.jpg)
លោកហ៊ុន សែននៅក្នុងកិច្ចប្រជុំ CLMV ពីថ្ងៃទី ៣ វិច្ឆិកា។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន បានលើកឡើងថា វិបត្តិកូវីដ ១៩ បានធ្វើឱ្យប្រទេសជាច្រើនលើពិភពលោកមើលឃើញពីសារៈសំខាន់របស់វិស័យទេសចរណ៍ក្នុងការជំរុញកំណើនសេដ្ឋកិច្ច ក៏ដូចជាតួនាទីសំខាន់របស់វាក្នុងការពង្រឹងទំនាក់ទំនង និងសាមគ្គីភាពរវាងប្រជាជាតិ និងប្រជាជាតិ។
ថ្លែងក្នុងសារលិខិតស្វាគមន៍ពិធីបើកកិច្ចប្រជុំរដ្ឋមន្ត្រីទេសចរណ៍អេកម៉ិក (ACMECS) លើកទី ៥ និងកិច្ចប្រជុំរដ្ឋមន្ត្រីទេសចរណ៍ CLMV លើកទី ៦ ដែលរៀបចំធ្វើនៅខេត្តសៀមរាប កាលពីថ្ងៃទី ៣ ខែវិច្ឆិកា លោក ហ៊ុន សែន បានលើកឡើងថា ក្នុងនាមប្រជាពលរដ្ឋ និងរាជរដ្ឋាភិបាលកម្ពុជា លោកពិតជាមានក្តីរីករាយ និងសម្តែងការស្វាគមន៍យ៉ាងកក់ក្តៅចំពោះវត្តមានរបស់គណៈប្រតិភូជាតិ-អន្តរជាតិ ដែលបានចូលរួមកិច្ចប្រជុំរដ្ឋមន្ត្រីទេសចរណ៍យុទ្ធសាស្ត្រ កិច្ចសហប្រតិបត្តិការសេដ្ឋកិច្ចអាយ៉េយ៉ាវ៉ាឌីចៅប្រាយ៉ាមេគង្គ (អេកម៉ិក) លើកទី ៥ និងកិច្ចប្រជុំរដ្ឋមន្ត្រីទេសចរណ៍ កម្ពុជា-ឡាវ-មីយ៉ាន់ម៉ា-វៀតណាម (CLMV) លើកទី ៦ នាថ្ងៃទី ៣ ខែវិច្ឆិកា ឆ្នាំ ២០២២។ កិច្ចប្រជុំខាងលើពិតជាបង្ហាញសាមគ្គីភាពក្នុងតំបន់ ជាពិសេសជាឱកាសដែលថ្នាក់ដឹកនាំទេសចរណ៍អេកម៉ិក និង CLMV ធ្វើការវាយតម្លៃផលប៉ះពាល់នៃវិបត្តិកូវីដ ១៩ មកលើវិស័យទេសចរណ៍ ព្រមទាំងអាចដាក់ចេញនូវយុទ្ធសាស្ត្រសមស្របក្នុងការស្តារឡើងវិញ និងបង្កើនកិច្ចសហប្រតិបត្តិការថែមទៀត។
លោកលើកឡើងទៀតថា អេកម៉ិក និង CLMV បាននិងកំពុងចូលរួមចំណែកយ៉ាងសំខាន់ក្នុងការជំរុញឱ្យមានកំណើននៃរំហូរទេសចររវាងប្រទេសសមាជិក ក៏ដូចជាកិច្ចសហការផ្សព្វផ្សាយទេសចរពីប្រទេសទី ៣ បានយ៉ាងមានប្រសិទ្ធភាពក្រោមយុទ្ធនាការ «ប្រទេស ៥ គោលដៅទេសចរណ៍តែ ១» និង «ប្រទេស ៤ គោលដៅទេសចរណ៍តែ ១»។
