.jpg)
ភ្ញៀវទេសចរមកទស្សនាប្រាសាទអង្គរវត្ត កាលពីម្សិលមិញ។ រូបថត ក្រសួងទេសចរណ៍
ភ្នំពេញៈ ក្រសួងទេសចរណ៍បញ្ជាក់ថា តួលេខភ្ញៀវទេសចរផ្ទៃក្នុងរយៈពេល ៧ថ្ងៃ ចាប់ពីថ្ងៃទី ៣១ ខែតុលា ដល់ថ្ងៃទី៦ ខែវិច្ឆិកា មានចំនួនសរុប ៨០ម៉ឺននាក់ ក្នុងនោះភ្ញៀវជាតិ ៧៧ម៉ឺននាក់ និងភ្ញៀវបរទេសផ្ទៃក្នុង ៣ម៉ឺននាក់។
គោលដៅទេសចរណ៍សំខាន់ៗ មាន ៧រាជធានី ខេត្ត ដែលរួមមាន ខេត្តកំពត ព្រះសីហនុ បន្ទាយមានជ័យ កំពង់ធំ សៀមរាប តាកែវ រាជធានីភ្នំពេញ។
ក្រសួងទេសចរណ៍បញ្ជាក់ក្នុងហ្វេសប៊ុកនាថ្ងៃទី ៨ ខែវិច្ឆិកា ថា តួលេខនេះ មិនទាន់រាប់បញ្ចូលភ្ញៀវទេសចរសម្រាប់ថ្ងៃឈប់សម្រាកព្រះរាជ្យពិធីបុណ្យអុំទូក បណ្តែតប្រទីប និងសំពះព្រះខែអកអំបុកនោះទេ។
ប្រភពដដែលបន្តថា នាសប្តាហ៍កន្លងមក បណ្តាខេត្តមួយចំនួន ដូចជា ខេត្តកំពង់ធំ បន្ទាយមានជ័យ និងកំពត បានរៀបចំពិធីប្រណាំងទូក បណ្តែតប្រទីប អុជកាំជ្រួច ការតាំងពិព័រណ៍ និងព្រឹត្តិការណ៍កម្សាន្តជាច្រើនទៀត។
បើតាមក្រសួងទេសចរណ៍ ប្រជាពលរដ្ឋបានចាកចេញពីរាជធានីភ្នំពេញទៅស្រុកកំណើត ក៏ដូចជា ផ្តើមដំណើរកម្សាន្តតាំងពីថ្ងៃទី ៥ ខែវិច្ឆិកា មកម្ល៉េះ និងបន្តរហូតដល់ថ្ងៃឈប់សម្រាកពិធីបុណ្យអុំទូក និងអាចបន្តរហូតដល់ចុងសប្តាហ៍នេះផងដែរ។
ពិធីបុណ្យអុំទូកប្រព្រឹត្តទៅចាប់ពីថ្ងៃទី៧ ដល់ថ្ងៃទី៩ ខែវិច្ឆិកា៕
