទោះពេលនេះកម្ពុជាមិនទាន់ទទួលបានភ្ញៀវពីប្រទេសឆ្ងាយៗច្រើនដូចមុន ប៉ុន្តែភ្ញៀវប្រទេសជិតខាង គឺពិតជាកំពុងដើរតួនាទីសំខាន់ក្នុងការជួយធ្វើឱ្យវិស័យទេសចរណ៍កម្ពុជាអាចរក្សានិរន្តរភាពរបស់ខ្លួនឡើងវិញបន្ទាប់ពីធ្លាក់ចុះដល់សូន្យក្នុងរយៈពេលជាង ២ ឆ្នាំកន្លងមក។
លោកប្រាប់ថា៖ «ក្នុងអំឡុងពេលការបើកទទួលភ្ញៀវបរទេសឡើងវិញជិត ១ ឆ្នាំមកនេះ ភ្ញៀវមកពីប្រទេសជិតខាង ពិសេសមកពីប្រទេសថៃ គឺមានចំនួនលើសលប់។ ទោះយ៉ាងណាយើងរំពឹងថា នៅពេលឆាប់ៗនេះនឹងមានភ្ញៀវមកពីប្រទេសឆ្ងាយៗចូលមកកម្សាន្តដែរ»។
បើតាមលោក ខៀវ ធី ភាគច្រើននៃភ្ញៀវមកពីប្រទេសជិតខាង គឺធ្វើដំណើរមកកម្ពុជាតាមរយៈផ្លូវគោក។
យោងតាមក្រសួងទេសចរណ៍ ក្នុងចំណោមភ្ញៀវបរទេសដែលបានមកកម្ពុជាទាំង ១ ២៦៥ ៧៧២ នាក់ គឺមកតាមផ្លូវគោក ចំនួន ៧៨៨ ៥៨០ នាក់ ស្មើនឹង ៦២,៣ ភាគរយ ភ្ញៀវតាមផ្លូវអាកាស ៣៧ ភាគរយ និងតាមផ្លូវទឹក ០,៧ ភាគរយ។
ប្រធានសមាគមទីភ្នាក់ងារទេសចរណ៍កម្ពុជា អ្នកស្រី ឆាយ ស៊ីវលីន បាននិយាយថា ក្នុងដំណាក់កាលពិភពលោកនៅមិនទាន់អាចគ្រប់គ្រងជំងឺកូវីដ ១៩ បាន ព្រមទាំងបញ្ហាជម្លោះភូមិសាស្ត្រនយោបាយ និងសេដ្ឋកិច្ចមិនទាន់ច្បាស់លាស់ វិស័យទេសចរណ៍របស់ប្រទេសនីមួយៗគឺត្រូវពឹងផ្អែកប្រទេសជិតខាង ឬក្នុងតំបន់ជាសំខាន់។ ក្នុងដំណាក់កាលនេះការរៀបចំគោលការណ៍ផ្សេងៗ ដើម្បីជួយសម្រួលដល់ការធ្វើដំណើរពីប្រទេសជិតខាង គឺចាំបាច់។
លោកស្រីបញ្ជាក់ថា៖ «ភ្ញៀវពីប្រទេសជិតខាងកំពុងក្លាយជាចំណុចចាប់ផ្តើមដ៏ល្អនៃការស្តារវិស័យទេសចរណ៍ឡើងវិញពីវិបត្តិជំងឺកូវីដ ១៩។ ទោះពួកគេមិនចំណាយច្រើនដូចភ្ញៀវមកពីតំបន់អឺរ៉ុប និងអាមេរិក ប៉ុន្តែវត្តមានរបស់ពួកគេ គឺពិតជាសំខាន់ណាស់ក្នុងពេលនេះ»។
កាលពីថ្ងៃទី ១៩ ខែកញ្ញា លោក ហោ សារុន រដ្ឋលេខាធិការក្រសួងទេសចរណ៍បានឱ្យដឹងថា ថ្នាក់ដឹកនាំក្រសួងទេសចរណ៍ចង់ធ្វើសំណើទៅរដ្ឋាភិបាលដើម្បីអនុញ្ញាតឱ្យប្រជាជនថៃដែលរស់នៅខេត្តជាប់ព្រំដែនកម្ពុជា អាចឆ្លងមកខេត្តសៀមរាប ដែលជាខេត្តទី២ (បន្ទាប់ពីខេត្តទី១ នៅជាប់ព្រំដែន) ដោយគ្រាន់តែប្រើប្រាស់បណ្ណព្រំដែន Border Pass (មិនចាំបាច់មានលិខិតឆ្លងដែន)។
លោកពន្យល់ថា បើប្រជាជនថៃរស់នៅខេត្តស្រះកែវ ពេលចូលមកខេត្តបន្ទាយមានជ័យ ហើយអាចចូលមកខេត្តសៀមរាប, អ្នកនៅខេត្តសុរិន្ទ្រ ពេលចូលមកខេត្តឧត្តរមានជ័យ អាចចូលបន្តមកខេត្តសៀមរាបបាន និងជួយឱ្យកម្ពុជាទទួលបានភ្ញៀវពីប្រទេសថៃកាន់តែច្រើន។
លោក សារុន បានថ្លែងថា៖ «ប្រជាជនថៃខ្លះពួកគាត់ចង់មកលេងប្រាសាទអង្គរវត្ត តែគាត់អត់មានលិខិតឆ្លងដែន ដូច្នេះបើគាត់រស់នៅខេត្តជាប់ព្រំដែនគាត់អាចស្នើសុំបណ្ណព្រំដែននឹងអាចចូលមកទស្សនារមណីយដ្ឋានអង្គរបាន»។
បើតាម លោក សារុន បើការអនុវត្តយ៉ាងដូច្នេះ កម្ពុជានឹងទទួលបានផលចំណេញបន្ថែមពីវិស័យទេសចរណ៍ តាមរយៈការមកទស្សនាផ្ទាល់របស់ភ្ញៀវដែលជាប្រជាជនថៃរស់នៅតាមខេត្តជាប់ព្រំដែនកម្ពុជា៕