ភ្នំពេញៈ រដ្ឋមន្ត្រី​ក្រសួង​ពាណិជ្ជកម្ម​កម្ពុជា លោក ប៉ាន សូរស័ក្តិ បានស្នើ​ថ្នាក់ដឹកនាំ​អង្គការ​ពាណិជ្ជកម្ម​ក្រៅ​ប្រទេស​ជប៉ុន ​(JETRO) ឱ្យ​បន្ត​ចូលរួម​ទាក់ទាញ​វិនិយោគិន​ជប៉ុន​ចូលមក​បណ្តាក់ទុន​នៅ​កម្ពុជា​កាន់តែ​ច្រើន និង​ជួយ​ទិញ​ផលិតផល​កម្ពុជា ព្រមទាំង​ជួយ​សម្របសម្រួល​ពិនិត្យ​លទ្ធភាព​សិក្សា​បន្ថែម​ពី​ការចរចា​លើ​កិច្ចព្រមព្រៀង​ពាណិជ្ជកម្ម​សេរី​ទ្វេភាគី​រវាង​ជប៉ុន​-​កម្ពុជា​។

សំណើ​នេះ​ត្រូវ​លោក ប៉ាន សូរស័ក្តិ លើកឡើង​ក្នុង​ជំនួប​ពិភាក្សា​ការងារ​ជាមួយ​លោក Nobuhiko Sasaki ប្រធាន​ក្រុមប្រឹក្សាភិបាល​នៃ​អង្គការ JETRO កាលពី​ថ្ងៃទី​ ៩ ខែវិច្ឆិកា ដើម្បី​ជំរុញ​បរិយាកាស​ធុរកិច្ច និង​បង្កើន​ទំនាក់​ទំនង​ពាណិជ្ជកម្ម​កម្ពុជា​-​ជប៉ុន​។

លោក សូរស័ក្តិ បាន​លើកឡើង​ថា កម្ពុជា​-​ជប៉ុន​មាន​ទំនាក់ទំនង​ល្អ​ជាមួយ​គ្នា​ជា​យូរ​មកហើយ ហើយ​តាមរយៈ​ជំនួប​នេះ លោក​សូម​លើក​ទឹកចិត្ត និង​ស្នើឱ្យ JETRO ជួយ​ទាក់ទាញ​វិនិយោគិន​ជប៉ុន​មក​កម្ពុជា​កាន់តែ​ច្រើន និង​ពិនិត្យ​លទ្ធភាព​ក្នុង​ការគាំទ្រ​ដល់​ចលនា​ភូមិ​ ១ ផលិតផល​ ១ ជាពិសេស​ការរៀបចំ​ពិព័រណ៍ និង​លក់​ផលិតផល​ខ្មែរ​នៅ​ទីផ្សារ​ជប៉ុន​។

លោក​ថ្លែងថា​៖ «​ខ្ញុំ​សូម​ស្នើ JETRO សហការ​ចូលរួម​ពិព័រណ៍ OVOP 2022 ដែល​រៀបចំ​ឡើង​ដោយ​ក្រសួង​ពាណិជ្ជកម្ម​កម្ពុជា និង​ជួយ​សម្រប​សម្រួល​ក្នុង​ការពិនិត្យ​លទ្ធភាព​សិក្សា​បន្ថែម​អំពី​កិច្ចចរចា​កិច្ចព្រមព្រៀង​ពាណិជ្ជកម្ម​សេរី​ទ្វេភាគី​រវាង​ជប៉ុន និង​កម្ពុជា ព្រមទាំង​ស្នើ JETRO ឱ្យ​កៀរគរ​ក្រុមហ៊ុន​ជប៉ុន​ដែល​មាន​ទីតាំងនៅ​ប្រទេស​ជិតខាង​ពិសេស​ថៃ​+១ និង​វៀតណាម​+១ ពិចារណា​ ដើម្បី​ពង្រីក​អាជីវកម្ម​របស់ខ្លួន​មក​កម្ពុជា​»​។

លោក Nobuhiko Sasaki បាន​ថ្លែង​អំណរគុណ​ដល់​កម្ពុជា ​សម្រាប់​ការគាំទ្រ​យ៉ាងខ្លាំង​លើ RCEP ជាពិសេស​ក្រសួង​ពាណិជ្ជកម្ម​ដែល​តែង​គាំទ្រ​ដល់​ក្រុមហ៊ុន​ជប៉ុន​ក្នុង​ការវិនិយោគ​នៅ​កម្ពុជា​។ បន្ថែម​ពីនេះ​លោក​ក៏បាន​ស្នើសុំ​កិច្ចសហប្រតិបត្តិការ​ពី​ក្រសួង​ពាណិជ្ជកម្ម​បន្ថែមទៀត ដើម្បី​ជំរុញ​ការនាំចេញ​ផលិតផល​ជប៉ុន ជាពិសេស​ផលិតផល​គ្រឿងសម្អាង និង​អាហារ​មកកាន់​ទីផ្សារ​កម្ពុជា​។

