.jpg)
ភ្នំពេញៈ កម្ពុជារំពឹងថា វេទិកាបច្ចេកវិទ្យាហិរញ្ញវត្ថុនៃពិព័រណ៍បច្ចេកវិទ្យាកម្ពុជា ២០២២ នឹងជួយជំរុញការអភិវឌ្ឍសេដ្ឋកិច្ចឌីជីថល និងបច្ចេកវិទ្យាហិរញ្ញវត្ថុនៅកម្ពុជាមានដំណើរការទៅមុខកាន់តែលឿន ព្រមទាំងអាចប្រមូលបាននូវធាតុចូលល្អៗ ដើម្បីរៀបចំសេចក្តីព្រាងគោលនយោបាយអភិវឌ្ឍន៍វិស័យបច្ចេកវិទ្យាហិរញ្ញវត្ថុកម្ពុជាផងដែរ។
សេចក្តីប្រកាសព័ត៌មានរបស់គណៈកម្មការសេដ្ឋកិច្ច និងធុរកិច្ចឌីជីថល(គសធឌ) កាលពីថ្ងៃទី ២៨ ខែតុលា ឱ្យដឹងថា អមជាមួយកិច្ចប្រជុំកំពូលអាស៊ាន រាជរដ្ឋាភិបាលកម្ពុជាបានអនុញ្ញាតឱ្យក្រសួងឧស្សាហកម្ម វិទ្យាសាស្ត្រ បច្ចេកវិទ្យានិងនវានុវត្តន៍ រៀបចំពិព័រណ៍បច្ចេកវិទ្យាកម្ពុជា ២០២២ នាថ្ងៃទី ១១ ដល់ថ្ងៃទី ១៣ ខែវិច្ឆិកា ឆ្នាំ ២០២២ នៅមជ្ឈមណ្ឌលសន្និបាត និងពិព័រណ៍កោះពេជ្រ។ វេទិកានេះ ត្រូវបានសហការរៀបចំដោយក្រសួងសេដ្ឋកិច្ច និងហិរញ្ញវត្ថុ គណៈកម្មាធិការសេដ្ឋកិច្ច និងធុរកិច្ចឌីជីថល ធនាគារជាតិនៃកម្ពុជា មជ្ឈមណ្ឌលបណ្តុះធុរកិច្ចថ្មី «តេជោ» និង CamTech Summit ដែលគាំទ្រដោយក្រុមហ៊ុនព្រូដិនសលកម្ពុជា សមាគមធនាគារនៅកម្ពុជា សមាគមមីក្រូហិរញ្ញវត្ថុកម្ពុជា និងសមាគមសហព័ន្ធហិរញ្ញវត្ថុ និងបច្ចេកវិទ្យានៃកម្ពុជា។ វេទិកានេះ គឺជាពិព័រណ៍បច្ចេកវិទ្យាហិរញ្ញវត្ថុលើកដំបូងនៅកម្ពុជា ហើយក៏ត្រូវបានធ្វើបញ្ចូលគ្នាជាមួយនឹងព្រឹត្តិការណ៍ CamTech Summit ប្រចាំឆ្នាំផងដែរ។
សេចក្តីប្រកាសព័ត៌មានបានបញ្ជាក់ថា៖ «វេទិកានេះមានគោលបំណងគាំទ្រ និងជំរុញការអភិវឌ្ឍសេដ្ឋកិច្ចឌីជីថល និងបច្ចេកវិទ្យាហិរញ្ញវត្ថុនៅកម្ពុជា ដោយកៀរគរនិយតករ វិស័យឯកជន ក៏ដូចជាស្ថាប័នជាតិ និងអន្តរជាតិពាក់ព័ន្ធមកជួបជុំគ្នា យល់ដឹងបន្ថែម និងកាន់តែច្បាស់ពីនិន្នាការ និងនវានុវត្តន៍ ឬផលិតផលបច្ចេកវិទ្យាហិរញ្ញវត្ថុ ព្រមទាំងពិភាក្សាពីកាលានុវត្តភាព និងបញ្ហាប្រឈមនានាដើម្បីពង្រឹ និងពង្រីកប្រព័ន្ធអេកូឡូស៊ី បច្ចេកវិទ្យាហិរញ្ញវត្ថុកម្ពុជា ដោយក្ដោបយកឱកាសជាអតិបរមាពីនវានុវត្តន៍ទាំងនោះ ព្រមទាំងសម្រប និងត្រៀមខ្លួនសម្រាប់ការវិវឌ្ឍដ៏រហ័សនៃបច្ចេកវិទ្យាហិរញ្ញវត្ថុនៅកម្ពុជា»។
