ភ្នំពេញៈ កូរ៉េខាងត្បូងសន្យានឹងជំរុញអ្នកវិនិយោគរបស់ខ្លួនមកកម្ពុជាបន្ថែមទៀតនៅពេលខាងមុខ និងប្តេជ្ញាពង្រឹងកិច្ចសហប្រតិបត្តិការរវាងកម្ពុជា និងកូរ៉េខាងត្បូងឱ្យកាន់តែរឹងមាំបន្ថែមទៀត។ នេះបើយោងតាមការបញ្ជាក់ពីហ្វេសប៊ុកនាយករដ្ឋមន្ត្រី ហ៊ុន សែន។
នាថ្ងៃទី ១១ ខែវិច្ឆិកា លោកនាយករដ្ឋមន្ត្រី ហ៊ុន សែន ដែលជាប្រធានអាស៊ានបានជួបជាមួយប្រធានាធិបតីកូរ៉េខាងត្បូង លោក Yoon Suk Yeol ក្នុងឱកាសដែលលោកមកចូលរួមក្នុងកិច្ចប្រជុំកំពូលអាស៊ាន-កូរ៉េ នៅរាជធានីភ្នំពេញ។
ហ្វេសប៊ុកនាយករដ្ឋមន្ត្រីកម្ពុជាបញ្ជាក់ក្រោយជំនួបថា មេដឹកនាំទាំង ២ បានពិភាក្សាគ្នាអំពីបញ្ហាតំបន់ផង និងបញ្ហាទ្វេភាគីផង ខណៈលោក Yoon បានសម្ដែងការគាំទ្រចំពោះមជ្ឈភាពអាស៊ាននាពេលនេះ និងសម្ដែងការពេញចិត្តចំពោះកិច្ចសហប្រតិបត្តិការទ្វេភាគីរវាងកូរ៉េខាងត្បូង និងប្រទេសកម្ពុជា ជាពិសេសទៅលើវិស័យពាណិជ្ជកម្ម និងការវិនិយោគរវាងប្រទេសទាំង ២ ។
ហ្វេសប៊ុកដដែលបានដកស្រង់សម្ដីលោក Yoon ថា ប្រទេសទាំង ២ មានទំនាក់ទំនងល្អនឹងគ្នាជាច្រើន ដូចជា ទំនាក់ទំនងរវាងរដ្ឋាភិបាល និងរដ្ឋាភិបាល វិស្ស័យឯកជន និងឯកជនរវាងប្រជាជន និងប្រជាជន ហើយក្នុងរយៈពេលត្រឹមតែ ២៥ ឆ្នាំតែប៉ុណ្ណោះ ទំហំពាណិជ្ជកម្មរវាងប្រទេសទាំង ២ មានការកើនឡើងជាង ២០ ដង។
លោកបន្តថា ជំនួយក្រៅប្រទេសរបស់កូរ៉េមកកម្ពុជាត្រូវបានបង្កើនឡើងបន្ថែមទៀត សម្រាប់ជួយដល់កម្ពុជាក្នុងការអភិវឌ្ឍ។
លោក Yoon ត្រូវបានស្រង់សម្ដីថា៖ «កូរ៉េនឹងជំរុញអ្នកវិនិយោគមកកម្ពុជាបន្ថែមទៀតនៅពេលខាងមុខ និងពង្រឹងកិច្ចសហប្រតិបត្តិការឱ្យកាន់តែរឹងមាំបន្ថែមទៀត ជាពិសេសដើម្បីចាប់យកឱកាសតាមរយៈកិច្ចព្រមព្រៀងពាណិជ្ជកម្មសេរីកម្ពុជា-កូរ៉េ ការមិនយកពន្ធត្រួតគ្នារវាងប្រទេសទាំង ២ ជាដើម»៕