កាលពីថ្ងៃពុធ ទី ២ ខែវិច្ឆិកា ឆ្នាំ ២០២២ រដ្ឋបាលគយចិនបានធ្វើបច្ចុប្បន្នភាពបញ្ជីឈ្មោះក្រុមហ៊ុនប្រេស៊ីលដែលទទួលបានការអនុញ្ញាតឱ្យនាំកសិផលពោតទៅកាន់ទីផ្សារប្រទេសចិន។ សម្រាប់មន្ដ្រីកសិកម្មប្រេស៊ីលតាមរយៈការអនុម័តនេះប្រេស៊ីលសង្ឃឹមថា នឹងអាចជំរុញការនាំចេញពោតរបស់ខ្លួន ខណៈចិន គឺជាប្រទេសដែលមានសេដ្ឋកិច្ចធំជាងគេលំដាប់ទី២ នៅលើពិភពលោក។
ការជ្រៀតចូលនៃកសិផលពោតទៅក្នុងទីផ្សារចិនទំនងជានឹងធ្វើឱ្យមានការផ្លាស់ប្ដូរលំហូរពាណិជ្ជកម្មសកលជាពិសេសវាអាចទាញទម្លាក់ការលក់ពោតរបស់អាមេរិក។ អាមេរិកដែលជាអ្នកផ្គត់ផ្គង់កសិផលពោតធំជាងគេសម្រាប់ទីផ្សារពិភពលោក។ កន្លងមកប្រទេសចិន ពឹងផ្អែកលើសហរដ្ឋអាមេរិក និងអ៊ុយក្រែន សម្រាប់ការផ្គត់ផ្គង់ពោតភាគច្រើនរបស់ខ្លួន ប៉ុន្តែការនាំចេញពោតពីអ៊ុយក្រែនមកកាន់ប្រទេសចិន ត្រូវបានរំខានចាប់តាំងពីអ៊ុយក្រែនរងការឈ្លានពានពីរុស្ស៊ីមក។
មន្ដ្រីកសិកម្មទទួលបន្ទុកផ្នែកកសិផលបន្លែនៃក្រសួងកសិកម្មប្រេស៊ីល លោក Glauco Bertoldo ថ្លែងថា វាគឺជារឿងដ៏ល្អមួយសម្រាប់ប្រទេសប្រេស៊ីលដែលមានទីផ្សារនាំចេញកសិផលកាន់តែច្រើនឡើង។ លោកបន្តថា សព្វថ្ងៃនេះរដ្ឋបាលគយចិនបានអនុញ្ញាតឱ្យក្រុមហ៊ុនប្រេស៊ីលចំនួន ១៣៦ ក្រុមហ៊ុន នាំចេញពោតទៅកាន់ទីផ្សារប្រទេសចិន និងថា ចំនួននេះអាចនឹងកើនឡើងបន្ថែមទៀតនាសប្ដាហ៍ក្រោយ។
បើតាមគម្រោងការនាំចេញពោតរបស់ប្រេស៊ីលទៅកាន់ទីផ្សារប្រទេសចិន អាចនឹងចាប់ផ្តើមក្នុងពេលឆាប់ៗនេះ ប៉ុន្តែក្នុងទ្រង់ទ្រាយតូចប៉ុណ្ណោះ ខណៈការនាំចេញក្នុងទ្រង់ទ្រាយធំនឹងអាចធ្វើឡើងនៅក្នុងរដូវកាលប្រមូលផលបន្ទាប់ដែលចាប់ផ្តើមនៅដើមឆ្នាំ ២០២៣។ នៅពេលដែលប្រេស៊ីលចាប់ផ្ដើមនាំចេញពោតទៅកាន់ទីផ្សារចិនប្រទេសមួយចំនួនដែលធ្លាប់ទិញពោតរបស់ប្រេស៊ីលនាពេលកន្លងមក ដូចជាអេស្ប៉ាញ និងអេហ្ស៊ីប ត្រូវបានអ្នកជំនាញផ្នែកសេដ្ឋកិច្ចមួយចំនួនព្យាករណ៍ថា អាចនឹងងាកទៅទិញពោតពីសហរដ្ឋអាមេរិកជំនួសវិញ។
សូមរំឭកថា ប្រទេសចិន និងប្រេស៊ីល បានចុះហត្ថលេខាលើពិធីសារសម្រាប់ការនាំចេញពោតពីប្រទេសប្រេស៊ីល ទៅកាន់ប្រទេសចិនតាំងពីឆ្នាំ ២០១៤ មកម្ល៉េះ ប៉ុន្តែការជួញដូរមានបរិមាណតិចតួចណាស់ ដោយសារតែលក្ខខណ្ឌភូតគាមអនាម័យដ៏ស្មុគស្មាញ។
ទិន្នន័យប៉ាន់ស្មានបង្ហាញថា ប្រទេសចិន មានតម្រូវការនាំចូលពោតចំនួន ១៨ លានតោន ចាប់ពីខែតុលា ឆ្នាំ ២០២២ សម្រាប់ការប្រើប្រាស់ក្នុងឆ្នាំ ២០២២ និងឆ្នាំ ២០២៣។ ការនាំចូលពោតពីប្រទេសអ៊ុយក្រែន ទៅក្នុងទីផ្សារប្រទេសចិន បានធ្លាក់ចុះមកនៅត្រឹមតិចជាង ២ ០០០ តោន ក្នុងខែកញ្ញា ឆ្នាំនេះ ដែលជាហេតុធ្វើឱ្យប្រទេសចិន ត្រូវពឹងផ្អែកលើសហរដ្ឋអាមេរិកសម្រាប់ការផ្គត់ផ្គង់កសិផលពោតភាគច្រើនរបស់ខ្លួន៕