.jpg)
កុមារដែលចូលរួមក្នុងគម្រោងកុមារឆ្លាតអំពីលុយ ឆាឈីង។
មូលនិធិ ព្រូដិនស៍ តាមរយៈក្រុមហ៊ុន ព្រូដិនសលកម្ពុជា និងកិច្ចសហការណ៍ជាមួយអង្គការមូលនិធិសិទ្ធិកុមារ ដោយមានការគាំទ្រពីសំណាក់ក្រសួងអប់រំ យុវជន និងកីឡា កាលពីថ្ងៃទី ៣ ខែវិចិ្ឆកា នៅខេត្តកំពត បានប្រកាសជាផ្លូវការនូវកិច្ចបន្តគម្រោងកម្មវិធីអប់រំហិរញ្ញវត្ថុមូលដ្ឋានសម្រាប់កុមារ «ឆាឈីង» ក្នុងដំណាក់កាលទី ២ ក្រោមឈ្មោះ «កុមារឆ្លាតអំពីលុយ ឆាឈីង»។
កម្មវិធីប្រកាសនេះមានវត្តមានអញ្ជើញចូលរួមជាអធិបតីភាពពីសំណាក់ ឯកឧត្តមបណ្ឌិត ចាន់ សុភា អគ្គលេខាធិការរងនៃក្រុមប្រឹក្សាជាតិកម្ពុជា ដើម្បីអភិវឌ្ឍយុវជន និងជាប្រធាននាយកដ្ឋានបឋមនៃក្រសួងអប់រំ យុវជន និងកីឡា ព្រមទាំងឯកឧត្តម ខៀវ រិទ្ធិភ័ណ្ឌ អភិបាលរងនៃគណៈអភិបាលខេត្តកំពតផងដែរ។
សេចក្តីប្រកាសនេះបញ្ជាក់អំពីការប្ដេជ្ញាបន្តគាំទ្រការលើកស្ទួយអក្ខរកម្មហិរញ្ញវត្ថុទៅដល់កុមារកម្ពុជាក្នុងរយៈពេល ៣ ឆ្នាំទៅមុខទៀត។ គម្រោងនេះមានគោលបំណងធំ ដើម្បីបង្រៀនកុមារអាយុពី ៧ ដល់ ១២ ឆ្នាំ ពីចំណេះដឹងឧបករណ៍ និងការអនុវត្តន៍នានា ដែលពួកគាត់ត្រូវការក្នុងការសម្រេចចិត្តហិរញ្ញវត្ថុដ៏ត្រឹមត្រូវ ដើម្បីសម្រេចគោលដៅ និងសុបិន្តរបស់ពួកគេ។
ការពង្រីកគម្រោងឆាឈីងវគ្គទី ២ នេះគឺដោយសារការសម្រេចបានជោគជ័យលើវគ្គទី ១ ចាប់ពីដើមឆ្នាំ ២០១៩ ដល់ដើមឆ្នាំ ២០២២ ។ ក្នុងដំណាក់កាលទី ១ នេះ គម្រោងបានអនុវត្តនៅទីក្រុងភ្នំពេញ ខេត្តកណ្ដាល និងកំពង់ចាមទៅលើសាលាបឋមសិក្សាគោលដៅចំនួន ១៥០ ។ ដំណាក់កាលនេះបានផ្ដល់ប្រយោជន៍ដល់សិស្សចំនួន ៣៩,៨៨៩ នាក់ (សិស្សស្រីចំនួន ១០,៧០៤ នាក់) គ្រូចំនួន ៥៨១ នាក់ នាយកសាលាចំនួន ១៥០ នាក់ អាណាព្យាបាលចំនួន ២៨៩ នាក់ និងមន្រី្តរដ្ឋាភិបាលចំនួន ៦៩ នាក់។
គណអធិបតីមានប្រសាសន៍នៅក្នុងពិធីសម្ពោធគម្រោង។
គម្រោងកុមារឆ្លាតអំពីលុយ ឆាឈីងដំណាក់កាលទី ២ នេះនឹងបន្ដពង្រីកអត្ថប្រយោជន៍នេះទៅលើភាពជោគជ័យនៃដំណាក់កាលទី ១ លើសាលាចំនួន ១៥០ និងភាពជាម្ចាស់ពីសំណាក់ក្រសួង ដោយបន្ថែមនូវសាលាគោលដៅចំនួន ១៥០ ទៀតនៅក្នុងខេត្តកំពង់ចាម កំពត កណ្ដាល សៀមរាប និងភ្នំពេញ។ លើសពីការពង្រីកគោលដៅសាលា គម្រោងនឹងរំពឹងបន្ថែមទៅលើគោលដៅសំខាន់មួយទៀត គឺការដាក់បញ្ជូលមេរៀនអក្ខរកម្មហិរញ្ញវត្ថុឆាឈីងនេះចូលទៅក្នុងកម្មវិធីសិក្សាផ្លូវការរបស់ក្រសួងអប់រំ ដើម្បីធានាវិសាលភាពនៃលទ្ធផលវិជ្ជមាននៃចំណេះដឹងនេះ។
