កម្មករកំពុងលើកដាក់ផ្លែដូងប្រេងទៅលើរថយន្តនៅចម្ការមួយនៅឥណ្ឌូនេស៊ី។ រូប AFP
នៅថ្ងៃសុក្រ ទី ១១ វិច្ឆិកា ឆ្នាំ ២០២២ ក្រុមហ៊ុនឥណ្ឌូនេស៊ីចំនួន ៩ បានចុះហត្ថលេខាលើកិច្ចសន្យាលក់ផលិតផលប្រេងដូងចំនួន ២,៥ លានតោន ដែលមានតម្លៃ ២,៦ ពាន់លានដុល្លារទៅឱ្យអ្នកទិញចិនចំនួន ១៣ រូប។ នេះបើតាមក្រសួងពាណិជ្ជកម្មឥណ្ឌូនេស៊ីនិយាយនៅក្នុងសេចក្តីថ្លែងការណ៍មួយ។
កិច្ចព្រមព្រៀងនេះ បានកើតឡើងបន្ទាប់ពីដំណើរទស្សនកិច្ចផ្លូវរដ្ឋរបស់លោកប្រធានាធិបតីឥណ្ឌូនេស៊ី ចូកូ វីដូដូ នៅប្រទេសចិនកាលពីខែកក្កដា។ រដ្ឋាភិបាលឥណ្ឌូនេស៊ី បាននិយាយថាចិនបានប្តេជ្ញាចិត្តនឹងនាំចូលប្រេងដូងឆៅរបស់ឥណ្ឌូនេស៊ីបន្ថែមចំនួន ១ លានតោន។
យ៉ាងណាក៏ដោយ គេនៅមិនទាន់ច្បាស់ទេថាតើកិច្ចព្រមព្រៀងនេះនឹងត្រូវអនុវត្តក្នុងរយៈពេលប៉ុន្មាននោះ។
បើតាមក្រសួងពាណិជ្ជកម្មឥណ្ឌូនេស៊ី ប្រទេសឥណ្ឌូនេស៊ីបាននាំចេញផលិតផលប្រេងដូងចំនួន ៦,៦ លានតោនទៅកាន់ប្រទេសចិនក្នុងឆ្នាំ ២០២១ ។
រដ្ឋមន្ត្រីពាណិជ្ជកម្មឥណ្ឌូនេស៊ីលោក ហ្ស៊ុលគីហ្វ្លី ហាសាន (Zulkifli Hasan) បាននិយាយថា ការនាំចេញទៅកាន់ប្រទេសចិន នឹងមិនរំខានដល់ការផ្គត់ផ្គង់ប្រេងចម្អិនអាហារក្នុងស្រុកទេ ក្រោមហេតុផលថារដ្ឋាភិបាលបានកំណត់ឱ្យអ្នកនាំចេញផ្គត់ផ្គង់ទីផ្សារក្នុងស្រុក ដើម្បីទទួលបានការអនុញ្ញាតនាំចេញ។
«កាតព្វកិច្ចទីផ្សារក្នុងស្រុក និងកាតព្វកិច្ចតម្លៃក្នុងស្រុកសម្រាប់អ្នកផលិតប្រេងចម្អិនអាហារ ព្រមទាំងឧស្សាហកម្មប្រេងដូងឆៅនៅតែមានដដែល ដើម្បីធានាឱ្យមានស្ថិរភាពនៃការផ្គត់ផ្គង់វត្ថុធាតុដើមប្រេងចម្អិនអាហារ»។ នេះបើតាម លោក ហ្ស៊ុលគីហ្វ្លី និយាយនៅក្នុងសេចក្តីថ្លែងការណ៍មួយ។
គួរជ្រាបថា ឥណ្ឌូនេស៊ី ដែលជាប្រទេសនាំចេញប្រេងដូងកំពូលរបស់ពិភពលោកបានហាមឃាត់ការនាំចេញប្រេងដូងរយៈពេល ៣ សប្តាហ៍ ដោយចាប់ផ្តើមពីចុងខែមេសា ដើម្បីទប់ទល់នឹងការកើនឡើងនៃតម្លៃប្រេងចម្អិនអាហារ ដែលជាហេតុនាំឱ្យចំនួនស្តុកផ្គត់ផ្គង់កើនឡើងច្រើន។
រដ្ឋាភិបាលទីក្រុងហ្សាការតា បានលើកលែងការយកពន្ធតាំងពីពាក់កណ្តាលខែកក្កដា ដើម្បីលើកទឹកចិត្តដល់ការនាំចេញ ក៏ប៉ុន្តែអាចនឹងណែនាំការយកពន្ធឡើងវិញនៅពាក់កណ្តាលទីពីរនៃខែវិច្ឆិកា៕