លិខិតបានបន្តថា៖ «វេទិកានេះ ក៏មានបំណងដើម្បីប្រមូលធាតុចូលល្អៗ និងជាក់លាក់បន្ថែមក្នុងដំណើរការរៀបចំសេចក្តីព្រាងគោលនយោបាយអភិវឌ្ឍន៍វិស័យបច្ចេកវិទ្យាហិរញ្ញវត្ថុកម្ពុជា ដែលមានលក្ខណៈមុតស្រួច និងងាយបត់បែន»។
វេទិកាត្រូវបានរំពឹងថា នេះនឹងមានការចូលរួមពីថ្នាក់ដឹកនាំក្រសួងសេដ្ឋកិច្ច និងហិរញ្ញវត្ថុ គណៈកម្មាធិការសេដ្ឋកិច្ច និងធុរកិច្ច ឌីជីថល ធនាគារជាតិនៃកម្ពុជា មជ្ឈមណ្ឌលបណ្តុះធុរកិច្ចថ្មី «តេជោ» សមាគមសហព័ន្ធហិរញ្ញវត្ថុនិងបច្ចេកវិទ្យានៃកម្ពុជា គ្រឹះស្ថានធនាគារ គ្រឹះស្ថានមីក្រូហិរញ្ញវត្ថុ គ្រឹះស្ថានអប់រំ ស្ថាប័នស្រាវជ្រាវ ដៃគូអភិវឌ្ឍន៍ ព្រមទាំងសមាគម និង ស្ថាប័នពាក់ព័ន្ធដទៃក្នុងវិស័យឯកជន។ ក្នុងដំណើរការវេទិកានេះ វាគ្មិនកិត្តិយសជាតិនិងអន្តរជាតិនៃបណ្តានិយតករ គ្រឹះស្ថានធនាគារ និងហិរញ្ញវត្ថុ ក្រុមហ៊ុនធានារ៉ាប់រង និងសមាគមជាច្រើននឹងធ្វើបទបង្ហាញ ក៏ដូចជាជជែកពិភាក្សាគ្នាស៊ីជម្រៅលើប្រធានបទមួយចំនួន ដែលទាក់ទងនឹងធនាគារឌីជីថល បច្ចេកវិទ្យាហិរញ្ញវត្ថុក្នុងវិស័យធានារ៉ាប់រង សន្តិសុខសាយប័រ ក្នុង Open Finance និងការដាក់ឱ្យដំណើរការនៃថ្នាល Cambodia Distributed Ledger ជាដើម។
ប្រធានសមាគមបចេ្ចកវិទ្យាឌីជីថលកម្ពុជា លោក ឈិន កេន បានប្រាប់ ភ្នំពេញ ប៉ុស្តិ៍ កាលពីថ្ងៃទី ៣១ ខែតុលា ថា វេទិកាបច្ចេកវិទ្យាហិរញ្ញវត្ថុនៃពិព័រណ៍បច្ចេកវិទ្យាកម្ពុជា ២០២២ នឹងផ្តល់ផលវិជ្ជមានច្រើនដល់ប្រទេសកម្ពុជា ពិសេសអ្នកនៅក្នុងវិស័យបចេ្ចកវិទ្យាឌីជីថល ដែលកំពុងត្រូវបានប្រើប្រាស់កាន់តែទូលំទូលាយនាពេលនេះ។ នៅក្នុងវេទិកានេះនឹងមានដាក់តាំងបង្ហាញនូវបច្ចេកវិទ្យាថ្មីៗដែលត្រូវបានបង្កើតឡើងដោយជនជាតិខ្មែរ ដើម្បីបង្ហាញដល់អ្នកដឹកនាំ និងអ្នកជំនាញរបស់ប្រទេសនានា ដែលមកចូលរួមក្នុងកិច្ចប្រជុំកំពូលអាស៊ានផងដែរ។
លោកបញ្ជាក់ថា៖ «វេទិកាបច្ចេកវិទ្យាឌីជីថល ដែលកម្ពុជានឹងត្រូវរៀបចំឡើងក្នុងអំឡុងពេលកិច្ចប្រជុំអាស៊ាននឹងមិនត្រឹមតែបង្ហាញពីការរីកចម្រើននៃប្រព័ន្ធបច្ចេកវិទ្យានៅកម្ពុជាទៅដល់ភ្ញៀវបរទេសដែលបានទៅទស្សនាប៉ុណ្ណោះទេ ប៉ុន្តែក៏អាចទាក់ទាញអ្នកវិនិយោគឱ្យមកវិនិយោគក្នុងវិស័យបច្ចេកវិទ្យានៅកម្ពុជាផងដែរ»៕
