.jpg)
ភ្ញៀវទេសចរ នៅបរិវេណព្រលានយន្តហោះខេត្តសៀមរាប។ ភ្នំពេញ ប៉ុស្តិ៍
ភ្នំពេញៈ អ្នកក្នុងវិស័យទេសចរណ៍បានលើកឡើងថា ការចាប់ផ្តើមហោះហើរឡើងវិញនៃក្រុមហ៊ុន Lao Airlines មកកម្ពុជា គឺមិនត្រឹមតែជួយធ្វើឱ្យភ្ញៀវទេសចរនៃប្រទេសទាំង ២ កើនឡើងប៉ុណ្ណោះទេ ប៉ុន្តែនឹងក្លាយជាផ្នែកមួយដ៏សំខាន់នៃកញ្ចប់ដំណើរទស្សនកិច្ចតំបន់ឥណ្ឌូចិនទាំងមូល។
បន្ទាប់ពីផ្អាកមួយរយៈដោយសារការឆ្លងរាលដាលជំងឺកូវីដ ១៩ ក្រុមហ៊ុនអាកាសចរណ៍ឡាវ Lao Airlines បានចាប់ផ្តើមដំណើរការជើងហោះហើរលើកទី១ របស់ខ្លួនឡើងវិញ កាលពីថ្ងៃទី ១ ខែវិច្ឆិកា ដោយមានជើងហោះហើរចំនួន ៣ ជើង ក្នុង ១ សប្តាហ៍ (អង្គារ, ព្រហស្បតិ៍, សៅរ៍) រវាងទីក្រុងហ្លួងព្រះបាង-ប៉ាក់សេ-សៀមរាប។
ការហោះហើរឡើងវិញលើកទី១ នេះធ្វើឡើងក្នុងដំណើរមកប្រទេសកម្ពុជារបស់លោកស្រី Suanesavanh Vignaket រដ្ឋមន្ត្រីក្រសួងព័ត៌មាន វប្បធម៌ និងទេសចរណ៍ឡាវ ដើម្បីចូលរួមកិច្ចប្រជុំរដ្ឋមន្ត្រីទេសចរណ៍អេកម៉ិក(ACMECS) លើកទី៥, កិច្ចប្រជុំរដ្ឋមន្ត្រីទេសចរណ៍ CLMV លើកទី៦, កិច្ចប្រជុំឧត្តមមន្ត្រីទេសចរណ៍អេកម៉ិកលើកទី៥ និងកិច្ចប្រជុំឧត្តមមន្ត្រីទេសចរណ៍ CLMV អមទៅដោយកិច្ចសន្ទនាទេសចរណ៍អេកម៉ិក-CLMV លើកទី១ ចាប់ពីថ្ងៃទី ១-៥ ខែវិច្ឆិកា ឆ្នាំ ២០២២ នៅខេត្តសៀមរាប។
ក្រសួងទេសចរណ៍បានលើកឡើងថា៖ «ការហោះហើរឡើងវិញនេះបង្ហាញពីសញ្ញាណនៃការងើបឡើងនៃវិស័យទេសចរណ៍កម្ពុជា»។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានប្រាប់ ភ្នំពេញ ប៉ុស្តិ៍ នាថ្ងៃទី ២ ខែវិច្ឆិកាថា ការបើកដំណើរការនូវផ្លូវហោះហើរឡើងវិញរវាងកម្ពុជា-ឡាវ របស់ក្រុមហ៊ុន Lao Airlines នឹងរួមចំណែកយ៉ាងច្រើនក្នុងការធ្វើឱ្យវិស័យនេះរីកធំធាត់ឡើងវិញ។