លោកថ្លែងថា៖ «ឆ្លងកាត់វិបត្តិកូវីដ ១៩ រយៈពេល ២ ឆ្នាំកន្លងមកនេះ តួនាទីនៃវិស័យទេសចរណ៍ត្រូវបានមើលឃើញកាន់តែចាំបាច់ក្នុងការទ្រទ្រង់កំណើនសេដ្ឋកិច្ច និងភាពរីកចម្រើនរបស់សង្គមជាតិ ហើយជាពិសេសតួនាទីដ៏សំខាន់ក្នុងការពង្រឹងទំនាក់ទំនងរវាងប្រជាជាតិ និងប្រជាជាតិ, សាមគ្គីភាព និងមិត្តភាពនៃប្រទេសក្នុងតំបន់»។
ក្នុងលិខិតខាងលើ លោក ហ៊ុន សែន ក៏បានចែករំលែកគំនិតសំខាន់ៗចំនួន ៤ ដូចជា ទី១.អេកម៉ិក និង CLMV គួរបង្កើនកិច្ចសហប្រតិបត្តិការលើការអភិវឌ្ឍផលិតផលថ្មីៗបំពេញឱ្យគ្នាទៅវិញទៅមក និងផ្តល់នូវភាពសម្បូរបែបដល់ទេសចរ ស្របតាមការប្រែប្រួលនិន្នាការទេសចរណ៍ក្រោយវិបត្តិកូវីដ ១៩, ទី២. ក្នុងបរិបទឌីជីថលូបនីយកម្ម អេកម៉ិក និង CLMV គួរជំរុញការផ្លាស់ប្តូរបទពិសោធលើដំណើរការបរិវត្តកម្មឌីជីថលក្នុងវិស័យទេសចរណ៍, ទី៣. អេកម៉ិក និង CLMV គួរគិតគូរជំរុញរំហូរទេសចរផ្ទៃក្នុងតំបន់អាស៊ិក (ACMECS-Intra Traveler) និងរំហូរទេសចរផ្ទៃក្នុងតំបន់ CLMV (CLMV-Intra Traveler) ដោយត្រូវគិតគូរផងដែរលើការបង្កើនការតភ្ជាប់ផ្លូវគោក ផ្លូវអាកាស និងផ្លូវទឹក បន្ថែមទៀត ព្រមទាំងជំរុញទេសចរណ៍បើកបរដោយខ្លួនឯងសម្រាប់ការទាក់ទាញទេសចរពីប្រទេសទី៣, និងទី៤. ដើម្បីសម្របសម្រួលការអនុវត្តផែនការសកម្មភាពទេសចរណ៍អេកម៉ិក និង CLMV ដែលបានដាក់ចុះ ហើយកម្ពុជាក៏គាំទ្រនូវការគិតគូរបង្កើតឱ្យមានយន្តការស្ថាប័នទេសចរណ៍អេកម៉ិក និង CLMV ដែលអាចជាលេខាធិការដ្ឋាន ឬរចនាសម្ព័ន្ធណាមួយ ហើយកម្ពុជារីករាយក្នុងការទទួលធ្វើជាម្ចាស់ផ្ទះ។
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន បាននិយាយថា វិស័យទេសចរណ៍ដើរតួនាទីជាផ្នែកសំខាន់មួយនៅក្នុងការទ្រទ្រង់កំណើនសេដ្ឋកិច្ចជាតិ និងកិច្ចសហប្រតិបត្តិការលើគ្រប់វិស័យរវាងប្រទេស និងប្រទេស។ ទោះយ៉ាងណា វិបត្តិកូវីដ ១៩ បានធ្វើឱ្យវិស័យនេះត្រូវជាប់គាំងស្ទើរទាំងស្រុងនៅគ្រប់ប្រទេស។
លោកស្រីថ្លែងថា៖ «នៅពេលវិស័យទេសចរណ៍មានដំណើរការល្អឡើងវិញ វានឹងផ្តល់ផលវិជ្ជមានជាច្រើនសម្រាប់ប្រទេស ហើយក៏នឹងជួយឱ្យកិច្ចសហប្រតិបត្តិការរវាងប្រទេសនានាលើពិភពលោកកាន់តែល្អផងដែរ»៕