ឯកឧត្តមបណ្ឌិត ចាន់ សុភា មាន ប្រសាសន៍ថា៖ «តំណាងក្រសួងអប់រំ យុវជន និងកីឡា ខ្ញុំពិតជាមានសេចក្តីសោមនស្សរីករាយណាស់ដែលបានចូលរួមកម្មវិធីប្រកាសជាផ្លូវការនេះ ហើយខ្ញុំបង្ហាញនូវការគាំទ្រយ៉ាងពេញទំហឹងទៅលើគម្រោងកុមារឆ្លាតអំពីលុយ ឆាឈីងដំណាក់កាលទី ២»។
«ឆ្លៀតក្នុងឱកាសនេះ ខ្ញុំសូមលើកទឹកចិត្តឱ្យដៃគូពាក់ព័ន្ធនានាធ្វើការរួមគ្នា ដោយភាពច្បាស់លាស់លើទំនួលខុសត្រូវ ប្រកបដោយវិជ្ជាជីវៈ ផ្តោតលើគោលដៅវែងឆ្ងាយជាផលប្រយោជន៍នៃកុមារ និងសង្គមកម្ពុជា»។
លោក Freddie Wong, នាយកស្ដីទីផ្នែកហិរញ្ញវត្ថុ និង Actuary តំណាងក្រុមហ៊ុនព្រូដិនសលកម្ពុជា បានមានប្រសាសន៍ថា៖ «ការធានាសុវត្ថិភាពផ្នែកសុខភាព និងហិរញ្ញវត្ថុ សម្រាប់ប្រជាជនកម្ពុជា គឺជាគោលដៅចម្បងនៃអាជីវកម្មយើង។ យុទ្ធសាស្ត្រមួយរបស់យើង គឺការបង្កើនអក្ខរកម្មហិរញ្ញវត្ថុ សម្រាប់ក្មេងៗជំនាន់ក្រោយ។ គោលដៅចំបងនៃយុទ្ធសាស្ត្រនេះ គឺការធានាឱ្យពួកគាត់មានការយល់ដឹងច្បាស់លាស់អំពីការគ្រប់គ្រងលុយតាំងពីវ័យក្មេង ដើម្បីឱ្យពួកគេធ្វើការសម្រេចចិត្តហិរញ្ញវត្ថុបានប្រសើរជាងមុន។ ខ្ញុំពិតជារីករាយណាស់ដែលឃើញកម្មវិធីឆាឈីងបានអនុត្តជោគជ័យពីសំណាក់កុមារកម្ពុជា និងឃើញកម្មវិធីនេះរីកចម្រើនទៅមុខ»។
លោក ទេព ចាន់សំអុល នាយកប្រតិបត្តិនៃអង្គការមូលនិធិសិទ្ធិកុមារបានបន្ថែមថា៖ «ការអប់រំផ្នែកហិរញ្ញវត្ថុសម្រាប់កុមារនៅកម្ពុជាមានសារៈសំខាន់ណាស់ក្នុងការបំពេញចន្លោះអក្ខរកម្មហិរញ្ញវត្ថុ និងលើកស្ទួយការគ្រប់គ្រងហិរញ្ញវត្ថុឱ្យបានល្អនាពេលអនាគតក្នុងចំណោមកុមារអាយុចាប់ពី ៧ ដល់ ១២ ឆ្នាំ។ ជំនួសឱ្យមូលនិធិសិទ្ធិកុមារ យើងខ្ញុំនឹងប្តេជ្ញាក្នុងការធានាដំណើរការកម្មវិធីប្រកបដោយលទ្ធផល និងការផ្លាស់ប្ដូរវិជ្ជមានទៅលើអក្ខរកម្មហិរញ្ញវត្ថុនៅប្រទេសកម្ពុជា»។ ឆាឈីង គឺជាកម្មវិធីអប់រំ និងទំនួលខុសត្រូវផ្នែកហិរញ្ញវត្ថុជាសកល សម្រាប់កុមារអាយុពី ៧ ដល់ ១២ ឆ្នាំ។ កម្មវិធីនេះផ្ដោតទៅលើការបំពេញចន្លោះខ្វះខាតផ្នែកអក្ខរកម្មហិរញ្ញវត្ថុ ដោយការប្រើប្រាស់របៀបសិក្សាបែបរួមបញ្ជូល ដោយប្រើប្រាស់ឧបករណ៍ឌីជីថល និងរបៀបសិក្សាក្នុងសាលា៕