លោកស្រីបញ្ជាក់ថា ទោះបីចំនួនភ្ញៀវទេសចររវាងប្រទេសជិតខាងទាំង ២ នៅមានចំនួនតិច ប៉ុន្តែអ្វីដែលសំខាន់ គឺការតភ្ជាប់សម្រាប់កញ្ចប់ទេសចរណ៍នៅក្នុងតំបន់។ ការតភ្ជាប់ផ្លូវហោះហើររវាងប្រទេសកម្ពុជា-ឡាវ-វៀតណាម គឺជាការតភ្ជាប់ក្រុមប្រទេសក្នុងតំបន់ឥណ្ឌូចិនទាំងមូល ព្រោះកន្លងមកមានក្រុមហ៊ុនទេសចរណ៍អន្តរជាតិជាច្រើនបានលក់ដំណើរទស្សនកិច្ចនៃប្រទេសក្នុងតំបន់ឥណ្ឌូចិន ជាកញ្ចប់។
លោកស្រីថ្លែងថា៖ «ឥណ្ឌូចិន ជាក្រុមប្រទេសដែលធ្លាប់មានរឿងរ៉ាវប្រវត្តិសាស្ត្រជាច្រើន និងជាទីតាំងមានកន្លែងកម្សាន្តបែបធម្មជាតិច្រើន ដូច្នេះនៅពេលមានការតភ្ជាប់បែបនេះ វានឹងធ្វើឱ្យការផ្សព្វផ្សាយពីការទៅទស្សនាប្រទេសទាំង ៣ បានកាន់តែទូលំទូលាយ»។
លោកស្រីបន្ថែមថា ប្រទេសឡាវ មានកន្លែងសម្រាប់ទទួលទេសចរជាច្រើនដូចជា ប្រាសាទបុរាណ ទឹកជ្រោះ តំបន់ភ្នំ និងកន្លែងកសិកម្មជាច្រើនទៀត។
ប្រធានសមាគមមគ្គុទ្ទេសក៍ទេសចរអង្គរ លោក ខៀវ ធី បានប្រាប់ថា បើនិយាយពីចំនួនភ្ញៀវទេសចរឡាវចូលមកទស្សនាក្នុងខេត្តសៀមរាប គឺមិនមានចំនួនច្រើនទេ ប៉ុន្តែលោករំពឹងថា នៅពេលស្ថានភាពការរីករាលដាលកូវីដ ១៩ ធូរស្រាល និងសេដ្ឋកិច្ចពិភពលោកល្អឡើងវិញ នឹងមានភ្ញៀវជនជាតិឡាវកាន់តែច្រើនមកកម្សាន្តនៅកម្ពុជា។ បច្ចុប្បន្នដោយសារប្រទេសទាំង ២ មានព្រំដែនគោកជាប់គ្នា ហេតុនេះក៏មានប្រជាជនប្រទេសទាំង ២ ធ្វើដំណើរតាមផ្លូវគោកច្រើនផងដែរ។
លោកប្រាប់ថា៖ «យើងស្វាគមន៍គ្រប់ការបើកជើងហោះហើរ។ ទោះជាតិច ឬច្រើន គឺប្រាកដជាមានភ្ញៀវ គឺទាំងភ្ញៀវជនជាតិឡាវ និងជនបរទេសនៅក្នុងប្រទេសឡាវ»។
ទិន្នន័យពីក្រសួងទេសចរណ៍បានឱ្យដឹងថា ក្នុងរយៈពេល ៩ ខែដើមឆ្នាំ ២០២២ កម្ពុជាទទួលបានភ្ញៀវជនជាតិឡាវសរុប ៣៨ ៧៨៣ នាក់ កើនឡើងពី ៨៣ នាក់ កាលពីរយៈពេលដូចគ្នាឆ្នាំ ២០២១។ សម្រាប់ឆ្នាំ ២០១៩ ដែលជាពេលកម្ពុជាទទួលបានភ្ញៀវទេសចរបរទេសច្រើនបំផុតចំនួន ៦,៦១ លាននាក់ គឺមានជនជាតិឡាវ ៣៦៣ ៩៥១ នាក់ ស្មើនឹងចំណែកទីផ្សារ ៥,៥ ភាគរយ៕