លោក Nobuhiko Sasaki បាន​និយាយ​ថា​៖ «JETRO គ្រោង​នឹង​រៀបចំ​សិក្ខាសាលា​ថៃ​+១ នៅ​ប្រទេស​ថៃ​ក្នុង​ខែមករា ឆ្នាំ​ ២០២៣ ដើម្បី​ទាក់ទាញ​ក្រុមហ៊ុន​ជប៉ុន​ដែល​មាន​ទីតាំង​ក្នុងប្រទេស​ថៃ ឱ្យ​ពិនិត្យ​លទ្ធភាព​ពង្រីក​អាជីវកម្ម​របស់​ពួកគេ​ឱ្យមក​វិនិយោគ​នៅ​ប្រទេស​កម្ពុជា ពិសេស​តាមរយៈ​ច្រក​អន្តរជាតិ​ប៉ោយប៉ែត​»​។

យោងតាម​ធនាគារជាតិ​នៃ​កម្ពុជា​គិត​ត្រឹម​ចុងឆ្នាំ​ ២០២១ ការវិនិយោគ​ផ្ទាល់​ជប៉ុន​នៅ​កម្ពុជា ស្ថិតនៅ​ចំណាត់​ថ្នាក់​ទី​ ៥ ដោយមាន​តម្លៃ​សរុប ២,៤​ ពាន់​លាន​ដុល្លារ ឬ​ស្មើ ៥,៩ ​ភាគរយ​នៃ​ការវិនិយោគ​ផ្ទាល់​បរទេស​ (FDI)​ នៅ​កម្ពុជា ដែលមាន​ទឹកប្រាក់​សរុប ៤១ ​ពាន់​លាន​ដុល្លារ​។ ក្នុងនោះ​ការវិនិយោគ​របស់​ចិន​ចំនួន​ ៤៣,៩ ​ភាគរយ​, កូរ៉េ ១១,៩ ​ភាគរយ​, សិង្ហបុរី ៦,៥​ ភាគរយ​, វៀតណាម ៦,១ ​ភាគរយ​។

អនុប្រធាន​សភាពាណិជ្ជកម្ម​កម្ពុជា លោក លឹម ហេង បាន​ប្រាប់​ភ្នំពេញ​-​ប៉ុស្តិ៍​ថា ជប៉ុន គឺជា​ទីផ្សារ​ទទួល​ទិញ​ទំនិញ​ធំ​មួយ​របស់​កម្ពុជា​ដោយ​ទឹកប្រាក់​នាំចេញ​ទំនិញ​ពី​កម្ពុជា​ទៅ​ជប៉ុន​កើនឡើង​ជា​បន្តបន្ទាប់​។ ចំនួន​នេះ​ត្រូវ​រំពឹងថា​នឹង​កើនឡើង​បន្ថែមទៀត បន្ទាប់ពី​សភាពាណិជ្ជកម្ម​កម្ពុជា កាលពី​ពេល​ថ្មីៗ​នេះ​ទើប​បាន​បើក​ការិយាល័យ​តំណាង​របស់ខ្លួន​នៅក្នុង​តំបន់​សេនដាយ ក្នុង​ប្រទេស​ជប៉ុន​។

លោក​ប្រាប់​ទៀត​ថា​៖ «​ការវិនិយោគ​ផ្ទាល់​របស់​ជប៉ុន​នៅ​កម្ពុជា មាន​ភាគច្រើន​នៅក្នុង​តំបន់​សេដ្ឋកិច្ច​ពិសេស និង​មាន​ផលិតកម្ម​សំខាន់ៗ​ដូចជា គ្រឿងសំណង់ គ្រឿង​បង្គុំ​អេឡិចត្រូនិក និង​អគ្គិសនី ជាដើម​»​។

បច្ចុប្បន្ន​ផលិតផល​សំខាន់ៗ​ដែល​កម្ពុជា​នាំទៅ​ជប៉ុន រួមមាន សម្លៀក​បំពាក់ ស្បែកជើង គ្រឿង​បង្គុំ និង​កសិផល ចំណែក​ទំនិញ​ជប៉ុន​នាំ​ចូល​មក​កម្ពុជា គឺជា​គ្រឿង​ម៉ាស៊ីន រថយន្ត គ្រឿង​អេឡិចត្រូនិក និង​គ្រឿងចក្រ​សម្រាប់​វិស័យ​កសិកម្ម​ជាដើម​។ នេះ​បើតាម​លោក លឹម ហេង ​។

ទិន្នន័យ​ពី​អគ្គនាយកដ្ឋាន​គយ និង​រដ្ឋាករ​កម្ពុជា​ឱ្យដឹងថា ចាប់ពី​ខែ​មករា ដល់​ខែ​កញ្ញា ឆ្នាំ​ ២០២២ ពាណិជ្ជកម្ម​ទ្វេភាគី​កម្ពុជា​-​ជប៉ុន មាន​ទឹកប្រាក់​សរុប ១ ៤៩៩,៥​ លាន​ដុល្លារ កើន​ ១៥,១​ ភាគរយ​បើ​ធៀប​រយៈពេល​ដូចគ្នា​ឆ្នាំ​ ២០២១ ​។ ក្នុងនោះ​កម្ពុជា​នាំទៅ​ជប៉ុន​មាន​ចំនួន ៨៩៧,៦៩​ លាន​ដុល្លារ កើន ៨,៥ ​ភាគរយ និង​ការនាំ​ទំនិញ​ពី​ប្រទេស​ជប៉ុន​មក​កម្ពុជា​មាន​ចំនួន ៦០១,៨ ​លាន​ដុល្លារ កើនឡើង ២៦,៦ ​ភាគរយ​៕